A A A A A
Bible Book List

COLOSENSES 3Kekchi (KEK)

Chanchan nak xexcuacli cuiˈchic chi yoˈyo e̱rochben li Cristo nak xexpa̱ban. Acˈ chic le̱ yuˈam. Joˈcan nak qˈuehomak e̱chˈo̱l chixba̱nunquil li cha̱bil naˈleb ut chexcˈoxlak chirix li cuan saˈ choxa bar cuan cuiˈ li Cristo cˈojcˈo saˈ xnim ukˈ li Dios xban nak kˈaxal nim xcuanquil. Junelic checˈoxla li Dios ut me̱cˈoxla chic lix ma̱usilal li ruchichˈochˈ. Lix ma̱usilal li ruchichˈochˈ ma̱cˈaˈ chic xcuanquil saˈ e̱be̱n. Chanchan camenakex chiru. Ac colbilex chic chiru li ma̱usilal xban nak junajex chic riqˈuin li Cristo, ut li Cristo junaj riqˈuin li Dios. Caˈaj cuiˈ riqˈuin li Jesucristo cuan kayuˈam. Ut nak tol‑e̱lk cuiˈchic li Jesucristo tixcˈutbesi nak la̱o li ralal xcˈajol, ut totzˈako̱nk riqˈuin lix lokˈal.

Me̱ba̱nu chic li najter naˈleb

Xban nak acˈ chic le̱ yuˈam, canabomak chi junaj cua xrahinquil ru li incˈaˈ us joˈ li coˈbe̱tac yumbe̱tac, ut li ma̱us aj naˈleb. Ut canabomak xrahinquil ru li ma̱usilal. Ut me̱rahi ru li biomal xban nak li xrahinquil ru li biomal, aˈan chanchan ajcuiˈ xlokˈoninquil li jalanil dios. Riqˈuin xba̱nunquil li ma̱usilal aˈin nachal xjoskˈil li Dios ut naxteneb li tojba ma̱c saˈ xbe̱neb li nequeˈkˈetoc re li ra̱tin. Joˈcan ajcuiˈ queba̱nu chak la̱ex junxil nak toj cuanquex chak saˈ li ma̱c. Aban anakcuan me̱ba̱nu chic chixjunil li cˈaˈ re ru aˈin: mexjoskˈoˈ, me̱poˈ e̱rib chi ribil e̱rib, me̱ba̱nu li ma̱usilal, mexkˈaban, ut mex‑a̱tinac saˈ yibru a̱tin. Mexticˈtiˈic. Me̱ba̱nu chic chixjunil li ma̱usilal aˈin xban nak chixjunil li cˈaˈak re ru queba̱nu chak najter ac xerisi saˈ le̱ chˈo̱l. 10 Anakcuan acˈ chic le̱ yuˈam. Li Dios, aˈan li quijaloc re le̱ yuˈam ut aˈan ta̱tenkˈa̱nk e̱re cuulaj cuulaj chixtzolbal e̱rib riqˈuin re nak te̱tau ru chi tzˈakal chanru li Dios ut te̱ba̱nu li naraj aˈan. 11 La̱o aj pa̱banel juntakˈe̱to chiru li Dios xban nak junajo saˈ li acˈ yuˈam. Moco jalaneb ta laj griego chiruheb laj judío. Moco jalaneb ta li tzolbileb chiruheb li incˈaˈ tzolbileb. Moco jalaneb ta li xeˈxba̱nu li circuncisión chiruheb li incˈaˈ xeˈxba̱nu. Moco jalan ta li junju̱nk usta jalan xtenamit. Moco jalaneb ta li cuanqueb xpatrón chiruheb li ma̱cˈaˈeb xpatrón. Li kˈaxal lokˈ xcˈoxlanquil aˈan aˈin: Li Jesucristo cuan riqˈuineb li junju̱nk li nequeˈpa̱ban re ut junajo chic saˈ xcˈabaˈ li Jesucristo. 12 Li Dios kˈaxal nequexra ut quixsicˈ e̱ru chokˈ ralal xcˈajol. Joˈcan nak chexcua̱nk saˈ ti̱quilal. Chetokˈoba ruheb le̱ ras e̱ri̱tzˈin ut chetenkˈaheb. Me̱kˈetkˈeti e̱rib. Chexcua̱nk saˈ tu̱lanil ut checuyak li raylal. 13 Checuyak e̱rib chiribil e̱rib. Ut cui cuan junak cuan xma̱c che̱ru, checuyak xma̱c. Joˈ nak quixcuy e̱ma̱c li Ka̱cuaˈ, joˈcan ajcuiˈ cheba̱nu la̱ex. 14 Li kˈaxal lokˈ xba̱nunquil chiru chixjunil li cˈaˈak re ru aˈin, aˈan li rahoc ib xban nak riqˈuin aˈan junajak li kacˈaˈux ut tzˈakalak re ru li takaba̱nu. 15 Junajakex taxak saˈ le̱ pa̱ba̱l xban nak sicˈbil e̱ru xban li Dios. Chicua̱nk li tuktu̱quilal saˈ le̱ chˈo̱l li naxqˈue li Cristo re nak texcua̱nk saˈ xya̱lal. Ut junelic chebantioxi chiru li Dios li usilal xba̱nu e̱re. 16 Li ra̱tin li Cristo chicana̱k saˈ e̱chˈo̱l chi junelic re nak cua̱nk e̱naˈleb. Chetzolak e̱rib che̱ribil e̱rib ut chetenkˈa e̱rib che̱ribil e̱rib saˈ le̱ pa̱ba̱l. Chexbicha̱nk re xlokˈoninquil li Dios. Chexbicha̱nk joˈ naxcˈut che̱ru li Santil Musikˈej ut junelic chexbantioxi̱nk chiru li Dios. 17 Ut chixjunil li cˈaˈru te̱ye ut te̱ba̱nu, cheba̱nuhak re xqˈuebal xlokˈal li Jesucristo. Ut junelic chexbantioxi̱nk chiru li Acuabej Dios saˈ xcˈabaˈ li Ka̱cuaˈ Jesucristo.

Chexcua̱nk saˈ xya̱lal riqˈuineb le̱ ras e̱ri̱tzˈin

18 Ex ixakilbej, chepa̱ba̱k le̱ be̱lom joˈ e̱cˈulub xba̱nunquil xban nak la̱ex chic aj pa̱banel. 19 Ut la̱ex be̱lomej, cherahak le̱ rixakil ut mexjoskˈoˈ riqˈuineb. 20 Ut joˈcan ajcuiˈ la̱ex alalbej, junelic chexpa̱ba̱nk chiruheb le̱ naˈ e̱yucuaˈ xban nak aˈan li nacuulac chiru li Ka̱cuaˈ Dios. 21 Ex yucuaˈbej, me̱chˈila le̱ ralal e̱cˈajol chi ma̱cˈaˈ rajbal re nak incˈaˈ ta̱chˈina̱nk xchˈo̱leb. 22 Ex aj cˈanjel, junelic chexpa̱ba̱nk chiruheb le̱ patrón. Chanru nak nequexcˈanjelac nak yo̱ che̱rilbal le̱ patrón, joˈcan ajcuiˈ texcˈanjelak nak incˈaˈ yo̱ che̱rilbal. Mexcˈanjelac re xnimobresinquil e̱rib. Chexcˈanjelak ban chi anchal le̱ chˈo̱l xban nak la̱ex nequera li Ka̱cuaˈ Dios. 23 Nak yo̱quex chi cˈanjelac chiru le̱ patrón, yo̱quex ajcuiˈ chi cˈanjelac chiru li Ka̱cuaˈ Dios xban nak la̱ex rehex chic li Dios. Joˈcan nak chixjunil li cˈaˈru te̱ba̱nu, cheba̱nuhak chi anchal e̱chˈo̱l. 24 Joˈcan cheba̱nu xban nak la̱ex ac nequenau nak li Ka̱cuaˈ Dios ta̱qˈuehok le̱ kˈajca̱munquil li yechiˈinbil e̱re xban nak li Ka̱cuaˈ Jesucristo, aˈan li tzˈakal patrón saˈ e̱be̱n ut yo̱quex chi cˈanjelac chiru. 25 Li ani tixba̱nu li incˈaˈ us tixcˈul xtojbal xma̱c aˈ yal cˈaˈru lix ma̱c xban nak li Dios incˈaˈ naxsicˈ ru ani tixqˈue chixtojbal xma̱c.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes