I Regum 17:1-6

Biblia Sacra Vulgata

17 Et dixit Elias Thesbites de habitatoribus Galaad ad Achab: Vivit Dominus Deus Israel, in cujus conspectu sto, si erit annis his ros et pluvia, nisi juxta oris mei verba.

² Et factum est verbum Domini ad eum, dicens:

³ Recede hinc, et vade contra orientem, et abscondere in torrente Carith, qui est contra Jordanem,

⁴ et ibi de torrente bibes: corvisque praecepi ut pascant te ibi.

⁵ Abiit ergo, et fecit juxta verbum Domini: cumque abiisset, sedit in torrente Carith, qui est contra Jordanem.

⁶ Corvi quoque deferebant ei panem et carnes mane, similiter panem et carnes vesperi, et bibebat de torrente.