नीतिवचन 8

Awadhi Bible: Easy-to-Read Version

⁴ “हे लोगो, मइँ तोहका गोहरावत हउँ,
    मइ समूची मानवजाति बरे अवाज उठावत हउँ।
⁵ अरे नादा ने लोगो! बुद्धिमानी स रहइ क सिखा
    तू जउन मूरख बना अहा समुझबूझ सिखा।
⁶ सुना। काहेकि मोरे लगे कहइ क उत्तिम बातन अहइँ,
    आपन मुँहन खोलति हउँ, जउन कहइ क उचित बा
⁷ मेरे मुखे स तउ उहइ निकरत ह जउन फुरइ अहइ,
    काहेकि मोरे ओंठन क दुट्ठता स घिन अहइ।
⁸ मोरे मुँहे स निकलइ वाले सबइ सब्द निआव स पूर्ण अहइ।
    ओन मँ स कउनो भी धोका देइ वाला नाहीं अहइ।
⁹ विचारवान मनई बरे उ सबइ साफ साफ अहइँ
    अउर गियानी जन बरे उ सबइ सब दोख रहित अहइँ।
¹⁰ चाँदी नाहीं बल्कि तू मोर हिदायत ग्रहण करा
    उत्तिम सोना नाहीं बल्कि तू मोर गियान ल्या।
¹¹ सुबुद्धि रत्नन मणि माणिकन स जियादा कीमती अहइँ।
    तोहार अइसी मनचाही कउनो वस्तु स ओकर तुलना नाहीं होइ।”

²² “यहोवा सबइ चिजियन क रचइ स पहिले
    आपन पुराने करमन स भी पहिले मोका रचेस ह।
²³ मोर रचना सनातन काल मँ भइ रहा।
    धरती क रचान स पहिले मोर रचान भइ रहा।
²⁴ जब मोरे रचना कीन्हा गवा रहा तब न तउ सागर रहा
    अउर न ही पानी क सोता रहेन।
²⁵ मोका पहाड़न पहाड़ियन क थिर करइ स पहिले ही
    जन्म दीन्ह गवा।
²⁶ धरती क रचना, या ओकर खेत या जब धरती क,
    धूल कण रचा गएन, ओसे पहिले मोका रचेस ह।
²⁷ जब यहोवा अकासे क कायम किहे रहा ओहसे भी पहिले मोर अस्तित्व रहा।
    जब यहोवा सागार क पइ छितिज रेखा खिँचे रहा ओहसे भी पहिले मोर अस्तित्व रहा।
²⁸ उ जब अकासे मँ सघन बादल टिकाए रहा,
    अउर गहिर सागर क पानी स भरे रहा तउ स भी मइँ हुवाँ रहा।
²⁹ जब उ समुद्दर क चउहद्दी बाँधे रहा ताकि पानी ओहसे आगे न चला जाइ मइँ हुवाँ रहा।
    जब उ धरती क नेवन रखे रहा ओहेस पहिले मइँ राह।
³⁰ तब मइँ ओकरे संग कुसल सिल्पी स रहेउँ, मइँ दिन-प्रतिदिन आनन्द स पूरिपूर्ण होत चली गएउँ।
    ओकर समन्वा हमेसा आनन्द मनावत।
³¹ ओकर पूरी दुनिया स मइँ आनन्दित रहेउँ।
    मोर खुसी समूचइ मानवता रही।

³² “तउ अब, मोर पूतो, मोर बात सुना।
    ओ धन्न अहइ जउन जन मोर राह पइ चलत हीं।
³³ मोर उपदेस सुना अउर बुद्धिमान बना।
    एनकर उपेच्छा जिन करा।
³⁴ उहइ जन धन्न अहइ, जउन मोर बात सुनत अउर रोज मोरे दुआरन पइ दृस्टि लगाए रहत
    एवं मोर ड्योढ़ी पइ बाट जोहत रहत ह।
³⁵ काहेकि जउन मोका पाइ लेत उहइ जिन्नगी पावत
    अउर उ यहोवा क अनुग्रह पावत ह।
³⁶ मुला उ जउन मोर खिलाफ पाप करत ह खूद ही चोट खावत ह
    उ जउन मोहे स घिना करत ह उ मउत स गले लगावत ह।”