यिर्मयाह 16  Awadhi Bible: Easy-to-Read Version

बिनास क दिन

16 यहोवा क सँदेसा मोका मिला। ² “यिर्मयाह, तोहका बियाह नाहीं करइ चाही। तोहका इ ठउरे पइ बेटा या बिटिया नाहीं पइदा करइ चाही।”

³ यहूदा देस मँ जन्म लेइवाले बेटा-बिटियन क बारे मँ यहोवा इ कहत ह, अउर ओन बच्चन क बाप-महतारी क बारे मँ जउन यहोवा कहत ह, उ इ अहइ: ⁴ “उ सबइ लोग भयंकर मउत क सिकार होइहीं। ओन लोगन बरे कउनो रोई नाहीं। कउनो भी मनई ओनका दफनाइ नाहीं। ओनकर ल्हासन जमीन पइ गोबरे क नाई पड़ी रहिहीं। उ सबइ लोग दुस्मन क तरवार क घाट उतरिहीं या भूखन मरिहीं। ओनकर ल्हास अकासे क पंछियन अउर भुइँया क जंगली जनावरन क भोजन बनिहीं।”

⁵ एह बरे यहोवा कहत ह, “ओन घरन मँ न जा जहाँ लोग आखिरी क्रिया क्रम क दावत खात रहत हीं। हुवाँ रोवइ या आपन सोक परगट करइ जिन जा। इ सबइ सब काम जिन करा। काहेकि मइँ आपन सान्ति वापस लइ लिहेउँ ह। मइँ यहूदा क एन लोगन पइ दाया नाहीं करब,” यहोवा कहत ह।

⁶ “यहूदा देस मँ महत्वपूर्ण लोग अउर साधारन लोग मरिहीं। कउनो मनई ओन लोगन क न दफनइहीं न ही ओनके बरे रोइ। एन लोगन बरे सोक परगट करइ क न तउ कउनो आपन क काटी अउर न ही आपन मूँड़े क बार साफ कराई। ⁷ कउनो मनई ओन लोगन बरे भोजन नाहीं लिआई जउन मरे बरे रोवत रहा होइहीं। जेनकर महतारी-बाप मर गए होइहीं लोगन क कउनो मनई समझाई बुझाई नाहीं। जउन मरे बरे रोबत रहा होइहीं ओनका सान्त करइ बरे कउनो मनई दाखरस नाहीं पिआई।”

⁸ “यिर्मयाह, उ घरे मँ न जा जहाँ लोग दावत खात रहत होइँ। उ घरे मँ न जा अउर ओनके संग बइठिके न खा न दाखरस पिआ। ⁹ इस्राएल क परमेस्सर सर्वसक्तिसाली यहोवा कहत ह: ‘मजा उड़ावइ वाले लोगन क सोर क हाली ही मइँ बंद कइ देब। बियाहे क दावत मँ लोगन क हँसी मजाक क किलकारियन क मइँ बन्द कइ देब। इ तोहरे जीवनकाल मँ ही होइ। मइँ इ सबइ काम हाली स करब।’

¹⁰ “यिर्मयाह, तू यहूदा क लोगन क इ सबइ बातन बतउब्या अउर लोग तोहसे पूछिहीं, ‘यहोवा हम लोगन बरे एतनी भयंकर बातन काहे कहेस ह हम का गलत काम कीन्ह ह हम लोग यहोवा आपन परमेस्सर क खिलाफ कउन-सा पाप किहा ह’ ¹¹ तू पचन्क ओन लोगन स इ कहइ चाही, ‘तू पचन्क संग भयंकर घटनन घटिहीं काहेकि तोहार पचन्क पुरखन मोर अनुसरण करब तजेन अउर दूसर देवतन क अनुसरण करब तथा सेवा करब सुरू किहन। उ पचे ओन दूसर देवतन क पूजा किहन। तोहार पुरखन मोका तजेन अउर मोर नेमन क पालन करब तजेन। ¹² किन्तु तू लोग आपन पुरखन स भी जियादा बुरे करम किहा ह। तू लोग बहोत हठी अहा अउर तू सिरिफ उहइ करत अहा जेका तू करइ चाहत अहा। तू मोर आग्या क पालन नाहीं करत अहा। ¹³ एह बरे मइँ तोहका पचन्क इ देस स बाहेर निकारि फेंकब। मइँ तोहका पचन्क बिदेस मँ जाइके मजबूर करब। तू पचे अइसे देस मँ जाब्या जेका तू अउर तोहार पुरखन कबहुँ नाहीं जानेन। उ देस मँ तू पचे ओन सबहिं लबार देवतन क दिन अउ रात पूजा कइ सकत ह। अउर न ही मइँ तोहरे बरे कउनो सहानुभूति देखाउब।’

¹⁴ “लोग प्रतिग्या करत हीं अउर कहत हीं, ‘यहोवा निहचय ही सास्वत अहइ। केवल उहइ अहइ जउन इस्राएल क लोगन क मिस्र देस स बाहेर लिआवा।’ किन्तु समइ आवत अहइ,” “जब लोग अइसा नाहीं कहिहीं। इ सँदेसा यहोवा क अहइ। ¹⁵ लोग कछू नवा कहिहीं। उ पचे कहिहीं, ‘निहचय ही यहोवा सास्वत अहइ। उ ही केवल अइसा अहइ जउन इस्राएल क लोगन क उत्तरी देस स लइ आवा। उ ओनका ओन सबहिं देसन स लइ आवा जेहमाँ उ ओनका पठए रहा।’ लोग इ सबइ बातन काहे कहिहीं? काहेकि मइँ इस्राएल क लोगन क उ देस मँ वापिस लिआउब जेका मइँ ओनके पुरखन क दिहे रहेउँ।

¹⁶ “मइँ हाली ही अनेकन मछुआरन क इ देस मँ आवइ बरे बोलाउब।” इ सँदेसा यहोवा क अहइ। “उ सबइ मछुआरन यहूदा क लोगन क धइ लेइहीं। इ होइ क पाछे मइँ बहोत स सिकारियन क इ देस मँ आवइ बरे बुलाउब। उ सबइ सिकारी यहूदा क लोगन क सिकार हर एक पहाड़, पहाड़ी अउर चट्टानन क दरारन मँ करिहीं। ¹⁷ मइँ उ सब कछू जउन उ पचे करत हीं, लखत हउँ। यहूदा क लोग ओन कामन क मोहसे छुपाइ नाहीं सकतेन जेनका उ पचे करत हीं। ओनकर पाप मोहसे छुपा नाहीं अहइँ। ¹⁸ मइँ यहूदा क लोग जउन बुरे करम किहेन ह, ओकर बदला चुकाउब। मइँ हर एक पाप क बरे दुइ दाई ओनका सजा देब। मइँ इ करब काहेकि उ पचे मोरे देस क ‘गन्दा’ बनाएन ह। उ पचे मोरे देस क भयंकर मूरतियन स ‘गन्दा’ किहेन ह। मइँ ओन देवमूरतियन स घिना करत हउँ। किन्तु उ पचे मोरे देस क आपन देवमूरतियन स भरि दिहेन ह।”