A A A A A
Bible Book List

COLOSENSES 1Mam de Todos Santos Chuchumatán (MVJ)

Jun uˈj e cub ttzˈiˈben Pablo cye ocslal tuj tnom Colosas

Jun kˈolbebl tuˈn apóstol Pablo

Inayena Pablo. Dios o scyˈonte weya tuˈn wajbena te jun t‑xel Jesucristo. At hermano Timoteo wuyena. Nxiˈ ntzˈiˈbena ja uˈj lu te cyey ocslal tuj tnom te Colosas, ejeeˈy hermano cyiw eteˈy tuj cymojbabl cyiiba tuya Cristo, jxjal e tscyˈo Dios tuˈn tcawen. At‑xit t‑xtalbil Kman Dios cyibaja, bix tzajxit tkˈoˈnxin cyey tuˈn cytena tuj ttz̈yal.

Tej tnaˈn Pablo Dios cyiˈj ocslal

Jaca maj oj nchin naˈna Dios, Tman Kaaw Jesucristo, nxiˈ nkˈoˈna chjonte texin cyiˈja. Nchin kˈona chjonte texin, cuma ma nbiˈya ma tzˈoc ke cycˈuˈja tiˈ Cristo Jesús, bix cuma n‑oc cyakˈ cykil ocslal cyey. Bix chjonte te Dios at jun baˈn te cyey kayon cyiˈja tuj cyaˈj. Tpocbalj tbanel e cub cybiˈna tej tpon jaxxix yol tiˈj colbil cyey cyxola. Bix tisen ma pon pocbablte colbil cyey cyxola, jax ma pon tuj nimtl tnom. Bix tisen jawne njaw tz̈ˈiy jun awal, jaxse juˈx ntz̈ˈiy tyol Dios tuj cykilca twitz txˈotxˈ. Bix jaxse juˈx cyxola, jatxe tej cybintiya jjaxxix yol tiˈj colbil cyey, bix el cyniˈya tiˈj ka jaxxix, otzen cub cychˈixpuˈna cynaabla.

Ja tzunj baˈn xnakˈtzbil lu tiˈj colbil cyey, jaj xin Epafras e pon kˈinte cyey. Jaxin jun wuyena tuj taakˈen Cristo. N‑oc takˈxin weya, bix nakˈananxin cyiw tuj taakˈen Dios. Ma tzˈajbenxin te jun nxela baˈn tuj akˈuntl cyxola. Bix ma tzaj tkbaˈnxin weya nim n‑oc cyakˈ niyˈtl ocslal cyey, cuma at Espíritu Santo cyuyey.

Yal weya, jatxe tej nbintiya e cyocslay Cristo, min ma cyaj nkˈoˈna tuˈn nnaˈna Dios cyiˈja. Nchin kanena texin tuˈn tel cyniˈya tiˈj tajbilxin tuˈnj cyilbila kˈoˈn tuˈn Espíritu Santo bix tuˈnj ti tten tuˈn tel cyniˈya tiˈj alcyej jaxxix bix alcyej ẍtakˈ, 10 tuˈntzen t‑xiˈ cyiiˈna cychunkˈlala baˈnxix twitz Kaaw, tuˈn ttzalajxin cyiˈja tuj cykilca nbint cyuˈna. Nchin kanena texin tuˈn cybinchana baˈn cye cabtl, bix tuˈn tel mas cyniˈya tiˈjxin. 11 Nimxsen tipemalxin, bix nchin kanena texin tuˈn cycywixa tuˈn jawnex tipemalxin, tuˈntzen cyweˈxixa tuya pasyensya bix tzalajebl oj n‑oc qˈuixcˈaj cyiˈja. 12 Bix nchin kanena te Kman Dios tuˈn cykˈontiya chjonte texin tuj cyanema. Tuˈnxin ma ko chˈixpet, tuˈntzen at koclen tuˈn kiikˈente kkab ctzaal tkˈoˈnxin te ke, ejooˈ ocslal. 13 Ma ko etz tiiˈnxin tjakˈ tcawbil taaw il, bix ma cub tkˈoˈnxin ejooˈ tuj tcawbil Tcwalxin, jxin Cristo n‑oc takˈ texin. 14 Nuk tuˈn tcyimlen Tcwalxin ma chjet kil bix ma cub najset.

Ma bint kten tuya Dios tuˈn tcyimlen Cristo twitz cruz

15 Key hermano, ja tzunj xin Tcwal Dios lu tzin techlaˈn te ke tiiˈn Dios, cuma min chicˈaj Dios. Mas jawnex Tcwal Dios cyxol cykilca xjal bix at‑xin tibaj cykilca. 16 Mas jawnexxin, cuma tuˈnxin e bint cykilca at. E tbinchaxin cykilca at twitz cyaˈj bix cykilca at twitz txˈotxˈ. E tbinchaxin cykilca chicˈaj bix cykilca yaaˈn chicˈaj. Kej nejenel aj te tuj cyaˈj bix alcyejtl‑le nchi cawen, e tbincha Tcwal Dios cykilca. Jaxin binchalte cykilca at, bix cykilca at te tajbel texin. 17 E tenxin tuj tneel tej mitknaˈx tbint twitz cyaˈj bix twitz txˈotxˈ, bix tuˈn tipemalxin at cykilca tuj tumel. Kˈiˈn tuˈnxin cykilca at. 18 Bix tisen ncawen kwiˈ tibaj kxumlal, juˈtzen nejenelxin kibaj cykilca koˈ ocslal. Bix jaxin tneel xjal tuˈn tjatz itzˈj juntl maj tuj cyamecy te junx maj, tuˈntzen tocxin te Cawel tibaj cykilca, hasta tibaj cyamecy. 19 Tzin techlaˈnxin tiiˈn Dios, cuma e tajbe Kman Dios tuˈn tkˈoj texin cykilca tipemal bix tnaabl Dios. 20 Bix e tajbe Dios tuˈn tten cykilca at twitz cyaˈj tuyaj cykilca at twitz txˈotxˈ tuj ttz̈yal tuya Dios nuk tuˈn Cristo. Bix tuˈn tcyamecyxin twitz cruz e bint tuˈn Dios tuˈn tbint kten tuya Dios.

21 Yaltzen cyey, nejl cycyˈiy Dios. Oc cykˈoja tiˈjxin tuj cyanema, bix nuk kaˈ e cybinchay. 22 Pero amale aj iletkey nejl, pero jaˈlewe ma bint tuˈn Dios tuˈn tbint cytena tuyaxin. Tuˈn tcyamecy Tcwalxin tej toc te xjal, chi pomela sakxix bix mintiiˈ cyila bix mintiiˈ cypalta twitzxin. 23 Pero chi pomela nuk ka wiˈlxix cyocslabla tiˈ Cristo bix ka min cyaj cycyeˈyena tuˈn cyayona tiˈj tbanel ctzaal tkˈoˈn Dios cyey. Ja yol lu tiˈj colbil cyey ma tzˈoc cybiˈna, jaxj yol nkˈumj tuj cykilca twitz txˈotxˈ. Tuˈn t‑xiˈ npocbaˈna ja yol lu e tscyˈo Dios inayena.

Jun taakˈen Pablo tuˈn tajben cyxol ocslal

24 Nchin tzalaja tzalu tuj tzeeˈ, cuma ma takˈ Dios weya tuˈn tiyˈx qˈuixcˈaj wuˈna tuj taakˈen Cristo. Jqˈuixcˈaj niyˈx wuˈna najben tuˈn cytz̈ˈiya tuj cyocslabla, bix n‑el nniˈya tiˈj jniyˈx wuˈna tuj nxumlala cˈajbel cye t‑xjal Cristo. 25 Jweya waakˈen tuˈn wajbena cye t‑xjal Cristo, te cyey ocslal yaaˈn judío, cuma e jaw tscyˈoˈn Dios inayena tuˈn wajbena cyej xjal yaaˈn judío. Tajxin tuˈn tabij tyolxin cyuˈn cykil xjal. 26 Jatxe tuj tneel, eˈwen taˈ ja tyolxin lu cywitz xjal. Pero jaˈlewe, ma yecˈaj te cyej xjal o chi oc te t‑xjalxin. 27 E tajbexin tuˈn tyeecˈanxin cye t‑xjalxin jawnexsen jun xtalbil o baj tnincˈuˈnxin, tuˈn ttzaj tkˈoˈnxin cyexin, judíole, yaaˈnle judío. Bix ja jawnex tyolxin lu eˈwen taˈ nejl, pero chicˈaj jaˈlewe, jaj tuˈn tocx Cristo tuj kanem, tuˈntzen kpon junx tuyaxin tuya Dios.

28 Juˈ tzunj, nuk tiˈj Cristo nchin yolena oj nxiˈ nkˈumena cye xjal. Nxiˈ ncubsaˈna nwitza cye cykil xjal tuˈn cyocslan tiˈjxin, bix tuj tumel nxiˈ nkˈoˈna xnakˈtzbil tiˈjxin cye cykil xjal, tuˈntzen cypon tzˈaklxix twitz Dios tuˈnj cymojbabl cyiib tuya Cristo. 29 Tuˈn cypon tzˈakl, nchin akˈanana cyiw. Nim n‑oc wipena tiˈj, bix ma tzaj tkˈoˈn Cristo tipemal weya tuˈn tbint wuˈna.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes