2 Samuẹli 22:2-51

Bíbélì Mímọ́ Yorùbá Òde Òn

⁴ “Èmi ké pe Olúwa, tí ó yẹ láti máa yìn,
    ó sì gbà mí lọ́wọ́ àwọn ọ̀tá mi.
⁵ Nígbà tí ìbìlù ìrora ikú yí mi káàkiri;
    tí àwọn ìṣàn ènìyàn búburú dẹ́rùbà mí.
⁶ Ọ̀já isà òkú yí mi káàkiri;
    ìkẹ́kùn ikú dojúkọ mí.

⁷ “Nínú ìpọ́njú mi, èmi ké pé Olúwa,
    èmi sì gbé ohùn mi sókè sí Ọlọ́run mi.
Ó sí gbóhùn mi láti tẹmpili rẹ̀
    igbe mí wọ etí rẹ̀.
⁸ Ilẹ̀ sì mì, ó sì wárìrì;
    ìpìlẹ̀ ọ̀run wárìrì,
    ó sì mì, nítorí tí ó bínú.
⁹ Èéfín ti ihò imú rẹ̀ jáde wá;
    Iná ajónirun ti ẹnu rẹ̀ jáde wá,
    ẹ̀yin iná bú jáde láti inú rẹ̀.
¹⁰ Ó tẹ orí ọ̀run ba pẹ̀lú, ó sì sọ̀kalẹ̀;
    òkùnkùn biribiri sì ń bẹ ní àtẹ́lẹsẹ̀ rẹ̀.
¹¹ Ó sì gun orí kérúbù, ó sì fò:
    a sì rí i lórí ìyẹ́ afẹ́fẹ́.
¹² Ó sì fi òkùnkùn ṣe ibùjókòó yí ara rẹ̀, àti àgbájọ omi,
    àní ìṣúdudu ìkùùkuu àwọ̀ sánmọ̀.
¹³ Nípasẹ̀ ìmọ́lẹ̀ iwájú rẹ̀
    ẹ̀yín iná ràn.
¹⁴ Olúwa sán àrá láti ọ̀run wá,
    Ọ̀gá-ògo jùlọ sì fọhùn rẹ̀.
¹⁵ Ó sì ta ọfà, ó sì tú wọn ká;
    ó kọ mànàmànà, ó sì ṣẹ́ wọn.
¹⁶ Ìṣàn ibú Òkun sì fi ara hàn,
    ìpìlẹ̀ ayé fi ara hàn,
nípa ìbáwí Olúwa,
    nípa fífún èémí ihò imú rẹ̀.

¹⁷ “Ó ránṣẹ́ láti òkè wá, ó mú mi;
    ó fà mí jáde láti inú omi ńlá wá.
¹⁸ Ó gbà mí lọ́wọ́ ọ̀tá mi alágbára,
    lọ́wọ́ àwọn tí ó kórìíra mi: nítorí pé wọ́n lágbára jù mí lọ.
¹⁹ Wọ́n wá láti borí mi lọ́jọ́ ìpọ́njú mi:
    ṣùgbọ́n Olúwa ni aláfẹ̀yìntì mi.
²⁰ Ó sì mú mi wá sí ààyè ńlá:
    ó gbà mi, nítorí tí inú rẹ̀ dún sí mi.

²¹ “Olúwa sán án fún mi gẹ́gẹ́ bí òdodo mi;
    ó sì san án fún mi gẹ́gẹ́ bí mímọ́ ọwọ́ mi.
²² Nítorí pé èmi pa ọ̀nà Olúwa mọ́,
    èmi kò sì fi ìwà búburú yapa kúrò lọ́dọ̀ Ọlọ́run mi.
²³ Nítorí pé gbogbo ìdájọ́ rẹ̀ ni ó wà níwájú mi;
    àti ní ti òfin rẹ̀, èmi kò sì yapa kúrò nínú wọn.
²⁴ Èmi sì wà nínú ìwà títọ́ sí í,
    èmi sì pa ara mi mọ́ kúrò nínú ẹ̀ṣẹ̀ mi.
²⁵ Olúwa sì san fún mi gẹ́gẹ́ bí òdodo mi,
    gẹ́gẹ́ bí ìwà mímọ́ mi níwájú rẹ̀.

²⁶ “Fún aláàánú ni ìwọ ó fi ara rẹ̀ hàn ni aláàánú,
    àti fún ẹni ìdúró ṣinṣin ní òdodo ni ìwọ ó fi ara rẹ hàn ní ìdúró ṣinṣin ní òdodo.
²⁷ Fún onínú funfun ni ìwọ fi ara rẹ hàn ní funfun;
    àti fún ẹni wíwọ́ ni ìwọ ó fi ara rẹ hàn ní wíwọ́.
²⁸ Àwọn ènìyàn tí ó wà nínú ìyà ni ìwọ ó sì gbàlà;
    ṣùgbọ́n ojú rẹ wà lára àwọn agbéraga, láti rẹ̀ wọ́n sílẹ̀.
²⁹ Nítorí ìwọ ni ìmọ́lẹ̀ mi, Olúwa;
    Olúwa yóò sì sọ òkùnkùn mi di ìmọ́lẹ̀.
³⁰ Bẹ́ẹ̀ ni nítorí nípa rẹ̀ ni èmi ti la àárín ogun kọjá;
    nípa Ọlọ́run mi èmi ti fo odi kan.

³¹ “Ọlọ́run yìí, pípé ni ọ̀nà rẹ̀;
    ọ̀rọ̀ Olúwa ni a ti dánwò.
    Òun sì ni asà fún gbogbo àwọn tí ó gbẹ́kẹ̀lé e.
³² Nítorí ta ni Ọlọ́run, bí kò ṣe Olúwa?
    Ta ni àpáta, bí kò ṣe Ọlọ́run wa.
³³ Ọlọ́run alágbára ni ó fún mi ní agbára,
    ó sì sọ ọ̀nà mi di títọ́.
³⁴ Ó ṣe ẹsẹ̀ mi bí ẹsẹ̀ abo àgbọ̀nrín;
    ó sì mú mi dúró ní ibi gíga mi.
³⁵ Ó kọ́ ọwọ́ mi ní ogun jíjà;
    tó bẹ́ẹ̀ tí apá mi fa ọrun idẹ.
³⁶ Ìwọ sì ti fún mi ní asà
    ìgbàlà rẹ̀, ìrẹ̀lẹ̀ rẹ̀ sì ti sọ mí di ńlá.
³⁷ Ìwọ sì sọ ìtẹ̀lẹ̀ di ńlá ní abẹ́ mi;
    tó bẹ́ẹ̀ tí ẹsẹ̀ mi kò fi yọ̀.

³⁸ “Èmi ti lépa àwọn ọ̀tá mi, èmi sì ti run wọ́n,
    èmi kò pẹ̀yìndà títí èmi fi run wọ́n.
³⁹ Èmi ti pa wọ́n run, èmi sì ti fọ́ wọn,
    wọn kò sì le dìde mọ́: wọ́n ṣubú lábẹ́ mi.
⁴⁰ Ìwọ sì ti fi agbára dì mí ní àmùrè fún ìjà;
    àwọn tí ó ti dìde sí mi ni ìwọ sì ti tẹ̀ lórí ba fún mi.
⁴¹ Ìwọ sì mú àwọn ọ̀tá mi pẹ̀yìndà fún mi,
    èmi ó sì pa àwọn tí ó kórìíra mi run.
⁴² Wọ́n wò, ṣùgbọ́n kò sí ẹnìkan láti gbà wọ́n;
    wọ́n wo Olúwa, ṣùgbọ́n kò dá àwọn lóhùn.
⁴³ Nígbà náà ni èmi sì gún wọn wẹ́wẹ́ bí erùpẹ̀ ilẹ̀,
    èmi sì tẹ̀ wọ́n mọ́lẹ̀ bí ẹrẹ̀ ìta, èmi sì tẹ́ wọn gbọrọ.

⁴⁴ “Ìwọ sì gbà mí kúrò lọ́wọ́ ìjà àwọn ènìyàn mi,
    ìwọ pa mi mọ́ ki èmi lè ṣe olórí àwọn àjèjì orílẹ̀-èdè.
Àwọn ènìyàn tí èmi kò tí mọ̀ yóò máa sìn mí.
⁴⁵     Àwọn àjèjì wá láti tẹríba fún mi;
    bí wọ́n bá ti gbúròó mi, wọ́n á sì gbọ́ tèmi.
⁴⁶ Àyà yóò pá àwọn àlejò,
    wọ́n ó sì fi ìbẹ̀rù sá kúrò níbi kọ́lọ́fín wọn.

⁴⁷ “Olúwa ń bẹ́; olùbùkún sì ni àpáta mi!
    Gbígbéga sì ni Ọlọ́run àpáta ìgbàlà mi.
⁴⁸ Ọlọ́run ni ẹni tí ń gbẹ̀san mi,
    àti ẹni tí ń rẹ àwọn ènìyàn sílẹ̀ lábẹ́ mi.
⁴⁹     Àti ẹni tí ó gbà mí kúrò lọ́wọ́ àwọn ọ̀tá mi.
Ìwọ sì gbé mi sókè ju àwọn tí ó kórìíra mi lọ;
    ìwọ sì gbà mí kúrò lọ́wọ́ àwọn ọkùnrin oníwà ipá.
^50 (B)Nítorí náà èmi ó fi ọpẹ́ fún ọ, Olúwa,
    láàrín àwọn àjèjì orílẹ̀-èdè: èmi ó sì kọrin sí orúkọ rẹ.

⁵¹ “Òun ni ilé ìṣọ́ ìgbàlà fún ọba rẹ̀;
    ó sì fi àánú hàn fún ẹni ààmì òróró rẹ̀,
    fún Dafidi, àti fún irú-ọmọ rẹ̀ títí láéláé.”