Awit 121

Ang Dating Biblia (1905)

121 Ititingin ko ang aking mga mata sa mga bundok; saan baga manggagaling ang aking saklolo?

² Ang saklolo sa akin ay nanggagaling sa Panginoon, na gumawa ng langit at lupa.

³ Hindi niya titiising ang paa mo'y makilos: siyang nagiingat sa iyo, ay hindi iidlip.

⁴ Narito, siyang nagiingat ng Israel hindi iidlip ni matutulog man.

⁵ Ang Panginoon ay tagapagingat sa iyo: ang Panginoon ay lilim mo sa iyong kanan.

⁶ Hindi ka sasaktan ng araw sa araw, ni ng buwan man sa gabi.

⁷ Iingatan ka ng Panginoon sa lahat ng kasamaan; kaniyang iingatan ang iyong kaluluwa.

⁸ Iingatan ng Panginoon ang iyong paglabas at ang iyong pagpasok, mula sa panahong ito at sa magpakailan pa man.