A A A A A
Bible Book List

यसायाह 45Awadhi Bible: Easy-to-Read Version (ERV-AWA)

परमेस्सर वुसू क इस्राएल क मुक्ति बरे चुनत ह

45 इ सबइ उ बातन अहइँ जेनका यहोवा आपन चुने भए राजा वुसू कहत ह,

“मइँ वुसू क दाहिन हाथ थामव।
    मइँ राजा लोगन क सक्ति छोरइ मँ ओकर मदद करब।
    नगर दुआर वुसू क रोक नाहीं पइहीं, मइँ नगर क दुआर खोल देब, अउर वुसू भीतर चला जाइ।
वुसू, तोहार फउजन अगवा बढ़िहीं अउर मइँ तोहरे अगवा चलब।
    मइँ पर्वतन क समथर कइ देब।
मइँ काँसे क नगर-दुआर क तोड़ डाउब।
    मइँ दुआरे पइ लगी लोहा क आँगल क काट डाउब।
मइँ अँधियारा कमरा मँ रखी भइ दौलत तोहका देब।
    मइँ तोहका उ छिपा भवा धन देब।
मइँ अइसा करब ताकि तोहका पता चलि जाइ कि मइँ यहोवा इस्राएल क परमेस्सर हउँ,
    अउर मइँ तोहका तोहार नाउँ स पुकारेस हउँ।
मइँ इ सबइ बातन आपन सेवक याकूब बरे करत हउँ।
    मइँ इ सबइ बातन इस्राएल क आपन चुने भए लोगन बरे करत हउँ।
वुसू, यद्यपि तू मोका नाहीं जानत अहा, किन्तु मइँ तोहका तोहार नाउँ स पुकारे हउँ,
    यहाँ तलक कि तोहार आपन नाउँ स पुकारे हउँ।
मइँ यहोवा हउँ, मइँ सिरिफ परमेस्सर हउँ।
    मोरे सिवा दूसर कउनो परमेस्सर नाहीं अहइ।
मइँ तोहका मज़बूत बनाए हउँ, [a]
    यद्यपि तू मोका नाहीं पहिचानत ह।
मइँ इ काम करत हउँ ताकि सब लोग जान जाइँ
    कि मइँ ही परमेस्सर हउँ।
पूरब स पच्छिम तलक सबहिं लोग इ सबइ जानिहीं कि मइँ यहोवा हउँ
    अउर मोरे सिवा दूसर कउनो परमेस्सर नाहीं।
मइँ प्रकास क बनाएउँ अउर मइँ ही अँधियारा क रचेउँ।
    मइँ सान्ति क सृजेउँ अउर विपत्तियन भी मइँ ही बनाएउँ ह।
    मइँ यहोवा हउँ, मइँ ही इ सबइ बातन करत हउँ।

ऊपर अकासे मँ निआव अइसे बरसब
    जइसे मेघ स बर्खा बरसत ह।
धरती खुल जात ह।
    मुक्ति अइसा फलब फूलब जइसा कउनो पउधा धरती स उगत ह।
पुण्य कर्म आपन चारिहुँ कइँती बढ़ब!
    मइँ यहोवा ही इ सबइ कइ क कारण हउँ।

परमेस्सर आपन सृस्टि क नियन्त्रण करत ह

“धिवकार अहइ ऍन लोगन क, इ सबइ उहइ स बहस करत अहइँ जउन ऍतका बनाएस ह। इ सबइ कउनो टूटे भए घड़े क ठीकरन जइसे अहइँ। कोहार नरम गीली माटी स घड़ा बनावत ह पर माटी ओहसे नाहीं पूछत, ‘अरे, तू का करत अहा?’ वस्तुअन जउन बनाई गइ अहइँ, उ सबइ इ सक्ति नाहीं रखतिन कि आपन बनावइवाले स सवाल पूछइ। इ सबइ लोग भी माटी क टूटे घड़न क ठीकरन क जइसे अहइँ। 10 या, बच्चा आपन बाप स इ नाहीं पूछ सकतेन कि ‘तू हमका जिन्नगी काहे देत अहा?’ बच्चा आपन महतारी स इ सवाल नाहीं कइ सकत हीं कि ‘तू हमका काहे पइदा करति अहा?’”

11 यहोवा इस्राएल क परमेस्सर पवित्तर अहइ। उ इस्राएल क बनाएस। यहोवा कहत ह,

“का तू मोहसे मोरे बच्चन क बारे मँ पूछब्या अथवा
    तू मोका आदेस देब्या ओनके ही बारे मँ जेका मइँ आपन हाथन स रचेउँ।
12 तउ लखा, मइँ धरती बनाएउँ
    अउर उ पचे सबहिं लोग जउन एह पइ रहत हीं, मोर बनाए भए अहइँ।
मइँ खुद आपन हाथन स अकासन क रचता किहेउँ,
    अउर मइँ अकास क सितारन क आदेस देत हउँ।
13 मइँ हउँ जउन वास्तव मँ ओका इ काम करइ बरे उकसाएस ह।
    मइँ ओकर रास्ता क सहल बनाउबउँ।
मइँ आपन नगर क फुन स बनाब।
    उ मोरे क लोगन बिना किसी रिस्वत दिए या बिना कउनो मोल चुकाए अजाद कइ देइ!”
सर्वसक्तीमान यहोवा इ सबइ बातन कहेस।

14 यहोवा कहत ह, “मिस्र अउ वूस बहोत वस्तुअन रचेस रहेन,
    किन्तु हे इस्राएल, तू उ सबइ वस्तुअन पउब्या।
सेबा क लम्बे लोग तोहार होइहीं।
    उ पचे आपन गर्दन क चारिहुँ कइँती जंजीर लिए भए तोहरे पाछे-पाछे चलिहीं।
उ सबइ लोग तोहरे समन्ना निहुरिहीं,
    अउर उ पचे तोहसे बिनती करिहीं।
‘इस्राएल, परमेस्सर तोहरे संग अहइ,
    अउर ओका तजिके कउनो दूसर परमेस्सर नाहीं अहइ।’”

15 हे परमेस्सर, तू उ परमेस्सर अहा जेका लोग लख नाहीं सकतेन।
    तू ही इस्राएल क उद्धार कर्त्ता अहा।
16 बहोत स लोग मिथ्या देवता बनावा करत हीं।
    किन्तु उ सबइ लोग तउ निरास ही होइहीं।
    उ सबइ सबहिं लोग तउ लजाइ जइहीं।
17 किन्तु इस्राएल यहोवा क जरिये बचाइ लीन्ह जाइ।
    उ मुक्ति जुगन तलक बनी रही।
    फुन इस्राएल कबहुँ भी लज्जित नाहीं होइ।
18 यहोवा ही परमेस्सर अहइ।
    उ अकास रचेस ह, अउर अहइ धरती बनाएस ह।
    यहोवा ही धरती क अपने जगहिया पइ टेकाएस ह।
जब यहोवा धरती बनएस उ इ सबइ नाहीं चाहेस कि धरती खाली रहइ।
    उ एका रचेस ताकि एहमाँ जिन्नगी रहइ।
मइँ यहोवा हउँ।
    मोरे अलावा कउनो दूसर परमेस्सर नाहीं अहइ।
19 मइँ अकेल्ले इ सबइ बातन नाहीं किहेउँ, मइँ अजाद भाव स कहेउँ ह।
    संसार क कउनो भी अँधियारा मँ मइँ आपन बचन नाहीं छुपावत।
मइँ याकूब क लोगन स नाहीं कहेउँ कि
    उ पचे मोका बीरान जगहन पइ हेरइँ।
मइँ परमेस्सर हउँ अउर मइँ फुरइ बोहात हउँ।
    मइँ उहइ बातन कहत हउँ जउन फुरइ अहइँ।

यहोवा सिद्ध करत ह कि उ ही परमेस्सर अहइ

20 “तू लोग दूसरी जातियन स बच पराया। तउ आपुस मँ बटुर जा अउर मोरे समन्वा आवा। (इ सबइ लोग अपने संग मिथ्या देवन क मूरतियन रखत हीं अउर एन बेकार क देवतन स पराथना करत हीं। किन्तु इ सबइ लोग इ नाहीं जानतेन कि उ पचे का करत अहइँ? 21 एन लोगन क मोरे लगे आवइ क कहा। एन लोगन क आपन तर्क पेस करइ द्या।)

“उ पचे बातन बहुत दिनन पहिले घटी रहिन, ओनके बारे मँ तू पचन्क कउन बोलाएस? बहोत-बहोत दिनन पहिले ही एन बातन क लगातार कउन बतावत रहा? उ मइँ यहोवा ही हउँ जउन इ सबइ बातन बताए रहा। मइँ ही एकमात्र यहोवा हउँ। मोरे अलावा कउनो अउर परमेस्सर नाही अहइ? का अइसा कउनो अउर अहइ जउन आपन लोगन क रच्छा करत ह नाहीं, अइसा कउनो दूसर परमेस्सर नाहीं अहइ। 22 हे हर कतहुँ क लोगो, तू पचन्क एन लबार देवतन क पाछे चलब छोड़ देइ चाही। तू पचन्क मोर अनुसरन करइ चाही अउर होइ जाइ चाही। मइँ परमेस्सर हउँ। मोहसे दूसर कउनो दूसर परमेस्सर नाहीं अहइ। परमेस्सर केवल मइँ ही हउँ।

23 “मइँ खुद आपन सक्ति क साच्छी कइके प्रतिग्या किहेउँ ह। इ एक उत्तिम बचन अहइ। इ एक आदेस अहइ जउन पूरा होइ ही। हर मनई मोर (परमेस्सर क) आगे निहुरी अउर हर मनई मोर अनुसरण करइ क बचन देइ। 24 यहोवा आपन आप स सपथ लेइ के मोसे वाचा किहेस, ‘अच्छाई अउर मज़बूती तोहमाँ आउब्या।’”

उ सबइ जउन ओहे (कुस्रू) पइ कोहाइ उ अपमानित होइ। 25 यहोवा अच्छे करम करइ बरे इस्राएल क लोगन क बिजयी बनाई अउर लोग ओकर तारीफ करिहीं।

Footnotes:

  1. यसायाह 45:5 मइँ तोहका मज़बूत बनाए हउँ मूलार्थ, “मइँ एक कमरबंध (तोहार कमर क चारिहुँ कइँती) डालब।” आमतोर पर लोग कमरबंध क अपने कमर मँ आपन मांसपेसी क अतिरिक्त बल प्रदान करइ बरे बांधा करत ह। ऍह बरे इ अरथ क साथ एक महावरा बन गवा। “कउनो मनई क आपन काम करइ बरे मज़बूत अउर तइयार होना।”
Awadhi Bible: Easy-to-Read Version (ERV-AWA)

Awadhi Bible: Easy-to-Read Version Copyright © 2005 World Bible Translation Center

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes