A A A A A
Bible Book List

APOCALIPSIS 22Mam de Todos Santos Chuchumatán (MVJ)

22  Bix e tzaj tyeecˈan ángel jun nimaˈ weya n‑etz twitz tkˈukbil Dios bix tuyaj Tal Carnel, j‑aˈ te chunkˈlal te junx maj. Nkoptzˈaj aˈ tisen viiyre. Nbet nimaˈ tmij be tej tnom. Bix tuj cycaˈbel ttziiˈ nimaˈ tcub jun wiyˈ tzeeˈ te chunkˈlal te junx maj. Tzin tkˈoˈn twitz cablaaj maj tuj jnabkˈi. Cykilca xjaw tzin tkˈoˈn twitz. Bix t‑xak tzeeˈ najben te kˈanel cye cykilca xjal. Mintiiˈtl castiwa. Bix jawnex tkˈukbil Dios bix Jtal Carnel ctemel tuj tnom. Bix chi ajbel t‑xjal te. Cˈoquel cycyeˈyen twitz, bix cˈoquel tbi tibaj cywitz. Mintiiˈtl koniyan. Bix mintiiˈtl il tiˈj tuˈn cyajben cantil bix kˈij cye xjal, cuma jax Kman Dios ctemel tuˈn tkˈon spiˈyen cye xjal. Bix chi cawel xjal tuya Dios te junx maj.

Tz̈i Cristo cyjulu chin ul meltzˈaj naja

Bix e tzaj tkbaˈn ángel weya:

―Jaxxix kej yol lu, bix baˈn tuˈn tke cycˈuˈja cyiˈj. Ja te Dios, Jkaaw, jatzenj Dios e tzaj tkˈoˈn tyol cye tyolel nejl tuˈnj Espíritu Santo, ma tzaj tsmaˈn tsanjel tuj cyaˈj jaˈlewe tuˈn ttzaj tyeecˈan cye t‑xjal j‑at tuˈn tul. Ma txiˈ tkbaˈn Jesucristo: “Chin ul naja,” tz̈i. At t‑xtalbil Dios cyibaj kej xjal nxiˈ cyniman kej yol ma cub ttzˈiˈbena tuj uˈj―tz̈i ángel weya.

Inayena, Juan, e nbiˈya bix e wila cykilcaj lu, bix tej t‑xiˈ nbiˈna bix e wila, in cub mutzkˈaja t‑xeeˈ tken j‑ángel otk tzaj tyeecˈan jlu weya. Pero e tzaj tkbaˈn weya:

―Miˈn tbinchaya juˈwa, cuma nuk jun t‑akˈanal Dios kena tisen jay bix tisen ke niyˈtl ocslal nxiˈ cykˈumen tyol Dios bix tisen kej nchi niman kej yol kˈoˈn tey tuˈn Dios. Nuk oˈcx nimsanwe Dios―tz̈i ángel weya.

10 Bix e tzaj tkbaˈntl ángel weya:

―Miˈn cub tewena ja uˈja lu jaaˈ ma cub ttzˈiˈbena tyol Dios, cuma tzul tyem tuˈn tjapan baj cykilcaj ma cub ttzˈiˈbena. 11 Bix oj tjapan baj cykilcaj, kej xjal aj il, tuˈn cyten aj il. Bix kej xjal tzˈil, tuˈn cyten tzˈilx. Pero kej xjal jiquen, tuˈn cybinchante jtzˈaklxix. Bix kej xjal sakxix, tuˈn cyajben oˈcx te Dios―tz̈i ángel weya.

12 Ma txiˈ tkbaˈn Cristo cyjulu: “Jeyˈ, chin ul meltzˈaj naja. Bix tzul wiiˈna chojbil te teeylex juun laˈ alcyej xbint tuˈn. 13 Inayena tuj tneel bix mancˈbil, t‑xeeˈ tneel bix bajsbil, tisen kej letra A bix Z. 14 At t‑xtalbil Dios cyibaj kej xjal n‑el cytxjoˈn tiˈj cyxbalen, tuˈntzen at cyoclen tiˈj twitzj tzeeˈ te chunkˈlal te junx maj, bix tuˈn cyocx ttzi pwertel te tnom. 15 Pero kej xjal at tzˈil cyiˈj, ke chmambaj, ke aj pajlel, ke byol xjal, kej nchi suuken t‑xeeˈ tken sant, bix cykilca xjal cyaj tuˈn cyẍtakˈen, mintiiˈ cyoclen tuˈn cyocx tuj tnom. 16 Inayena, Jesús, ma tzaj nsmaˈna n‑ángela tuˈn ttzaj tkˈumen cyey ocslal cykilcaj lu tiˈj ti pjel. Inayena tcwal jrey David, jcheˈw njawen te skixa ntxakakan,” tz̈i Cristo.

17 Tzin tkbaˈn Espíritu Santo tuyax cykilca ocslal, jt‑xuˈl Jtal Carnel, cyej xjal yaaˈn ocslal: “Cytzaja.” Bix kej xjal n‑oc cybiˈn ja yol lu, chi tzajxit. Chi tzajxit kej xjal at cyajbil tuˈn cycˈan j‑aˈ te chunkˈlal te junx maj. Chi cˈanxit. Mintiiˈ twiˈ.

18 Cxeˈl nkbaˈna cyej xjal nxiˈ cybiˈn kej tyol Dios ma cub ntzˈiˈbena tuj ja uˈj lu, ka at jun xjal ma tzˈoc kˈoˈn mi nuk juntl yol tibaj jyol tzˈiˈben tuj ja uˈja, ctzaal tkˈoˈn Dios te kej xitbil tzˈiˈben tuj ja uˈj lu. 19 Bix ka at jun xjal ma tzˈel kˈinte mi nuk jun tyol Dios tzˈiˈben tuj ja uˈj lu, qˈueleltzen tiiˈn Dios toclen tiˈj jtzeeˈ te chunkˈlal te junx maj, bix mintiiˈtl toclen tuˈn tocx tuj nintzaj tnom xjan.

20 Jxjal ma tzaj tkˈoˈn kej yol tzˈiˈben tuj ja uˈj lu, ja Jesús, tzin tkbaˈn: “Chin ul meltzˈaj naja.” Juˈxit ttena. Ctzaja, Kaaw Jesús.

21 Tenxittzen t‑xtalbil Kaaw Jesucristo tibaj cykilcakey. Oˈcx nyolja.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes