நாகூம் 2

Tamil Bible: Easy-to-Read Version

³ அவ்வீரர்களின் கேடயங்கள் சிவந்திருக்கிறது.
    அவர்களின் சீருடைகள் பிரகாசமான சிவப்பாக உள்ளது.
அவர்களின் இரதங்கள் போருக்கு வரிசையாக உள்ளன,
    நெருப்பின் ஜூவாலையைப் போன்று மின்னுகின்றன.
    அவர்களின் குதிரைகள் போவதற்கு தயாராக உள்ளன.
⁴ அவர்களின் இரதங்கள் தெருக்களில் போட்டியிட்டு ஓடுகின்றன.
    தெருக்களின் இடது சாரியாகவும் வலதுசாரியாகவும் ஓடுகின்றன.
அவை எரியும் பந்தங்களைப் போன்றும்,
    அங்குமிங்கும் மின்னும் மின்னலைப் போலவும் காணப்படுகின்றன.

⁵ விரோதி தனது சிறந்த வீரர்களை அழைக்கிறான்.
    ஆனால் அவர்கள் மதிற்சுவரை நோக்கி ஓடி,
அங்குள்ள சுவர்களைத் தகர்க்கும் கருவியின்மேல்
    அவர்களின் கேடயத்தை நிறுவுகிறார்கள்.
⁶ ஆனால் ஆற்றின் மதகுகள் திறக்கப்படுகின்றன.
    எதிரிகள் அவ்வழியாக வந்து அரசனின் வீட்டை அழிக்கிறார்கள்.
⁷ பகைவர்கள் ராணியைப் பிடித்துச் செல்வார்கள்.
    அவளது அடிமைப்பெண்கள் புறாக்களைப் போன்று துக்கத்துடன் அழுவார்கள்.
    அவர்கள் தம் மார்பில் அடித்துக்கொண்டு தமது துக்கத்தைக் காட்டுவார்கள்.

⁸ நினிவே, தண்ணீர் வற்றிப்போன
    குளத்தைப்போன்று இருக்கிறது.
ஜனங்கள், “நிறுத்துங்கள்! ஓடுவதை நிறுத்துங்கள்!” என்று சொன்னார்கள்.
    ஆனால் அது பயன் தரவில்லை.

⁹ நினிவேயை அழிக்கப்போகும் வீரர்களாகிய நீங்கள், வெள்ளியை எடுங்கள்!
    தங்கத்தை எடுங்கள்!
அங்கே எடுப்பதற்கு ஏராளமாக உள்ளன.
    அங்கே ஏராளமான கருவூலங்கள் உள்ளன.
¹⁰ இப்பொழுது, நினிவே காலியாக இருக்கிறது.
    எல்லாம் திருடப்பட்டன.
    நகரம் அழிக்கப்பட்டது.
ஜனங்கள் தங்கள் தைரியத்தை இழந்தனர்.
    அவர்களது இதயங்கள் அச்சத்தால் உருகின.
அவர்களது முழங்கால்கள் ஒன்றோடொன்று இடித்துக்கொண்டன,
    அவர்களது உடல்கள் நடுங்குகின்றன, முகங்கள் அச்சத்தால் வெளுத்தன.

¹¹ இப்பொழுது சிங்கத்தின் குகை (நினிவே) எங்கே?
    ஆண்சிங்கமும் பெண்சிங்கமும் அங்கே வாழ்ந்தன.
    அவற்றின் குட்டிகள் அஞ்சவில்லை.
¹² சிங்கமானது (நினிவேயின் அரசன்) தனது குட்டிகளுக்கும் பெண்சிங்கத்திற்கும்
    உணவு கொடுப்பதற்காக ஏராளமான ஜனங்களைக் கொன்று அழித்தது.
அது தனது குகையை (நினிவே) ஆண்களின் உடல்களால் நிறைத்தது.
    அது தான் கொன்ற பெண்களின் உடல்களால் குகையை நிறைத்தது.

¹³ சர்வ வல்லமையுள்ள கர்த்தர் கூறுகிறார்:
    “நினிவே, நான் உனக்கு எதிராக இருக்கிறேன்.
நான் உனது இரதங்களை எரிப்பேன், உனது ‘இளஞ்சிங்கங்களைப்’ போரில் கொல்வேன்.
    நீ இந்த பூமியில் மீண்டும் எவரையும் வேட்டையாடமாட்டாய்.
    ஜனங்கள் உனது தூதுவர்களிடமிருந்து மீண்டும் கெட்ட செய்திகளைக் கேட்கமாட்டார்கள்.”