मत्ती 4

Awadhi Bible: Easy-to-Read Version

ईसू क परिच्छा

(मरकुस 1:12-13; लूका 4:1-13)

4 फिन आतिमा ईसू क उसरे मँ लइ गइ, काहेकि सइतान क जारिये ओका परखा जाइ सकइ। ²चालीस दिन अउर चालीस रात भुखिया क पाछे जब ओका भूख तड़पावइ लाग। ³तउ ओका ललचावइ वाला ओकरे लगे आवा अउर कहेस, “जदि तू परमेस्सर क पूत बाट्या तउ इ सबइ पथरन स कहा कि इ सब रोटी बन जाईं।”

⁴ईसू जवाब दिहस, “पवित्तर सास्तरन मँ लिखा वाटइ:

‘मनई सिरिफ रोटी स नाहीं जिअत मुला
उ हर एक सब्द स जिअत ह जउन परमेस्सर क मुँहे स निकरत ह।’” ^(A)

⁵फिन सइतान ओका यरूसलेम क पवित्तर सहर मँ लइ गवा। हुआँ मंदिर क सब स ऊँचे बुर्ज प खड़ा होइके ⁶उ ओसे कहेस, “जदि तू परमेस्सर क पूत बाट्या, तउ नीचे कूदि जा काहेकि पवित्तर सास्तरन मँ लिखा बाटइ:

‘उ तोहरे रखवारी बरे आपन दूतन क हुकुम देइ
अउर उ पचे तोहका हाथन स उठाइहीं
जेह बरे तोहरे गोड़े मँ कउनो पाथर ताईं न लगई।’” ^(B)

⁷ईसू जवाब दिहेस, “मुला पवित्तर सास्तरन इहइ कहत ह, ‘अपने पर्भू परमेस्सर क परीच्छा मँ जिन डावा।’” ^(C)

⁸फिन सइतान ईसू क बहुतइ ऊँच पहाड़े प लइ गवा। अउर ओका इ संसार क सब राज्य अउर ओनकइ माया वैभव देखाएस। ⁹सइतान तब ओसे कहेस, “इ सब चीजन्क मइँ तोहका दइ देब जदि तू मोरे अगवा दण्डवत करा अउर मोर आराधना करा।”

¹⁰फिन ईसू ओसे कहेस, “सइतान! दूर होइ जा। पवित्तर सास्त्र कहत ह:

‘आपन पर्भू परमेस्सर क आराधना अउर सिरिफ
ओकर सेवा करा।’” ^(D)

¹¹फिन सइतान ओका छाँड़ि के चला गवा। अउर सरगदूतन आइके ओकर सेवा करइ लागेन।

ईसू गलील मँ काम सुरू करेस

(मरकुस 1:14-15; लूका 4:14-15)

¹²जब ईसू सुनेस कि यूहन्ना पकड़ लीन्ह गवा ह, तउ उ गलील लौटि आवा। ¹³मुला उ नासरत मँ नाहीं रुका अउर जाइके कफरनहूम मँ रहइ लाग जउन जबूलून अउर नप्ताली क पहटा मँ गलील झीले के नगिचे रहा। ¹⁴इ एह बरे भवा कि परमेस्सर क नबी यसायाह जउन कहेस ह, उ पूरा होइ जाइ:

¹⁵“जबूलून अउर नप्ताली क देस
    सागर क राहे प, यरदन नदी क पच्छिम मँ
    गैर यहूदियन क देस गलील मँ
¹⁶जउन मनई आँधियारे मँ जिअत रहेन
    उ सबइ एक भारी जोति देखेन
अउर जउन मउत क परिछाइँ क देस मँ रहत रहेन,
    ओन प ज्योति क भिन्सारे क रोसनी फैलि गइ।” ^(E)

¹⁷उ समई स ईसू सुसमाचार क प्रचार सुरू कइ दिहस, “मनफिराव करा काहेकि सरगे क राज्य नगिचे बाटइ।”

ईसू चेलन्क चुनेस

(मरकुस 1:16-20; लूका 5:1-11)

¹⁸जब ईसू गलील झिलिया क नगिचे स जात रहा, उ दुइनउँ भाइयन क निहारेस समौन (जउन पतरस कहा गवा।) अउर ओकर भाइ आन्द्रियास। उ पचे झिलिया मँ जाल डारत रहेन। उ पचे मछुवारा रहेन। ¹⁹ईसू ओनसे कहेस, “मोरे पाछे आवा, मइँ तोहका सिखाउब कि लोगन्क बरे मछरी पकड़इ क बजाय मनई रूप मँ मछरी कइसे बटोरी जात हीं?” ²⁰उ सबइ तुरतहिं आपन जाल छाँड़ि दिहन अउर ओकरे पाछे होइ गएन।

²¹फिन उ हुवाँ स आगे चला गवा। उ देखेस कि जब्दी क बेटवा याकूब अउर ओकर भाई यूहन्ना आपन बाप क संग नाउँ मँ बैठिके आपन जालन्क मरम्मत करत रहेन। ईसू ओनका बोलाएस। ²²अउर उ पचे फउरन नाउ अउर बाप क छाँड़िके ओकरे पाछे चल दिहन।

ईसू क मनइयन क उपदेस अउर ओनका चंगा करब

(लूका 6:17-19)

²³ईसू समुच्चइ गलील पहँटा मँ यहूदी आराधनालय मँ सरगे क राज्य क सुसमाचार क उपदेस देत अउर हर तरह के बेरामी अउर घोर कस्टन क दूर करत घूमइ लाग। ²⁴समुच्चइ सीरिया देस मँ ओकरे बारे मँ खबर संचर गइ। यह बरे लोग अइसे मनइयन जउन खुब बेरमिया रहेन या जउन तरह के बेरामी अउर भारी बेदनन स पीड़ित रहेन। जेह प दुस्ट आतिमान सवार रहीं जेका मिर्गी आवत रही अउर जउन सुखंडी रहेन, ओनका ओकर पास लिआवइ लागेन। ईसू ओनका चंगा किहेस। ²⁵एह बरे गलील, दिकापुलिस,^[a] यरूसलेम, यहूदिया अउर यरदन नदी क उ पार मनइयन क भारी भीड़ पाछे पाछे होइ लाग।

Footnotes

4:25 दिकापुलिस यूनानी भाखा मँ कहा जाता ह, जेकर अरथ अहइ दस सहर

Awadhi Bible: Easy-to-Read Version (ERV-AWA)

मत्ती 4 Awadhi Bible: Easy-to-Read Version