10 Breeda, ekj wel nich daut jie em Diestre sele senne daut onnse Fodasch aule unja dee Wolkj weare, en aule derchem Maea jinje,

² en aule weare opp Mooses jetauft enne Wolkj uk em Maea,

³ en aule aute daut naemeljet jeistlichet Aete,

⁴ en drunke aule daut naemeljet jeistlichet Drunk; dan see drunke fonn daen jeistliche Steen dee met an kjeem, en dee Steen wea Christus.

⁵ Oba met de measchte fonn daen wea Gott onntofraed; dan dee weare enne Wiltness festreit en kjeeme omm.

⁶ Nu weare dise Dinj fa onns en Faeabilt, daut wie nich sulle no dee beese Dinj losste so aus jane deede.

⁷ Siet uk nich Jetse deene so aus walkje fonn jane weare; so ausset jeschraewe steit: "Daut Follkj sad sikj dol to aete en drinkje, en stunt opp to spaele".

⁸ En wel wie uk nich Huararie driewe so aus walkje fonn jane Huararie dreewe, en enn een Dach dree-entweentich Dusant folle.

⁹ En wel wie daem Herr uk nich em Groote feseakje, so aus walkje fonn jane deede, en worde derch Schlange ommjebrocht.

¹⁰ Wel wie uk nich murre so aus walkje fonn jane murrde, en worde fenicht derch daem dee fenichte deit.

¹¹ Aul dit pasead aun jane, en es fa onnse Femoninj jeschraewe, fa onns, dee wie enne latste Tiet laewe.

¹² Doaromm, lot daem, dee denkt daut hee fauststeit, oppause daut hee nich felt.

¹³ Doa es noch kjeene Fesaekjunk aewa junt jekome buta soont waut aulemaun bekaunt es: oba Gott es Tru, en woat nich toolote daut jie sulle em jratre fesocht woare aus jie fedroage kjenne; en woat met dee Feseakjunk en Wach moake so daut jie doa rut woare kome kjenne, soo daut jie daut fedroage kjenne.

¹⁴ Doaromm, miene Leefste, rant wach fonn Jetsedeenst!

¹⁵ Ekj raed to faeasechtje Mensche: recht waut ekj saj.

¹⁶ Daut jesaeajendet Owentsmolsglaus daut wie saeajne, jeft onns daut nich dee Jemeenschofft aun Christus sien Bloot? Daut Broot daut wie braeakje, es daut nich en Jemeenschoft met Christus sien Lief?

¹⁷ Wiel daut een Broot es, se wie, dee fael sent, een Lief, dan wie naeme aule deel aun daut een Broot.

¹⁸ Kjikjt no Iesrael nom Fleesch; ha nich dee, dee dee Opfa aete en Aundeel aum Aultoa?

¹⁹ Aulso waut saj ekj hia? daut en Jetsaopfa irjent waut es? oda daut en Jetse irjent waut es?

²⁰ Oba waut see opfre, opfre see to Beese Jeiste, en nich to Gott; en ekj wel nich daut jie aundeel sele ha aun Beese Jeiste.

²¹ Jie kjenne nich daem Herr sien Owentsmolglaus drinkje, en uk dee Beese Jeiste aea Glaus; jie kjenne nich aun daem Herr sien Desch deel naeme, uk dee Beese Jeiste aea Desch.

²² Oda moak wie daem Herr aufjenstich? Es hee nich stoaka aus wie sent?

²³ Aules es mie erlaubt, oba daut deent nich aules tom Goode; Aules es mie erlaubt, oba nich aules deit oppbuhe.

²⁴ Kjeena sull daut sienje seakje, oba daut waut fa daen Naekjsta tom Goode es.

²⁵ Aet wautemma enne Fleeschmoakjte fekofft woat, en unjaseakjt nusscht waeajen daut Jewesse.

²⁶ Dan de Ead en aules waut doabenne es jeheat daem Herr.

²⁷ Wan ju waea fonn dee Onnjleewende enlode deit, en jie gone welle, aet wautemma fer junt jesat woat, en froagt nusscht omm Jewesse haulwe.

²⁸ Oba wan waea sajcht: "Dit es Jetseopfa", dan aet daut nich omm daem sien haulwe dee daut aunwees, en omm Jewesse haulwe;

²⁹ Jewesse, saj ekj, nich jun eajnet, oba janem sient. Dan wuaromm sull miene Frieheit fonn en aundrem sien Jewesse jerecht woare?

³⁰ Wan ekj derch Jnod aundeel naem, wuaromm woat fonn mie dan Beeset jeraet aewa daut fa waut ekj jedankt hab?

³¹ Auf jie dan aete oda drinkje, oda wautemma jie doone, doot aules to Gott siene Ea.

³² Siet oone Aunstoos to beides de Jude en de Jrieche, uk Gott siene Jemeent:

³³ soo aus ekj aulamaun tom Jefaule laew, en seakj nich mien eajnet Jenotte, oba daut Jenotte fa faele, so daut dee muchte jerat woare.