A A A A A
Bible Book List

Apocalipsis 13Amuzgo de Guerrero (AMU)

13  Quia joˈ tjo̱meintyja̱a̱ˈa nacjooˈ teiˈ ndaaluee ndoˈ ntyˈiaya cwii quiooˈ na cwajndii waa na macaluiˈ quiiˈ ndaaluee. Niom nqui ndeiˈjndyeeˈyoˈ ñequio ntquieeˈ xqueⁿyoˈ. Ndoˈ ticwii cwii tseiˈjndyeeˈyoˈ ñjom cwii cwii corona. Ndoˈ cjooˈ cwii cwii xqueⁿyoˈ teiljeii ñˈoom ntjeiⁿ na matseijnaaⁿˈnaˈ Tyˈo̱o̱tsˈom. Ndoˈ juu quiooˈjndiiˈñeeⁿ na ntyˈiaya, matseijomnaˈ juuyoˈ chaˈcwijom cwii catsiaⁿ ljeiiya, ndoˈ ncˈeeyoˈ chaˈcwijom ncˈee oso ndoˈ ˈndyooyoˈ chaˈcwijom ˈndyoo liom. Ndoˈ juu catsoomjndii tquiaaⁿ cantyja najneiⁿ nnom quiooˈjndiiˈñeeⁿ. Ndoˈ tquiaaⁿ na nncwacatyeeⁿyoˈ ndio ˈnaaⁿˈaⁿ ndoˈ nntsa̱ˈntjomyoˈ chaˈxjeⁿ na matsa̱ˈntjoom. Mati ntyˈiaya na cwii xqueⁿyoˈ jeeⁿ nioom jnda̱ tquieeˈ, machˈeenaˈ tjaa chiuu cwii ya sa̱a̱ jnda̱ chii nˈmaⁿyoˈ. Ndoˈ chaˈtsoti nnˈaⁿ tsjoomnancue tyˈentyjo̱na naxeⁿˈ quiooˈjndiiˈñeeⁿ. Jeeⁿ tjaweeˈ nˈomna na nˈmaⁿyoˈ. Tyolaˈtˈmaaⁿˈndye nnˈaⁿ juu catsoomjndii ncˈe na jnda̱ tquiaaⁿ cantyja najneiⁿ nnom quiooˈjndii. Mati quiooˈjndiiˈñeeⁿ tyolaˈtˈmaaⁿˈndyena juuyoˈ. Tyoluena:

—¿ˈÑeeⁿ juu cwiluiitˈmaⁿñe chaˈna quiooˈjndiimˈaaⁿˈ? Ndoˈ ¿ˈñeeⁿ juu nnda̱a̱ nnaⁿñe na nntsˈaa tiaˈ ñˈeⁿñeyoˈ?

Ndoˈ tquiaa Tyˈo̱o̱tsˈom na wanaaⁿ na catseineiⁿyoˈ ñˈoom ntjeiⁿ nacjoomˈm ñequio ñˈoom na matseitˈmaaⁿˈñe cheⁿnquiiyoˈ. Mati tquiaaⁿ na wanaaⁿ na caluiitˈmaⁿñeyoˈ wenˈaaⁿ nchooˈ we chiˈ. Quia joˈ jnaⁿnaˈ na matseineiⁿyoˈ ñˈoom cwajndii na ntjeiⁿnaˈ nacjooˈ Tyˈo̱o̱tsˈom, ndoˈ seijnaaⁿˈyoˈ xueⁿˈeⁿ, ñequio cañoomˈluee yuu na macˈeeⁿ, ndoˈ ñequio chaˈtsondye joo na mˈaⁿ joˈ joˈ. Mati tquiaaⁿ na wanaaⁿ na catsˈaayoˈ tiaˈ nacjoo nnˈaⁿ na laˈxmaⁿ cwentaaⁿˈaⁿ, ndoˈ nnaⁿñeyoˈ ñˈeⁿndyena. Ndoˈ tquiaaⁿ na wanaaⁿ na catsa̱ˈntjomyoˈ cwii cwii ndyuaa, ñequio cwii cwii nnom nnˈaⁿ na tjachuiiˈndye, ñequio cwii cwii nnom nnˈaⁿ na tjachuiiˈ ñˈoom na cwilaˈneiⁿ, ñequio nnˈaⁿ ticwii cwii tsjoomnancue. Chaˈtso nnˈaⁿ tsjoomnancue na ticalaˈxmaⁿ cwentaaˈ Tyˈo̱o̱tsˈom jlaˈtˈmaaⁿˈndyena juuyoˈ. Naⁿˈñeeⁿ tîcwiljeii ncueena naquiiˈ libro cwentaaˈ Catsmaⁿ na jlaˈcueeˈ nnˈaⁿ. Ee cantyjati na tqueⁿ Tyˈo̱o̱tsˈom tsjoomnancue, waa libro ˈnaaⁿˈaⁿ na chuu ncuee nnˈaⁿ na ticantycwii na cwitaˈndoˈ.

ˈÑeeⁿ juu na ñeˈcandii, cwa candii. 10 Tsˈaⁿ na matseijndaaˈñê na ntˈueeⁿ nnˈaⁿ na ncjaachom joona ndyuaaⁿˈaⁿ, majoˈti nntjoom. Ndoˈ xeⁿ mˈaaⁿ ˈñeeⁿ juu na nntseicueeˈ xˈiaaˈ ñˈeⁿ xjo, mañˈeⁿ xjo nncueˈ. Ncˈe na luaaˈ waa macaⁿnaˈ na nquiee nnˈaⁿ na maqueⁿ Tyˈo̱o̱tsˈom cwentaaⁿˈaⁿ, cwintyjeeˈtyeⁿna cantyja na cwilaˈyuˈya nˈomna meiⁿ ticaˈndyencˈuaaˈndyena meiiⁿ wiˈ cwitjoomna.

11 Jnda̱ joˈ ntyˈiaya cwiicheⁿ quiooˈjndii na jluiˈyoˈ quiiˈ tyuaa. Ntyjoo we ndeiˈjndyeeˈyoˈ chaˈna ndeiˈjndyeeˈ cwii catsmaⁿ chjoo, sa̱a̱ seineiⁿyoˈ chaˈna matseineiⁿ catsoomjndii. 12 Ndoˈ chaˈtsoti najndeii na tyotseixmaⁿ juu quiooˈjndii najndyee, majoˈti matseixmaⁿ quiooˈjndii na jnda̱ we ncˈe ñˈoom ˈndyoo quiooˈjndii tquieeˈñeeⁿ. Ndoˈ ñequio na jndeiˈnaˈ machˈeeyoˈ na calaˈtˈmaaⁿˈndye chaˈtso nnˈaⁿ tsjoomnancue juu quiooˈjndii tquiee, tsaⁿ na jnda̱ nˈmaⁿ na jeeⁿ nioom tquieeˈ xqueⁿ. 13 Ndoˈ jndye tsˈiaaⁿ tyochˈeeyoˈ na xocanda̱a̱ nntsˈaa na cweˈ najndeii nquii tsˈaⁿ. Ñequio na jndooˈ nnˈaⁿ tyochˈeeyoˈ na cwiquiaa chom nomtyuaa na cwinaⁿnaˈ tsjo̱ˈluee. 14 Wanaaⁿ na catsˈaayoˈ na nmeiiⁿˈ ncˈe ñˈoom ˈndyoo quiooˈjndii tquiee. Joˈ chii tquiuˈnnˈaⁿnaˈ nnˈaⁿ na mˈaⁿ tsjoomnancue. Sa̱ˈntjomyoˈ na calˈana cwii na nluiˈtsjaaⁿˈñe quiooˈjndii tquiee, juu tsaⁿ na jeeⁿ nioom tquieeˈ xqueⁿ ñˈeⁿ xjo, sa̱a̱ ndicwaⁿ wandoˈ. 15 Ndoˈ toˈñomyoˈ na nnda̱a̱ nntsˈaayoˈ na juunaˈ na jluiˈtsjaaⁿˈñe quiooˈjndii tquiee nnda̱a̱ nncwja jndye ndoˈ nnda̱a̱ nntseineiⁿ. Ndoˈ hasta na nnda̱a̱ nntsa̱ˈntjomnaˈ na cwje nnˈaⁿ na ticalaˈtˈmaaⁿˈndye juunaˈ. 16 Ndoˈ juu quiooˈjndii na nda̱ we sˈaayoˈ na jndeiˈnaˈ na chaˈtso nnˈaⁿ nñom ljeii lueena ntyjaya oo cantaana. Luaaˈ sˈaayoˈ ñequio meiⁿnquia nnˈaⁿ, meiiⁿ nnˈaⁿ na cwiluiitˈmaⁿndye ndoˈ meiiⁿ nnˈaⁿ na cweˈ cwiˈoontyjo̱, oo meiiⁿ nnˈaⁿ na tyandye ndoˈ meiiⁿ nnˈaⁿ na ntyˈiaandye, oo meiiⁿ nnˈaⁿ na cwindyeˈntjomtyeⁿ ndoˈ meiiⁿ nnˈaⁿ na mˈaⁿ xjeⁿ ˈnaaⁿ. 17 Quia joˈ sˈaayoˈ na meiⁿcwii tsˈaⁿ xocanda̱a̱ na nntseijnda ˈnaⁿ oo na njnda̱a̱ ˈnaⁿ xeⁿ ticañoom ljeiiˈñeeⁿ nacjooˈ. Ee ljeiiˈñeeⁿ maˈmo̱ⁿnaˈ xueeˈ quiooˈjndii tquiee oo juu número na tseixmaⁿ xueeˈyoˈ. 18 Luaa macaⁿnaˈ na cˈoom tsˈaⁿ na jndo̱ˈ tsˈom. Cwii cwii tsˈaⁿ na matseiˈno̱ⁿˈ cwjiˈ cwenta cantyja ˈnaaⁿˈ númeroˈ na tseixmaⁿ quiooˈjndiiˈñeeⁿ ee maˈmo̱ⁿnaˈ xueeˈ tsˈaⁿ. Ndoˈ juu númeroˈñeeⁿ yom siaⁿnto waljooˈ ndyeenˈaaⁿ nchooˈ yom.

Amuzgo de Guerrero (AMU)

Copyright © 1973, 1999 by La Liga Biblica

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes