नीतिवचन 31

Awadhi Bible: Easy-to-Read Version

¹⁰ गुणवन्ती पत्नी कउन पाइ सकत ह?
    उ जन मणि-मणिकन स कहूँ जियादा कीमती अहइ।
¹¹ ओकर पति ओकर बिस्सास कइ सकत ह।
    ओका कउनो भी अच्छी चिजियन क कमी नाही होइ।
¹² सतपत्नी पति क संग उत्तिम व्यवहार करत ह।
    आपन जिन्नगी भर ओकरे बरे कबहुँ विपत्ति नाहीं उपजावत।
¹³ उ हमेसा ऊनी अउ सूती ओढ़ना बनावइ मँ व्यस्त रहत ह।
¹⁴ उ उ पानी क जहाज क नाईं अहइ जउन दूर देस स आवात ह
    अउर हर कहुँ स घरे पर भोज्य वस्तु लिआवत ह।
¹⁵ भिंसारे उठिके उ खइया क बनावत ह।
    अपने परिवारे क अउर दासियन क हींसा ओनका देत ह।
¹⁶ उ लखिके अउ परखिके खेत मोल लेत ह।
    आपन कमात भवा धन स दाख क बारी लगावत ह।
¹⁷ उ बड़ी मेहनत करत ह।
    उ आपन सबहिं काम करइ क समर्थ अहइ।
¹⁸ जब भी उ आपन बनाईं चीज क बेंचत ह, तउ लाभ कमात ह।
    उ देर रात तलक दीप जलाइ क काम करत ह।
¹⁹ उ सूत कातत अउर आपन वस्तु बुनत ह।
²⁰ उ हमेसा ही दीनदुःखी क दान देत ह,
    अउर कंगाल जल क सहायता करत ह।
²¹ जब सर्दी पड़त ह तउ उ आपन परिवार बरे चिंतित नाहीं होत ह।
    काहेकि उ सबहिं क उत्तिम गरम ओढ़ना दइ रखे अहइ।
²² उ चादर बनावत ह अउर बिस्तरा पइ फैलावत ह।
    उ सने स बना भवा बढ़िया अउर बेंगनी ओढ़ना पहिरत ह।
²³ लोग ओकरे पति क आदर करत ही
    उ जगह पावत ह नगर प्रमुखन क बीच।
²⁴ उ अति उत्तिम बइपारी बनत ह।
    उ ओढ़नन अउर कमरबंदन क बनाइके ओनका बइपारी लोगन क बेचत ह।
²⁵ उ सक्तीवाली अहइ, अउर आन-बान वाली अहइ।
    अउर बिस्सास क संग भविस्य क ओर लखत ह।
²⁶ जब उ बोलत ह, उ विवेकपूर्ण रहत ह।
    ओकरी जीभ लोगन क पिरेम करइ अउर दाया करइ क सिच्छा देत ह।
²⁷ उ कबहुँ भी आलस नाहीं करत
    अउर आपन घर बार क चिजियन पइ हर एक दिन धियान रखत ह।
²⁸ ओकर बच्चन खड़ा होत हीं अउर ओका आदर देत हीं अउर ओकरे बारे मँ अच्छी बातन करत ह।
    ओकर पति ओकरी तारीफ करत ह।
²⁹ ओकर पति कहत ह, “बहोत स उच्चकोटि क मेहरारूअन अहइ।
    किन्तू ओन सब मँ तू ही सर्वोत्तम पत्नी अहा।”
³⁰ आकर्षण धोकाबाज़ अहइ अउर सुन्नरता दुइ पल क अहइ।
    मुला उ मेहरारू जेका यहोवा क डर बाटइ, ओकरी तारीफ हाइ चाही।
³¹ ओका उ प्रतिफल द्या जेकर उ जोग्ग अहइ।
    अउर जउन काम उ किहेस ह, ओनके बरे सारे लोग क बीच मँ ओकर तारीफ करा।