Ang mga Anak ni Israel

2 Mao kini ang mga anak nga lalaki ni Israel: sila si Reuben, Simeon, Levi, Juda, Isacar, Zebulun, ² Dan, Jose, Benjamin, Naftali, Gad, ug Asher.

Ang mga Kaliwat ni Juda

³ May tulo ka anak si Juda sa iyang asawa nga si Batshua nga Canaanhon. Sila mao si Er, Onan, ug Shela. Si Er mao ang kamagulangan. Daotan siya atubangan sa Ginoo, busa gipatay siya sa Ginoo. ⁴ May mga anak pa si Juda kang Tamar nga iyang umagad. Sila mao si Perez ug si Zera. Lima tanan ang anak ni Juda nga lalaki. ⁵ Ang mga anak ni Perez mao sila si Hezron ug si Hamul. ⁶ Ang mga anak ni Zera mao sila si Zimri, Etan, Heman, Calcol, ug Darda.^[a] Lima silang tanan. ⁷ Ang anak ni Carmi mao si Acar.^[b] Kini si Acar nagdala ug kasamok sa Israel tungod sa wala niya pagtuman sa sugo bahin sa butang nga gihalad ngadto sa Dios. ⁸ Ang anak ni Etan mao si Azaria.

Ang Kagikan ni David

⁹ Ang mga anak ni Hezron mao sila si Jerameel, Ram, ug Caleb.^{[c] 10} Si Ram amahan ni Aminadab, ug si Aminadab amahan ni Nashon nga pangulo sa katawhan sa Juda. ¹¹ Si Nashon amahan ni Salmon,^[d] ug si Salmon amahan ni Boaz. ¹² Si Boaz amahan ni Obed, ug si Obed amahan ni Jesse. ¹³ Ang kamagulangan nga anak ni Jesse mao si Eliab, ang ikaduha mao si Abinadab, ang ikatulo mao si Shimea, ¹⁴ ang ikaupat mao si Netanel, ang ikalima mao si Radai, ¹⁵ ang ikaunom mao si Ozem, ug ang ikapito mao si David. ¹⁶ Ang ilang mga igsoon nga babaye mao sila si Zeruya ug si Abigail. Si Zeruya may tulo ka anak nga sila si Abishai, Joab, ug Asahel. ¹⁷ Ang bana ni Abigail mao si Jeter nga Ishmaelinhon ug may anak sila nga si Amasa.

Ang mga Kaliwat ni Hezron kang Caleb ug sa Uban pa Niyang mga Anak

¹⁸ Si Caleb nga anak ni Hezron may mga anak usab sa iyang asawa nga si Azuba nga ginganlan usab ug Jeriot.^[e] Sila mao si Jesher, Shobab, ug Ardon. ¹⁹ Pagkamatay ni Azuba gipangasawa ni Caleb si Efrat^[f] ug may anak sila nga si Hur. ²⁰ Si Hur amahan ni Uri, ug si Uri amahan ni Bezalel. ²¹ Sa dihang 60 na ka tuig ang edad ni Hezron, gipangasawa niya ang anak ni Makir, ang igsoon nga babaye ni Gilead. May anak sila nga si Segub. ²² Si Segub amahan ni Jair, nga nagdumala sa 23 ka lungsod sa Gilead. ²³ (Apan giilog ni Geshur ug ni Aram ang mga lungsod nga gidumalahan ni Jair ug ang Kenat, lakip ang 60 ka mga baryo sa palibot niini.) Silang tanan mao ang mga kaliwat ni Makir nga amahan ni Gilead.

²⁴ Bag-o pa lang namatay si Hezron didto sa Caleb Efrata sa dihang nanganak ang iyang asawa nga si Abia. Ang ilang anak mao si Ashur nga amahan ni Tekoa.

Ang mga Kaliwat ni Hezron kang Jerameel

²⁵ Mao kini sila ang mga anak ni Jerameel nga kamagulangang anak ni Hezron: si Ram ang kamagulangan, sunod si Buna, Oren, Ozem, ug Ahia. ²⁶ Si Jerameel may usa pa ka asawa nga ginganlag si Atara. Siya ang inahan ni Onam. ²⁷ Ang mga anak ni Ram nga kamagulangang anak ni Jerameel mao sila si Maaz, Jamin, ug Eker.

²⁸ Ang mga anak ni Onam mao sila si Shamai ug si Jada. Ang mga anak ni Shamai mao sila si Nadab ug si Abishur.

²⁹ Ang ngalan sa asawa ni Abishur mao si Abihail. May mga anak sila nga mao si Aban ug si Molid.

³⁰ Ang mga anak ni Nadab mao sila si Seled ug si Apaim. Namatay si Seled nga walay anak.

³¹ Ang anak ni Apaim mao si Ishi. Si Ishi amahan ni Sheshan, ug si Sheshan amahan ni Alai. ³² Ang mga anak ni Jada nga igsoon ni Shamai mao sila si Jeter ug si Jonatan. Namatay si Jeter nga walay anak. ³³ Ang mga anak ni Jonatan mao sila si Pelet ug si Zaza. Kini sila ang mga kaliwat ni Jerameel.

³⁴ Walay anak nga lalaki si Sheshan kondili mga babaye lang. May sulugoon siya nga Ehiptohanon nga ginganlag si Jarha. ³⁵ Gipaasawa ni Sheshan kang Jarha ang usa sa iyang mga anak nga babaye, ug nanganak kini kang Atai. ³⁶ Si Atai amahan ni Natan, si Natan amahan ni Zabad, ³⁷ ug si Zabad amahan ni Eflal. Si Eflal amahan ni Obed, ³⁸ si Obed amahan ni Jehu, ug si Jehu amahan ni Azaria. ³⁹ Si Azaria amahan ni Helez, si Helez amahan ni Eleasa, ⁴⁰ ug si Eleasa amahan ni Sismai. Si Sismai amahan ni Shalum, ⁴¹ si Shalum amahan ni Jekamia, ug si Jekamia amahan ni Elishama.

Ang Uban pang mga Kaliwat ni Caleb

⁴² Ang kamagulangang anak nga lalaki ni Caleb nga igsoon ni Jerameel mao si Mesha nga amahan ni Zif. Ang ikaduha niya nga anak mao si Maresha nga amahan ni Hebron. ⁴³ Ang mga anak ni Hebron mao sila si Kora, Tapua, Rekem, ug Shema. ⁴⁴ Si Shema amahan ni Raham, ug si Raham amahan ni Jorkeam. Si Rekem amahan ni Shamai, ⁴⁵ si Shamai amahan ni Maon, ug si Maon amahan ni Bet Zur.

⁴⁶ Si Efa, ang lain pa nga asawa ni Caleb, nanganak kanila ni Haran, Moza, ug Gazez. Si Haran may anak nga si Gazez usab ang ngalan.

⁴⁷ Ang mga anak ni Jahdai mao sila si Regem, Jotam, Geshan, Pelet, Efa, ug Shaaf.

⁴⁸ Ang usa pa gayod ka asawa ni Caleb mao si Maaca. May mga anak sila nga sila si Sheber, Tirhana, ⁴⁹ Shaaf (nga amahan ni Madmana), ug Sheva (nga amahan ni Macbena ug ni Gibea). Ang anak nga babaye ni Caleb mao si Acsa. ⁵⁰ Kini sila ang mga kaliwat ni Caleb.

Ang mga Kaliwat sa Anak ni Caleb nga si Hur

Si Hur ang kamagulangan nga anak ni Caleb ug ni Efrata. Ang mga anak ni Hur mao sila si Shobal nga amahan ni Kiriat Jearim, ⁵¹ si Salma nga amahan ni Betlehem, ug si Haref nga amahan ni Bet Gader. ⁵² Ang mga kaliwat ni Shobal nga amahan ni Kiriat Jearim mao ang mga katawhan sa Haroe, ang katunga sa mga lumulupyo sa Manuhot,^{[g] 53} ug ang mga kaliwat ni Kiriat Jearim nga mao ang mga Itrahanon, Puthanon, Shumatnon, ug Mishranon. Sila ang kagikan sa mga Zorahanon ug mga Eshtaolnon.

⁵⁴ Ang mga kaliwat ni Salma mao ang mga taga-Betlehem, ang mga Netofanon, ang mga taga-Atrot Bet Joab, ang katunga sa mga Manahatnon, ang mga Zorahanon, ⁵⁵ ug ang mga kaliwat sa mga eksperto sa pagsulat ug mga dokumento nga nagapuyo sa lungsod sa Jabez nga mao ang mga Tiratnon, Shimeatnon ug Sucatnon. Mao kini sila ang mga Kenihanon nga naggikan kang Hamat, nga amahan sa pamilya ni Recab.^[h]