અયૂબ 18

Gujarati: પવિત્ર બાઈબલ

⁵ “હા, દુષ્ટ લોકોનું તેજ બહાર ચાલ્યું જશે.
    તેનો અગ્નિ બળતો બંધ થઇ જશે.
⁶ તેના પ્રકાશિત ઘરમાઁ અંધારૂ થશે.
    તેની પાસેનો દીવો હોલવાઇ જશે.
⁷ તેનાં મજબૂત પગલાં નબળાં પડી જશે.
    તેની અનિષ્ટ ઇચ્છાઓ તેને નીચે પાડશે.
⁸ તે ફાસલામાં ચાલે છે;
    તેના પગ એમાં ફસાઇ જાય છે.
⁹ ફાસલો તેના પગની પાની પકડી લે છે,
    એના પાશમાં તે જકડાઇ જાય છે.
¹⁰ જમીન પર જાળ સંતાઇને પડી હશે,
    તેનાં માર્ગમાં એ પાથરેલી હશે.
¹¹ એની ચારેકોર ભય તેની પર ત્રાટકવા ટાંપી રહ્યાં છે.
    દરેક પગલું તેની પાછળ તે ભરે છે.
¹² ભૂખથી તેનું બળ ક્ષીણ થઇ જશે.
    વિનાશ તેને નીચો પાડવાં રાહ જોઇને ઊભા હોય છે.
¹³ ભયંકર બિમારીઓ તેની ચામડીને કોરી ખાશે.
    એના હાથ, પગ કોહવાઇ જશે.
¹⁴ એ જે ઘરમાં નિરાંતે જીવે છે એમાંથી એને બહાર ખેંચી કાઢવામાં આવે છે
    અને એને ભયના રાજાની હાજરીમાં લાવવામાં આવશે.
¹⁵ જેઓ તેનાં નથી તેઓ તેના ઘરમાં વસશે;
    એના ઘર પર ગંધક છાંટવામાં આવે શે.
¹⁶ તેની નીચેથી મૂળીયાં સડી જાય છે,
    તેની ઉપરની ડાળીઓ સુકાઇ જાય છે. તેથી તે મૃત્યુ પામશે.
¹⁷ આ દુનિયામાં તેનું નામનિશાન રહેશે નહિ.
    એને કોઇ પણ યાદ કરશે નહિ.
¹⁸ પ્રકાશમાંથી તેને અંધકારમાં ધકેલી દેવામાં આવશે
    અને જગતમાંથી તેને હાંકી કાઢવામાં આવશે.
¹⁹ તેને કોઇ સંતાન કે પૌત્ર, પૌત્રીઓ હશે નહિ.
    તેના કુટુંબમાંથી કોઇ જીવતું નહિ રહે.
²⁰ પશ્ચિમના લોકો દિગમૂઢ થઇ જશે જ્યારે તેઓ સાંભળશે કે તે દુષ્ટ માણસને શું થયું.
    અને પૂર્વના લોકો ભયને કારણે તેમના વાળ ખેચી નાખશે.
²¹ દુષ્ટ લોકોના ઘરને ખરેખર આમ થશે,
    જેને દેવનું જ્ઞાન નથી તેની આવી જ દશા થશે.”