A A A A A
Bible Book List

2 PEDRO 2Mam de Todos Santos Chuchumatán (MVJ)

Kej nchi xnakˈtzan ẍtakˈ yol kxol

Pero cyxol xjal te ootxa, yaaˈn nuk oˈcx e cypocba tyolel Dios jaxxix. Jax juˈx e ten kej xjal e xiˈ cykbaˈn ka tyolel Dioske, pero yaaˈn jax cyuˈn. Bix jax juˈx jaˈlewe, at xnakˈtzal ẍtakˈ cyxola. Chebe chebe tzin chi xnakˈtzan tuya cynaabl ẍbiˈlke pero ẍtakˈke bix te xitelke. Tzin cykbaˈn ka mintiiˈ cˈajbela jchojbil tuˈn Kaaw tuˈn kclet tiˈ kil. Juˈ tzunj, tzin cyjyoˈn tuˈn tcub castiwa cyibaj, bix chˈinnchˈe oj tcub. Nim xjal cyxola chi oquel lpe tiˈj cyyecˈbil, tuˈn tbint nuk jaj tajbil cyxumlal cyuˈn, bixsen chi yolel xjal yaaˈn baˈn tiˈj kocslabl jaxxix. Kej xnakˈtzal ẍtakˈ cyaj tuˈn tel cyiiˈn cypwaka, bix juˈ tzunj, tzin cyyajlaˈnkey tuya cyyol ẍtakˈ.

Pero jatxe ootxa e cub tnincˈuˈn Dios tuˈn tcub tkˈoˈn cycastiwa, bix chˈix tpon tumel tuˈn cyxiˈ tuj il. Jaxxix cwel tkˈoˈnxin cycastiwa, cuma jaxxix e xiˈ tkˈoˈnxin cycastiwa kej tsanjelxin tuj cyaˈj tej cybinchante il. E cuˈtz t‑xooˈnxin ejeeˈ maa tuj jun lugar klolj Tártaro tbi, te cˈuˈlcye joocˈtzen nchi ayon jkˈij tuˈn cyocx tuj kˈakˈ te junx maj. Jax juˈx e tzaj tkˈoˈn Dios cycastiwa kej xjal e ten jatxe ootxa. Tej tcub tmaksiˈnxin entera twitz txˈotxˈ tuya aˈ, e cub baj cykilca xjal aj il. Oˈcx tej xin tyolel Dios jiquen, Noé, tuya wuuktl ke te tjaxin, e clet tuˈn Dios. Jax juˈx e tzaj tkˈoˈn Dios cycastiwa kej aj Sodoma bix kej aj Gomorra. E cuˈtz kˈakˈ cyibaj, biˈx e cub tzaˈjex kej caˈba tnom lu, tuˈn cyajben te jun yecˈbil te cyej xjal cycyˈi Dios te mas yaj. Pero e clet jxin Lot tuˈn Dios twitz kˈakˈ. Jiquenxix te Lot, bix e tzaj nim tbisxin tuˈn tlaj cybinchben xinak kaˈxsen tej cyoc ipan cyiˈj xinakxtl. Najl Lot cyxol xjal lu, bix cykil kˈij, tej toc tcyeˈyenxin cybinchben kaˈ bix tej tbintexin, ocxsen nim bis tuj tanemxin, cuma baˈn xjalxin bix jiquenxsen tnaablxin.

Katzen o bint tuˈn Dios tuˈn e cub tkˈoˈn cycastiwa aj il te nejl, bix ka o tcoˈpan ttanem tuj cykˈab binchal il, jaxsen juˈx cbinel tuˈnxin jaˈlewe tuˈn miˈn chi cub tzˈaka tuj j‑il cyaj xnakˈtzal ẍtakˈ tuˈn tbint cyuˈna, bix at tipemalxin tuˈn tcub ttzyuˈnxin ejeeˈ ojxe tpon tumel tuˈn cyxiˈ tuj kˈakˈ te junx maj. 10 Bix mas ctzaal tkˈoj Dios cyiˈ kej xjal ncheˈx lpe nuk tiˈj tajbil cyxumlal bix kej xjal n‑el cyiiqˈuen ley. Kej xnakˈtzal lu, mintiiˈ ttz̈i cyiˈj, bix iyˈnen tibaj cynaabl. Mintiiˈ chˈin ttz̈i cyiˈj tuˈn cyxmucchan cyiˈj ke jawnex cawel. 11 Pero ke tsanjel Dios tuj cyaˈj, amale atet mas cyipemal bix mas cyoclen cywitz xnakˈtzal, pero min chi yolen kaˈ cyiˈj xnakˈtzal ẍtakˈ twitz Dios.

12 Pero kej xnakˈtzal ẍtakˈ lu, tisen jilke nchi itzˈj nuk tuˈn cytzyet bix tuˈn cycyim. Min chi ximan tiˈj, sino nuk ncheˈx lpe tiˈj alcye tzin tkbaˈn cyxumlal. Nchi yolen xnakˈtzal kaˈ tiˈj jmin tzˈel cyniyˈ tiˈj, pero tisen nchi cub byet ke jil cyuˈn xjal, juˈxsen chi xeˈl xnakˈtzal tuj castiwa tuˈn Dios. 13 Tuj cywitz, chi camal tuˈnj cybinchben, pero cxeˈl tzˈak cycotz nchi ayon tiˈj. Yaaˈn nuk te koniyan, sino jax juˈx te kˈij ncheˈx lpe tiˈj nuk tikˈch taj cyxumlal. Ejeeˈ tzunja tisen jun tzˈil tiˈ xbalen sakxix, cuma oj nchi chmet cyuyey te iyˈsalte santa cena, nuk oˈcx cyaj tiˈj tuˈn cynoj. 14 Oj n‑oc cycyeˈyen ke xuuj, nuk nchi kˈaˈbec tuˈn tbint pajlel cyuˈn. Min tzˈel cygana tuˈn cybinchan il cyuya xuuj. Ncub cyiˈ kej ocslal yaaˈn cyiw tuj cyocslabl cyuˈn tuˈn cybinchante jyaaˈn baˈn cyuya. Ma nakˈet cyanem nuk tuˈn toc cykˈaˈben nuk tikˈch cye cyuyey. Cwel tkˈoˈn castiwa Dios cyibaj. 15 Ma cyaj cycyeˈyen jbe jiquen, bix ma chi tzpet. Ma chi oc lpe tiˈj tyecˈbil jxin tyolel Dios Balaam, tcwal Beor. Tuˈn tcambilxin pwak, e tajbe Balaam tuˈn tcyaj tsbuˈn ttanem Dios. 16 Pero cuma e tajbe Balaam tuˈn tbinchan il, at jun oc ilente jaxin. Oc ilet‑xin tuˈn tburxin mixbe yolen. E yolenjil tisen jun xjal, tuˈn miˈn tzˈoc taawjil te jun yuwin xjal.

17 Kej xnakˈtzal ẍtakˈ lu tisen jun twiˈ aˈ mintiiˈ aˈ tzin tkˈoˈn bix tisen jun muj kˈiˈn tuˈn cykˈiˈk pero mintiiˈ jbal tzin tkˈoˈn, cuma mintiiˈ cynaabl n‑etz oj nchi yolen. At jun jawnex klolj nayon cyiˈj. 18 Nchi yolen tuya jawnex cyyol pero mintiiˈ cynaabl tiˈj, tuˈntzen tcub cyiˈ ocslal cyuˈn tuˈn cyxiˈ lpe tiˈj nuk tikˈch kaˈ taj cyxumlal. Bix mas n‑oc cyipen tiˈj tuˈn tcub cyiˈ kej ocslal cyuˈn, ejeeˈx o chi etz ok cyxol kej tzpetsal xjal pero yaaˈn cyiwke tuj cyocslabl. 19 Tzin cykbaˈn mintiiˈ il tiˈj tuˈn cyten xjal tjakˈ tley Dios, cuma at tzakpibl tuˈn tbint nuk tikˈch taj kxumlal. Pero tuˈnj lu n‑el cyiiqˈuen tcawbil Dios. Eteˈcxsen tjakˈ tcawbil cyxumlal, cuma ka cykˈon cyiib tuya alcye taj cyxumlal, jatzen cyaawa. 20 Nejl, el tzakpetke tiˈj kaˈ at twitz txˈotxˈ tuˈnj cytzkiˈn Clol ke, Kaaw Jesucristo, pero jaˈlewe ma chi cub tzˈak juntl maj tuˈnj il bix ma chi ocx tjakˈ tcawbil. Juˈ tzunj, masxsen tuj il eteˈ twitz nejl. 21 Masxsetle baˈn te cye nuket min e xiˈ cyiiˈn be jiquen twitzj tuˈn tcyaj cycyeˈyen xjan tley Dios tiˈj colbil e tzaj kˈoˈn te cye. 22 Jma bint cyuˈn tisenj nbyan tiˈ jun yol nkbaj cyxol xjal. Tzin tkbaˈn cyjulu: “Ke txyan nchi aj meltzˈaj loˈlte cyxaˈb.” Bix at juntl yol tzin tkbaˈn cyjulu: “Ke boch oj nbaj txjet cyiˈj, ncheˈx juntl maj tuj xookˈl,” tz̈i yol. Juˈtzen e baj cyej xin xnakˈtzal ẍtakˈ aj meltzˈajkexin tjakˈ tcawbil taj cyxumlal.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes