Tej tcub meltzˈaj tcyeˈnc Jesús

17  Eltzen wukak kˈij, bix e xiˈ tiiˈn Jesús ja Pedro, tuya Jacobo, bixse Juan twiˈ jun witz nim. Cyjunalxin e xiˈkexin. ² Cywitz tzunxin tej tcub meltzˈaj tcyeˈnc Jesús. E koptzˈaj twitz tisen tken kˈij, bix tzinxsen ntxakakan t‑xbalenxin. Otk tzˈoc sak tilbil t‑xbalen te junx maj. ³ Bix tujx naj ul jlet Moisés tuya Elías cywitzxin, bix e yolenkexin tuya Jesús. ⁴ Bix e xiˈ tkbaˈn Pedro te Jesús:

―Taat, ¡axsen tbanel etoˈ tzalu! Ka baˈn tuj twitza, cjaweltzen kbinchaˈna oxe niˈ pach, jun te tey, juntl te Moisés, bix juntl te Elías―tz̈i Pedro.

⁵ Mitknaˈx tbaj yolen Pedro tej tcub jun muj nkoptzˈaj, bix e cyaj bajkexin tuj muj. Bix jeyˈ, tuj muj etztzen jun yol. Tz̈i cyjulu:

―Jatzen xinj lu Ncwala n‑oc takˈ weya, bix nimxsen nchin tzalaja tiˈj. Kˈoˈnc cycˈuˈja tiˈ tyol―tz̈i Dios tuj muj.

⁶ Tej cybinte t‑xnakˈatzxin ja yol lu, biˈxsen e cub ttz̈i cyibaj, bix e cub mutzkˈajkexin twitz txˈotxˈ. ⁷ E tzajtzen lkˈe Jesús cytxlaj, bix oc tmocoˈnxin ejeeˈxin, bix e xiˈ tkbaˈnxin:

―Chi weyˈtzen, bix miˈn tzaj ttz̈i cyiˈja.

⁸ Tejtzen toc cycyeˈyenxin, ya min‑altl ke xjal e cyilxin, nuk oˈcx tjunal Jesús.

⁹ Cyajcatztzen meltzˈajkexin twiˈ witz, bix e xiˈ tkbaˈn Jesús cyexin:

―Miˈn txiˈ cykbaˈna te jun xjal ti jilel ma cyila, ojxe tjatz itzˈj tuj cyamecy jxjal Smaˈn tuˈn Dios tuˈn ntena cyxol xjal―tz̈ixin.

¹⁰ Bix e xiˈ cykanen t‑xnakˈatzxin texin:

―¿Tikentzenle nbyana cyuˈn txˈolbal ley ka il tiˈj tzul meltzˈaj jxin Elías twitz txˈotxˈ nejl twitzj xin Smaˈn tuˈn Dios?―tz̈i tzunkexin.

¹¹ Bix aj ttzakˈbeˈnxin cyexin:

―Jax cyuˈn txˈolbal ley nejl tzul meltzˈajte Elías te nincˈul xjal. ¹² Pero cxeˈlxixse nkbaˈna cyey, ya ma tzul Elías, pero min el cyniyˈ xjal tiˈjxin, bix juˈ tzunj e cub cybyoˈn jaxin. Bix juˈ pjel weya. Qˈuiyelx nim qˈuixcˈaj wuˈna cyuˈn xjal―tz̈ixin.

¹³ Bix el cyniyˈxin tiˈj e yolenxin tiˈj Juan Bautista.

Tej tel tiiˈn Jesús biman tiˈj junkˈa cwal

¹⁴ Tej tzunj cypon meltzˈajkexin jaaˈ eteˈj ke nimal xjal, ul junxin xjal tuya Jesús bix e cub maje twitzxin. Bix e xiˈ tkbaˈn texin:

¹⁵ ―Taat, kˈakˈentz tcˈuˈja tiˈj ncwala, cuma ntzaj tuj twiˈkˈa bix nim niyˈx qˈuixcˈaj tuˈnkˈa. Nim maj nxiˈ tzˈak tuj kˈakˈ bix tuj aˈ. ¹⁶ Xiˈ wiiˈna cyuya t‑xnakˈatza, pero mix xkˈanjakˈa cyuˈn―tz̈i tmankˈa otk tzˈoc biman tiˈjkˈa.

¹⁷ Bix e xiˈ tkbaˈn Jesús:

―¿Mimpatzen‑al xjal n‑oc ke cycˈuˈj wiˈja? ¿Cykilpakey min tzˈel cyniˈya tiˈj? ¿Jaaˈtzen taˈ cyocslabla? ¿Jteˈtltzen maj cxeˈl nyeecˈana wipemala tuˈntzen toc ke cycˈuˈja wiˈja? Cyiiˈntzna wuyena―tz̈i Jesús.

¹⁸ Bix oc cawenxin tiˈ biman, bix ex biman tex hora, bix e kˈanj neeˈ.

¹⁹ Yajcˈatltzen tej cycyajxin cyjunalxxin, e xiˈ cykanen t‑xnakˈatzxin texin:

―¿Tikentzen min xko xcyeya tuˈn tel klojoˈna biman?―tz̈ikexin.

²⁰ Bix aj ttzakˈbeˈnxin cyexin:

―Tuˈnj yaaˈn nimxix cyocslabla, mix s‑etza biman cyuˈna. Jaxxix cxeˈl nkbaˈna cyey, nuket tzˈoc ke cycˈuˈja tiˈ Dios, ikchetle juˈ chˈin cyocslabla tisen jun twitz mostaza, jacˈatzen txiˈ cykˈumena tej witz lu tuˈn tjaw kˈukpaj tuˈn t‑xiˈ maa chix, ctcuyate witz. Ka min ma baj cycˈuˈja, cykilca baˈn tbint tuˈn Dios cyey. ²¹ Pero tej jun wik biman lu mlay tzˈel ka mitkx nchi naˈney Dios bix ka mitkx ncwaˈ cypaˈna weyaj―tz̈i Jesús.

Tej tyole Jesús tiˈj tcyamecy

²² Bix iyˈkexin tuj departamento te Galilea, bix tej toc cychmon cyiibxin, e xiˈ tkbaˈn Jesús cye t‑xnakˈatzxin:

―Inayena, Jsmaˈn tuˈn Dios tuˈn ntena cyuya xjal, chin xeˈl kˈoˈna tuj cykˈab xjal. ²³ Chin byetela cyuˈn, bix chin jawetz itzˈja te toxen kˈij nbyetlenxitla―tz̈ixin. Bix nim e tzaj cybisxin tej cybintexin ja yol lu.

Jaj jun chojentj tuˈn tajben tuj tja Dios

²⁴ Tejtzen cyponxin tuj Capernaum, ul kej xin chmol chojentj te nin tja Dios tuya Pedro, bix e xiˈ cykanenxin texin:

―Yajtzen cyey Cyxnakˈtzal, ¿miˈmpale tzaj tkˈoˈnxin jchojbil tuˈn tajben tuj tja Dios?―tz̈ikexin.

²⁵ E xiˈ tkbaˈn Pedro:

―Tzin tkˈoˈnxin.

Tejtzen tocx Pedro tuj jaaˈ jaaˈ e ten Jesús, e tzaj yolen Jesús nejl te Pedro:

―¿Ti toc tuˈna, Pedro? Ke cawel at twitz txˈotxˈ, ¿te alej chojentj tzin cykanen? ¿Cyepale cycwalxin, bix ka cyej niyˈtl xjal?―tz̈i Jesús.

²⁶ Aj ttzakˈbeˈn Pedro:

―Min. Nuk cye cyej niyˈtl xjal n‑el cykanen.

Bix e xiˈ tkbaˈn Jesús:

―Juˈ tzunj, mintiiˈ il tiˈj tuˈn t‑xiˈ tkˈoˈn Tcwal Cawel twitz txˈotxˈ alcabala. ²⁷ Pero kcyˈi tuˈn koc ten cyakwusalte ke chmol chojentj. Juˈ tzunj, cutxa tey ttziiˈ tnijabel aˈ, bix xooˈnx tuj aˈ jun ganch te tzyul quis̈. Jtneel quis̈ ctzyetel tuˈna, jkonwa ttzijil. Cneteltzen jun pwak tuj ttzijil tuˈna. Kˈintza, bix kˈonxa cye chmol chojentj, tuˈntzen tchjet chojentj te weya bix te tey―tz̈i Jesús te Pedro.