A A A A A
Bible Book List

गनती 32Awadhi Bible: Easy-to-Read Version (ERV-AWA)

यरदन नदी क पूरब क परिवार समूहन

32 रूबेन अउ गाद परिवार समूहन क लगे ढेर तदाद मँ मवेसियन रहेन। ओनॅ मनइयन याजेर अउ गिलाद क निचके क धरती लखेन। उ पचे बिचारेन कि उ धरती ओनके गोरु बरे ठीक अहइ। एह बरे रूबेन अउ गद परिवार समूहन क लोग मूसा क निअरे आएन। उ पचे मूसा, याजक एलीआज़ार अउ मनइयन क नेता लोगन स बात किहेन। 3-4 उ पचे कहेन, “आपक सेवक हम सबन क लगे भारी तदाद मँ गोरु अहइँ। अउर उ भुइयाँ जेका परमेस्सर हम लोगन क जीतइ अउर कब्जा करइ क दिहस, गोरूअन बरे एक ठू बाढ़ियाँ चरागाह अहइ। इ पहँटा मँ अतारोत, दीबोन, याजेर, हेसबोन, एलाले सबाम, नबो, बोन सामिल अहइँ। अगर आप लोगन क रजामन्दी होइ तउ हम पचे चाहब कि इ पहँटा हम पचन क दीन्ह जाइ। हम लोगन क यरदन नदी क दूसर कइँती न लइ जाइँ।”

मूसा रूबेन अउ गाद क परिवार समूहन स पूछेस, “का तू पचे हिआँ बसब्या अउ आपन भाइयन क हिआँ स जाइ अउ जुद्ध करइ देब्या? तू पचे इस्राएल क लोगन क उत्साह काहे भंग करइ चाहत बाट्या? होइ सकत ह उ पचे यरदन नदी क पार जउन पहँटा यहोवा ओनका दिसह ह नाहीं लेइ चाहीं। तोहार बाप अउ दादा मोरे संग अइसा ही किहन। जब मइँ कादेसबनेर् स जासूसन क प्रदेस क छान-बीन करइ पठएउँ रहेउँ। उ पचे ऍस्कोल घाटी तलक गएन। उ सबइ प्रदेस क लखेन। अउर उ सबइ इस्राएल क लोगन क उ धरती प जाइ क उत्साह भंग कइ दिहस। उ पचे इस्राएल क लोगन क उ पहँटा मँ जाइ क इच्छा नाहीं करइ दिहन जेहसे यहोवा ओनका दइ दिहे रहा। 10 यहोवा मनइयन प बहोतइ कोहान। यहोवा इ कठोर निसेध अग्या क बनाएस: 11 ‘मिस्र स आवइ वालन लोगन अउ बीस बरिस या जियादा उमर क कउनो भी मनई क उ भूइँया क जेकरे बरे मइँ इब्राहीम, इसहाक अउ याकूब क बचन दिहेउँ रहा। लखइ क आग्यिा नाहीं होब्या। मइँ इ भूइँया क लोगन क देइ क बचन दिहेउँ रहा। मुला उ पचे मोर ठीक तरह नाहीं मानेन। एह बरे उ पचे इ भूइँया क न पइहीं। 12 सिरिफ कनजी यपुन्ने क पूत कालेब अउर नून क पूत यहोसू यहोवा क पूरी तरह मानेस।’

13 “यहोवा इस्राएल क लोगन क खिलाफ बहोतइ कोहान रहा। एह बरे यहोवा मनइयन क 40 बरिस तलक रेगिस्तान मँ रोके रहा। यहोवा ओनका तब तलक रोके रहा, जब ताई उ पचे यहोवा क खिलाफ पाप किहे रहेन, मर नाहीं गएन। 14 अउर अब तू पचे उहइ करत अहा जउन तोहार पुरखन किहन ह। अरे पापियो! का तू चाहत ह कि यहोवा इस्राएल क लोग क खिलाफ अउ जियादा कोहाइ जाइ? 15 अगर तू पचे ओकर पाछा करइ स मुड़ि जाब्या तउ यहोवा इस्राएल क अउर जियादा समइ तलक रेगिस्ताने मँ ठहराइ देइ। तब तू इ सब मनइयन क नास कइ देब्या।”

16 मुला रूबेन अउ गाद परिवार समूहन क लोग मूसा क लोगे गएन। उ सबइ कहेन, “हिआँ हम पचे आपन गदेलन बरे सहर अउ आपन गोरुअन बरे बाड़ा बनउबइ। 17 तब हमार गदेलन दूसर लोगन स सुरच्छित रइहीं जउन इ प्रदेस मँ रहत हीं। मुला ह पचे खुसी स अगवा बढ़िके इस्राएल क लोगन क मदद करब। हम लोग ओनका ओनके देस मँ लइ जाब। 18 हम पचे तब तलक घर नाहीं लउटब जब तलक हर एक मनई इस्राएल मँ आपन धरती क हींसा पाइ जात। 19 हम लोग यरदन नदी क पच्छिम मँ कउनो धरती नाहीं लेब, हम सबन क धरती क हींसा यरदन नदी क पूरब ही बाटइ।”

20 तउ मूसा ओनसे कहेस, “जदि तू पचे इ सब करब्या तउ इ रेगिस्तान तू पचन क होइ। मुला तोहरे फउजियन क यहोवा क समन्वा जुद्ध मँ जाइ चाही। 21 तोहरे सिपाहियन क यरदन नदिया पार करइ चाही अउ दुस्मनन क उ देस तजि देइ बरे मजबूर करइ चाही। 22 जब हम सबन क धरती पावइ मँ यहोवा मदद कइ चुकइँ तब तू सबइ घर जाइ सकत ह। तब यहोवा अउ इस्राएल तोहका अपराधी नाहीं मनिहीं। तब यहोवा तू पचन क इ पहँटा लइ लेइ देइहीं। 23 मुला अगर तू सबइ इ बातन पूरी नाहीं करत्या तउ तू लोग यहोवा क खिलाफ पाप करब्या। अउर उ गाँठ बाँधा कि तू आपन पाप खातिर सजा पउब्या। 24 आपन गदेलन बरे सहर अउ गोरुअन बरे बाड़ा बनावा। मुला ओकरे पाछे ओका पूरा करा जेका करइ क तू पचे बचन दिहे अहा।”

25 तब गाद अउ रूबेन परिवार समूहन क लोग मूसा स कहेन, “हम पचे आप क सेवक अही। आप हमार सुआमी अहइँ। एह बरे हम लोग उहइ करब जउन आप कहत हीं। 26 हमार मेहरारु, गदेलन अउ हमार गोरुअन गिलाद नगर मँ रइहीं। 27 मुला आपक सेवक हम यरदन नदी क पार करब। मुला हम पचे यहोवा क समन्वा आपन सुआमी क कहे क मुताबिक जुद्ध मँ कूदि पड़ब।”

28 मूसा याजक एलीआज़ार, नून क पूत यहोसू अउ इस्राएल क परिवार समूहन क सबहिं नेतागणन क ओकरे बारे मँ हुकुम दिहस। 29 मूसा ओनसे कहेस, “गाद अउ रूबेन क मनई यरदन नदी क पार करिहीं। उ पचे यहोवा क अगवा जुद्ध मँ धावा बोलिहीं। उ सबइ देस जीतइ मँ तोहार मदद करिहीं। अउर तू पचे गिलाद क प्रदेस ओनके हींसा क रूप मँ ओनका दोब्या। 30 मुला जदि उ पचे आपन सिपाहियन क तोहार संग पार नाहीं भेजइ तउ होइ सकत ह कि उ कनान प्रदेस मँ तोहार लोगन क बीच सिरिफ पैतृक सम्पत्ति ही पाइ।”

31 गाद अउ रूबेन क लोग जवाब दिहन, “हम पचे उहइ करइ क बचन देत अही जउन यहोवा क हुकुम अहइ। 32 हम पचे यरदन नदी पार करब अउ कनान देस प यहोवा क समन्वा धावा बोलब। अउ हमरे देस क हींसा यरदन नदी क पूरब क धरती होइ।”

33 इ तरह मूसा उ प्रदेस क कछू भाग गाद क लोगन, रूबेन क लोगन अउ मनस्से परिवार समूहन क आधे लोगन क दिहस। (मनस्से यूसुफ क पूत रहा।) उ प्रदेस मँ एमोरियन क राजा सिहोन क राज्ज अउ बसान क राजा ओग क राज्ज मिला रहा। उ प्रदेस मँ उ इलाका क चारहों कइँती क सहर भी मिला रहेन।

34 गाद क मनइयन दीबोन, अतारोत, अरोएर, 35 अत्रौत, सोपान, याजेर, योगबहा, 36 बेतनिम्रा अउ बेथारान सहरन क बनाएन। उ पचे मजबूत चहर-देवार क संग सहरन क बनाएस अउ आपन गोरुअन क बाड़ा बनाएन।

37 रूबेन क मनइयन हसबोन, एलाले, किर्यातैन, 38 नबो, बालमोन अउर तित्पा सहर। उ दूसर सहरन क नाउँ दिहस जेका उ बनाए। मुला नेबो अउ बाल मिआँन क नवा नाम स पुकारेस।

39 मनस्से परिवार समूह क सन्तान माकीर स जन्मा लोग गिलाद क गएन। उ पचे सहर क हराएन। उ पचे ओन एमोरी क हराएन जउन हुवाँ रहत रहेन। 40 एह बरे मनस्से क परिवार समूह क माकीर बरे मूसा गिलाद दिहस। एह बरे ओकर परिवार हुवाँ बस गवा। 41 मनस्से क परिवार समूह क यैर नान्ह-नान्ह सहरन जेका हेवोल याईर कहा जात ह क जीत लिहस ह। 42 तउ नोबह कनात अउ ओकरे लगे क नान्ह-नान्ह सहरन क हराएस। तब उ उ ठउर क नाउँ आपन नाउँ प नोबह धरेस।

Awadhi Bible: Easy-to-Read Version (ERV-AWA)

Awadhi Bible: Easy-to-Read Version Copyright © 2005 World Bible Translation Center

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes