Deuteronomio 26:1-11

Ang Biblia (1978)

Ang paghahandog ng unang bunga.

26 At mangyayari, pagka nakapasok ka sa lupain na ibinibigay sa iyo ng Panginoon mong Dios na pinakamana, at iyong inaari, at iyong tinatahanan;

^2 (A)Na iyong kukunin ang mga una sa lahat ng bunga ng lupain, na iyong mga pipitasin sa lupain na ibinibigay sa iyo ng Panginoon mong Dios: at iyong isisilid sa isang buslo, ^(B)at ikaw ay paroroon sa dakong pipiliin ng Panginoon mong Dios, na patatahanan sa kaniyang pangalan:

³ At paroroon ka sa saserdote sa mga araw na yaon, at sasabihin mo sa kaniya, Aking ipinahahayag sa araw na ito sa Panginoon mong Dios, na ako'y nasok sa lupain na isinumpa ng Panginoon sa aming mga magulang, upang ibigay sa amin.

⁴ At kukunin ng saserdote ang buslo sa iyong kamay at ilalagay sa harap ng dambana ng Panginoon mong Dios.

⁵ At ikaw ay sasagot, at magsasabi sa harap ng Panginoon mong Dios, ^(C)Isang taga Siria na ^(D)kamunti nang mamatay ang aking ama; siyang bumaba sa Egipto, at nakipamayan doon, na ^(E)kaunti sa bilang; at doo'y naging isang bansang malaki, makapangyarihan, at makapal:

⁶ At kami ay tinampalasan ng ^(F)mga taga Egipto, at pinighati kami at inatangan kami ng isang mabigat na pagkaalipin:

⁷ At ^(G)kami ay dumaing sa Panginoon, sa Dios ng aming mga magulang at dininig ng Panginoon ang aming tinig, at nakita ang aming kadalamhatian, at ang aming gawa, at ang aming kapighatian;

⁸ At ^(H)inilabas kami ng Panginoon sa Egipto ng kamay na makapangyarihan, at ng unat na bisig, at ng malaking kakilabutan, at ng mga tanda, at ng mga kababalaghan:

⁹ At kaniyang dinala kami sa lupaing ito, at ibinigay sa amin ang ^(I)lupaing binubukalan ng gatas at pulot.

¹⁰ At ngayon, narito, aking dala ang mga una sa bunga ng lupa, na ibinigay mo sa akin, Oh Panginoon. At iyong ilalapag sa harap ng Panginoon mong Dios, at sasamba ka sa harap ng Panginoon mong Dios:

¹¹ At ^(J)magagalak ka sa lahat ng magaling na ibinigay sa iyo ng Panginoon mong Dios, at sa iyong sangbahayan, ikaw, at ang Levita, at ang taga ibang lupa na nasa gitna mo.