Lazaromi huañushca

11 Betania aillu llajtapica, Lázaro shuti runami ungushca carca. Chaipimi Mariapish, paipaj ñaña Martandij causarca. ² (Ungushca Lazaropaj pani Mariami, Apunchij Jesustaca mishquijllata ashnajhuan chaquipi tallishpa, ajchahuan chaquichirca). ³ Paicunami: «Apunchij Jesús, Canhuan alli apanacuj, Can c'uyashca Lazaroca ungushcamari» nishpa, huillachun cacharcacuna.

⁴ Chaita huillajpica, Jesusca: «Cai ungüihuanca, mana huañungachu. Ashtahuanpish Taita Dios tucuita rurai tucuj cashcata ricuchinapajllami. Cai ungüimantami Diospaj Churi Ñucapish, tucuita rurai tucuj cashcata ricuchisha» nircami.

⁵ Jesusca Martatapish, paipaj ñañatapish, Lazarotapish c'uyarcami. ⁶ Lázaro ungushca cajta yachashpapish, ishqui punllahuan chaipi saquirircarajmi. ⁷ Chai q'uipami Jesusca, yachacujcunataca:

–Cutin Judeaman jacuchij– nirca.

⁸ Shina nijpi, Paipaj yachacujcunaca:

–Rabí, cainanijllamari judiocunaca Cantaca, rumihuan shitashun nircacuna. ¿Cutinchari chaimanca risha ninguiari?– nircacunami.

⁹ Chashna nijpipish, Jesusca:

–¡Illu punllaca, chunga ishqui horastami charin! Punllapi purijca, achij punllapi cashcamanta mana ñitcarinchu. ¹⁰ Ashtahuanpish tutapi purijca, quiquinllataj mana achijyachi tucushcamantaca, maipipish ñitcarinllami– nircami.

¹¹ Caitapishmi nirca:

–Ñucanchijhuan apanacuj Lazaroca dormicunmari, paita rijchachinamanmi rigrini– nirca.

¹² Chashna nijpi, Paipaj yachacujcunaca:

–Apunchij Jesús, Lazaroca dormicushpallaca alliyangallamari– nircacunami.

¹³ Jesusca, Lazarotaca ña huañushca cajpimi, chashnaca nirca. Ashtahuanpish paicunaca ‘Dormishpa samaricujllapimi, chashna nicunga’ yuyarcacunami. ¹⁴ Chaimantami Jesusca, cashna nishpa alli huillarca:

–Lazaroca huañushcami. ¹⁵ Ñuca mana chaipi cashcamanta cushicunimi. Pai huañushcaca, cancuna crichun allimari, paita ricunaman jacuchij– nircami.

¹⁶ Shina nijpica, ishqui huacharishca Tomasmi caishuj yachacujcunataca:

–Shinashpaca, ñucanchijpish Paihuan huañungapaj jacuchij– nircami.

Lazaropaj panitami Jesusca shunguta samachishca

¹⁷ Jesusca, Lazarota pambashca chuscu punllapimi chayarca. ¹⁸ Betaniaca, Jerusalenmantaca quimsa kilómetro shinallapimi carca. ¹⁹ Chaimantami Martatapish, Mariatapish turi huañushcamanta llaquilla cajpi, achca judiocuna ricunaman shamushca carca. ²⁰ Martaca, ‘Jesús shamucun’ nijta uyashpaca, tupanamanmi llujshirca. Ashtahuanpish Mariaca, huasipi saquirircallami.

²¹ Martami Jesustaca cashna nirca:

–Apunchij Jesús, Can caipi cashca cajpica, ñuca turica mana huañunmanchu carca. ²² Cunanpish Taita Diosta Can imata mañajpica, Taita Dios cuna cashcata yachanimi– nircami.

²³ Shina nijpi Jesusca:

–Cambaj turica causaringamari– nircami.

²⁴ Chashna nijpi Martaca:

–Tucuri punllapi, huañushcacuna causarina punllapi causarina cashcataca yachanitajmari– nircami.

²⁵ Shina nijpi Jesusca, cashnami nirca:

–Ñucamari causachijpish, causaita cujpish cani. Maijanpish Ñucata crijca, huañushca cashpapish causangami. ²⁶ Causacujcunaca maijanpish Ñucata crijca, huiñaita manataj huañungachu. ¿Chaitaca cringuichu?– nircami.

²⁷ Jesús chashna nijpica:

–Ari Apunchij Jesús, Cantaca Diospaj Churi, Quishpichij Cristo cai pachaman shamushcatami crini– nircami.

²⁸ Chashna nishca q'uipa Marta rishpaca, paipaj ñaña Mariataca:

–Yachachijmari caipi, canta cayacunmari– nishpa allijlla huillarca.

²⁹ Mariaca shina nijta uyashcahuanmi, jatarishpa Jesuspajman shamurca. ³⁰ Jesusca chai uchilla aillu llajtamanca manaraj chayashcachu carca. Marta Paihuan tupashcallapitajmi carca. ³¹ Ricunaman shamuj judiocunaca, María jatarishcahuan huasimanta llujshishpa rijta ricushpami, ‘Turita pambashca ñaupajpimari huacagringa’ ninacushpa, catishpa rircacuna.

³² María Jesuspajman chayashpaca, Paipaj ñaupajpi pambaman cumurishpami:

–Apunchij Jesús, Can caipi cashca cajpica, ñuca turica mana huañunmanchu carca– nirca.

³³ Chashna nishpa María huacacujpica, paita catishpa shamuj judiocunapish huacarcacunami. Chaita ricushpami Jesusca, Paipaj espiritupi nanarishpa anchata llaquirirca.

³⁴ Chashna llaquirishpaca:

–¿Maipitaj paitaca churarcanguichij?– nishpa tapujpimi:

–Apunchij Jesús, shamui ricungui– nircacuna.

³⁵ Ricugrishpaca, Jesusca huacarcami. ³⁶ Chaimantami judiocunaca:

–Riquichij, Lazarotaca yallitajmari c'uyashca– nircacuna.

³⁷ Paicunapuramanta maijancunaca:

–Paica mana ricujtapish ñahuita pascarcamari, Lázaro ama huañuchunca, ¿manachu imallatapish rurai tucunman carca, imashi?– nircacunami.

Jesusca Lazarota causachishcami

³⁸ Jesusca cutintaj anchata llaquirishpami, Lazarota churashca jutcuman c'uchuyarca. Chai jutcuca, quinriman allashpa, jatun rumihuan huichcashcami carca. ³⁹ Chaimantami Jesusca:

–Rumita anchuchichij– nirca.

Shina nijpimi, huañushcapaj pani Martaca:

–Apunchij Jesús, pambashcaca ñamari chuscu punlla tucun, ashnacungamari– nirca.

⁴⁰ Chashna nijpi Jesusca:

–¿“Can crishpaca, Taita Dios rurai tucushcata ricunguimi” nircanitaj shiná?– nircami.

⁴¹ Chashna nijpica, huañushcata churashca jutcuta huichcashca rumita anchuchircacunami. Chaipimi Jesusca, jahuata ricushpa cashna nirca:

–Yayalla, Can Ñucata uyashcamanta pagui ninimi. ⁴² Ñucata Can uyaracuj cashcataca yachanimi. Ashtahuanpish Ñuca muyundijpi caj tucui gentecuna, Can Ñucata cachashcata crichunllami chashnaca nini– nircami.

⁴³ Chashna nishca q'uipaca, sinchita caparishpami:

–¡Lázaro, chaimanta llujshimui!– nirca.

⁴⁴ Chashna nijpica chai huañushcaca maquicunatapish, chaquicunatapish maitushca, umatapish ñahuindij linsohuan ch'ungullishcami llujshimurca. Chashna cajpimi Jesusca:

–Purichun, maitushcata pascaichij– nirca.

Jesustaca huañuchingapajmi yuyarinacushca

⁴⁵ Chashna rurajta ricushpaca, Mariata ricunaman shamuj judiocunapuramanta achcacunami Jesusta crircacuna. ⁴⁶ Ashtahuanpish maijancunaca, fariseocunapajman rishpami Jesús imallata rurashcata huillarcacuna. ⁴⁷ Chaimantami pushaj curacunapish, fariseocunapish, tucui mandajcunapurata tandachishpa, cashna nircacuna:

–¿Imatataj rurashun? Chai runaca, señalcunatamari ruran. ⁴⁸ Chashna saquijllapica, tucuicunamari Paita cringacuna. Chashna tucujpica romanocuna shamushpaca, ñucanchij Diospaj huasitapish, tucui ñucanchij israelcunatapishmi chingachingacuna– nircacunami.

⁴⁹ Chashna nijpi paicunapuramanta chai huatapi mandacuj Caifás curami, cashna nirca:

–Cancunaca imatapish mana yachanguichijchu. ⁵⁰ Ñucanchij tucui israelcuna huañunapaj randica, shuj runalla ñucanchijpaj randi huañunamari ashtahuan alli. Chaitaca manamari entendinguichijchu– nircami.

⁵¹ Chaitaca, mana paipaj quiquin yuyaillamantachu nirca. Ashtahuanpish chai huatapi curacunata mandaj cura cashpa Diosllataj yuyachijpimi, tucui israelcunapaj randi Jesús huañunata, ñaupashpa huillarca. ⁵² Mana tucui israelcunallamantachu huañuna carca. Ashtahuanpish mai llajtapi causacujcuna cashpapish, Diospaj huahua cajcunaca shujlla tucuchunmi huañuna carca. ⁵³ Chashna ninacushca punllamantami, Jesustaca huañuchingapaj shuj yuyailla tucurcacuna.

⁵⁴ Chaimantami Jesusca, judiocunapurapica pacalla purirca. Shitashca pamba c'uchullapi caj Efraín puebloman rishpami, Paipaj yachacujcunandij chaipi purirca.

⁵⁵ Judiocunapaj Pascua punllacunapish ñami chayamucurca. Chuyayangapaj maillarinamanmi, achcacuna Pascua ñaupaman chai llajtamanta Jerusalenman huichiyarcacuna. ⁵⁶ Judiocunaca Jesusta mashcacushpami, Diospaj huasipica: «¿Imatataj yuyanguichij? ¿Cai fiestamanca shamungachu imashi?» nishpa, caishuj chaishuj tapunacurcacuna. ⁵⁷ Pushaj curacunapish, fariseocunapish Jesús maipi cashcata maijan yachashpaca, japigringapaj huillaj shamuchunmi ña mandashca carca.