A A A A A
Bible Book List

1 PEDRO 5Mam de Todos Santos Chuchumatán (MVJ)

Tej t‑xiˈ tkˈoˈn Pedro cynaabl kej nejenel cyxol ocslal

Key nejenel cyxola, jax juˈx weya jun nejenel cyxol ocslal kena cyuyey. Oc ncyeˈyena tej tiyˈx qˈuixcˈaj tuˈn Cristo. Bix jaan kena cyuyena cwiikˈela jun jawnex nchunkˈlala oj tyeecˈan tiib Cristo. Juˈ tzunj, nxiˈ nkˈoˈna consejo cyey. Tisen jun cylel ncˈojlaˈn ke tcarnel tuˈn, cycˈojlanxa ke ocslal ma cyaj tkˈoˈn Dios tuj cycwenta. Miˈn chi cawena cyibaj cuma ja cyaakˈena, sino tuˈnxix cykil cyanema, bix yaaˈn nuk tuˈn cycamana twiˈ cycˈuˈja, sino tuya cykil cycˈuˈja. Bix miˈn tzˈoc cykˈon cyiiba nuk tuˈn cyoca te cawel cyibaj kej ocslal eteˈ tuj cycwenta. Mas baˈn tuˈn cyoca te jun yecˈbil baˈn, tuˈn cyoc lpe ocslal cyiˈja. Ojtzen tul meltzˈaj Nejenel cye cylel, ccyiikˈela jun cycotza jawnex mintiiˈ tbajlel.

Yaltzen key xinak cwalx, cxeˈl cyyeecˈana cynimbila cye nejenel tuj tja Dios. Bix cykilca key, chi oca maans cyxolxa, cuma at tkˈoj Dios cyiˈ kej xjal nuk nbaj cyniman cyiib, pero kej xjal n‑oc cykˈon cyiib te chˈin, tzin tkˈoˈn Dios t‑xtalbil cye. Juˈ tzunj, cˈoquel cykˈon cyiiba te chˈin twitz jawnex Dios te nim tipemal, tuˈntzen ttzaj tkˈoˈn cyey tuˈn cyoca te nim oj tpon tumel. Bix cykilca najkelen cycˈuˈja tiˈj, cykˈonxa tuj tcwent Dios, cuma tzin cˈojlan Dios cyiˈja.

Cytzyun cyiiba twitz il, bix cycˈojlanx cyiiba, cuma nkˈojl taaw il cyiˈja, bix tisen n‑oc lpe jun león tiˈj jun masat tuˈn t‑xiˈ tchyoˈn, jax juˈxa n‑oc tipen taaw il tiˈj ti tten tuˈn cytzyeta tuˈn tuj tkˈab. Pero chi weˈxixa twitz, bix chi tena cyiw tuj cyocslabla, cuma cytzkiˈna cykilcatl ocslal twitz txˈotxˈ niyˈx qˈuixcˈaj cyuˈn tisen niyˈx cyuˈna. 10 Cybajlenxittzen yaaˈna cab kˈij, ctzˈaksaltzen Dios cyey, bix cjawel twaˈbaxin ejeeˈy, bix kˈolte cyipemala, bix cyiwsalte cyey, jax Dios ntzaj kˈonte cykil xtalbil, bix ma ttxoc ejooˈ tuˈn kten tuya te junx maj tuj jawnex tcawbil tuˈn Jesucristo. 11 ¡Jawxit nimset tbi Dios, bix tuˈn tcawen tibaj cykilca te junx maj! Juˈxit tzuna.

Mancˈbil yol cye ocslal

12 Cxeˈl tiiˈn jxin Silvano ja uˈj lu cyey, cuma n‑oc kexix ncˈuˈja tiˈjxin. Tuˈnj ja caˈba oxe yol lu ma txiˈ ntzˈiˈbena cyey, cutz̈it cywix cyocslabla tuˈn, bix tuˈn miˈn cyaj cycyeˈyena jaxxix yol tiˈj t‑xtalbil Dios. 13 Kej ocslal tzalu tuj Babilonia, junx eteˈ cyuyey tuj cyocslabla, bix nxiˈ cykˈoˈn jun cykˈolbebl te cyey. Jax juˈx ncwala Marcos, nxiˈ tkˈoˈn tkˈolbebl te cyey. 14 Jax juˈx cyey cyxola, cykˈolben cyiiba tuya tkˈakˈbil cycˈuˈja cyel cyiiba. Chi tenxita tuj ttz̈yal, ejeeˈy at cyocslabla tiˈ Cristo.

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes