-6-

23 Kung ikaw ay kasalo ng may mataas na katungkulan, huwag mong kalilimutan kung sino ang iyong kaharap. ² Kung ikaw man ay matakaw, pigilan mo ang iyong sarili. ³ Huwag mong nasain ang pagkain ng hari, baka iyon ay pain lang sa iyo.

-7-

⁴ Huwag mong pagurin ang sarili sa pagpapayaman; pag-aralan mong umiwas doon. ⁵ Sapagkat madaling mawala ang kayamanan, ito'y simbilis ng agila sa paglipad sa kalawakan.

-8-

⁶ Huwag kang makikikain sa taong kuripot, ni nanasain man ang masasarap niyang pagkain. ⁷ Sapagkat iyon ay maninikit sa iyong lalamunan. Aanyayahan ka nga niyang kumain at uminom, ngunit hindi bukal sa kalooban. ⁸ Isusuka mo rin ang lahat ng iyong kinain at masasayang lang ang maganda mong sasabihin.

-9-

⁹ Ingatan mo ang iyong dila sa harap ng mga mangmang, hindi nila mauunawaan kahit gaano kaganda ang sabihin mo.

-10-

¹⁰ Huwag mong babaguhin ang hangganang matagal nang nakalagay, ni sasakupin ang lupa ng mga ulila. ¹¹ Sapagkat ang Tagapagtanggol nila ay makapangyarihan, at siya ang iyong makakalaban.

-11-

¹² Huwag kang hihiwalay sa mabubuting aral, at pakinggan mong mabuti ang salita ng karunungan.

-12-

¹³ Disiplinahin mo ang bata. Ang wastong pagpalo ay hindi niya ikamamatay. ¹⁴ Inililigtas mo pa siya mula sa daigdig ng mga patay.

-13-

¹⁵ Anak, matutuwa ako kung magiging matalino ka. ¹⁶ Makadarama ako ng pagmamalaki kung ang mga salita mo ay may karunungan.

-14-

¹⁷ Huwag kang maiinggit sa mga makasalanan, sa halip, si Yahweh ay laging igalang at sundin. ¹⁸ Kung magkagayon ay gaganda ang iyong kinabukasan.

-15-

¹⁹ Anak, maging matalino ka at pag-isipan mong mabuti ang iyong buhay. ²⁰ Huwag kang makikisama sa mga lasenggo at sa masiba sa pagkain. ²¹ Pagkat sila'y masasadlak sa kahirapan, at darating ang panahong magdadamit ng basahan.

-16-

²² Pakinggan mo ang iyong ama na pinagkakautangan mo ng buhay, at huwag hahamakin ang iyong ina kapag siya'y matanda na.

²³ Hanapin mo ang katotohanan, karunungan at unawa. Pahalagahan mo ang mga ito at huwag pababayaang mawala.

²⁴ Ang ama ng taong matuwid ay puno ng kagalakan. Ipinagmamalaki ng ama ang anak na matalino.

²⁵ Sikapin mong ikaw ay maging karapat-dapat ipagmalaki ng iyong mga magulang at madudulutan mo ng kaligayahan ang iyong ina.

-17-

²⁶ Anak, makinig kang mabuti sa akin at tularan mo ang aking pamumuhay. ²⁷ Ang masasamang babae at di-tapat na asawa ay mapanganib na patibong, tiyak na mamamatay ang mahulog doon. ²⁸ Siya'y laging nakaabang tulad ng magnanakaw, at sinumang maakit niya ay natututong magtaksil.

-18-

²⁹ Sino ang may kalungkutan at may malaking panghihinayang? Sino ang may kaaway at kabalisahan? Sino ang nasusugatan nang di nalalaman? At sino ang may matang pinamumulahan? ³⁰ Sino pa kundi ang sugapa sa alak, at ang nagpapakalango sa masarap na inumin. ³¹ Huwag mong tutunggain ang matapang na alak kahit ito'y katakam-takam, ³² sapagkat kinaumagahan ay daig mo pa ang tinuklaw ng ahas na makamandag. ³³ Kung anu-ano ang iyong sasabihin, at hindi ka makapag-isip nang mabuti. ³⁴ Ang makakatulad mo'y nasa gitna ng dagat at hinahampas ng malalaking alon. Pasuray-suray kang maglalakad ³⁵ at sasabihin mo, “Ano sa akin kung ako'y mahandusay? Mabulagta man ako, ayos lang iyan! Pagbangon ko, iinom muli ako.”