Amos 1:3-2

Magandang Balita Biblia

³ Ganito^(A) ang sabi ni Yahweh:
“Paulit-ulit na nagkasala ang mga taga-Damasco,
    kaya sila'y paparusahan ko.
Pinagmalupitan nila ang Gilead,
    dinurog nila ito sa giikang bakal.
⁴ Susunugin ko ang palasyo ni Hazael,
    at tutupukin ko ang mga tanggulan ni Ben-hadad.
⁵ Wawasakin ko ang pintuan ng Lunsod ng Damasco;
    pupuksain ko ang mga taga libis ng Aven,
pati ang may hawak ng setro sa Beth-eden;
    ang mga taga-Siria naman ay dadalhing-bihag sa Kir.”

⁶ Ganito^(B) ang sabi ni Yahweh:
“Paulit-ulit na nagkasala ang mga taga-Gaza,
    kaya sila'y paparusahan ko.
Binihag nila ang isang bansa
    at ipinagbili sa mga taga-Edom.
⁷ Susunugin ko ang mga pader ng Gaza;
    tutupukin ko ang mga tanggulan doon.
⁸ Aalisin ko ang mga pinuno ng Asdod,
    at ang may hawak ng setro sa Ashkelon.
Hahanapin ko ang Ekron,
    at lilipulin ko ang mga Filisteo roon.”

⁹ Ganito^(C) ang sabi ni Yahweh:
“Paulit-ulit na nagkasala ang mga taga-Tiro,
    kaya sila'y paparusahan ko.
Ipinagbili nila sa Edom ang libu-libo nilang bihag;
    sinisira nila ang kasunduan ng pagkakapatiran.
¹⁰ Susunugin ko ang mga pader ng Tiro;
    tutupukin ko ang mga palasyo roon.”

¹¹ Ganito^(D) ang sabi ni Yahweh:
“Paulit-ulit na nagkasala ang mga taga-Edom,
    kaya sila'y paparusahan ko.
Hinabol nila ng tagâ ang mga kapatid nilang Israelita
    at hindi sila naawa kahit bahagya.
Hindi naglubag ang kanilang poot kailanman.
¹² Susunugin ko ang Teman,
    tutupukin ko naman ang mga tanggulan sa Bozra.”

¹³ Ganito^(E) ang sabi ni Yahweh:
“Paulit-ulit na nagkasala ang mga taga-Ammon,
    kaya sila'y paparusahan ko.
Sa labis nilang kasakiman sa lupain,
    nilaslas nila ang tiyan ng mga buntis sa Gilead.
¹⁴ Susunugin ko ang mga pader sa Rabba;
    tutupukin ko ang mga tanggulan doon.
Magsisigawan sila sa panahon ng labanan;
    mag-aalimpuyo ang labanan tulad ng isang bagyo.
¹⁵ Mabibihag ang kanilang hari,
    gayundin ang kanyang mga tauhan.”

2 Ganito^(F) ang sabi ni Yahweh:
“Paulit-ulit na nagkasala ang mga taga-Moab,
    kaya sila'y paparusahan ko.
Sinunog nila at pinulbos ang mga buto ng hari ng Edom.
² Susunugin ko ang lupain ng Moab;
    tutupukin ko ang mga tanggulan sa Keriot.
Masasawi ang mga taga-Moab sa gitna ng ingay ng labanan,
    sa sigawan ng mga kawal at tunog ng mga trumpeta.
³ Papatayin ko ang hari ng Moab,
    gayundin ang mga pinuno sa lupaing iyon.”