गनती 4  Awadhi Bible: Easy-to-Read Version

कोहात परिवार क सेवा करब

4 यहोवा मूसा अउ हारून स कहेस: ² “कोहात परिवार समूह क मनसेधुअन क गना। (कोहात परिवार समूह लेवी परिवार समूह क एक हींसा अहइ।) ³ तीस स पचास बरिस क उमर वाले मनइयन क गना जउन फउज मँ सेवा करइ सकत ह। इ मनइयन मिलापवाला तम्बू मँ कामकाज करिहीं।

⁴ “ओनकइ कामकाज सबन त जियादा पवित्तर ठउर क देखभाल करब अहइ।

⁵ “जब सिबिर नवा ठउर क जात्रा करइँ। हारून अउ ओनके पूतन क चाही कि उ पचे मिलापवाला तम्बू मँ जरूर जाइँ अउ पर्दा उतारइँ अउ करार क पवित्तर सन्दूखे क ढाँपइँ। ⁶ तब उ पचे इ सबन्क बढ़िया चाम स बना भवा ढकना स ढाँपि देइँ। तब उ पचे पवित्तर सन्दूखे प बिछा भवा खाल प एक ठु नीला ओढ़ना फइलइहीं अउ पवित्तर सन्दूखे प लगा भवा कड़ा मँ डंडा डइहीं।

⁷ “तब उ पचे एक ठु नीला ओढ़ना पवित्तर मेजी प फइलइहीं। तब उ सबइ ओह पइ थाली, चम्मच, खोरा अउ पयेबलि बरे गगरी धरिहीं। उ पचे खास रोटी ओकर ऊपर धरइ सकत ह। ⁸ तब तू पचे इ सबहिं चीजन प एक ठु लाल ओढ़ना डउब्या। तब हर एक चीज क बढ़िया चाम स ढाँपि द्या। तब मेज क छल्ला मँ डंडा डावा।

⁹ “तब डीबट अउ दिया क नीला ओढ़ना स ढकि द्या अउ साथ ही साथ दिया क गुल काटइवाला कैंची, गुल रखइवाला थाली अउर दिया बरे प्रयोग मँ आवइवाला तेल क मेटिया क ढकि द्या। ¹⁰ तब सबहिं चीजन क नीक चाम मँ लपटावा अउ ऍनका ढोवइ बरे प्रयोग मँ आवइवाला डंडन प ऍनका धरा।

¹¹ “सुनहरी वेदी प एक नीला कपड़ा फइलावा। ओका नीक चाम स ढका। तब वेदी क ढोवइ बरे ओहमाँ लगा भवा छल्लन मँ डंडा डावा।

¹² “पवित्तर ठउर मँ आराधना क प्रयोग मँ आवइवाली खास चीजन क एक साथे बटोरा। ऍनका एक संग बटोरा अउ ऍनका नीला ओढ़ना मँ बटोरा। तब ऍका बढ़िया चाम स ढका। इ चीजन क लइ जाइ बरे ऍनका एक ढाँचा प धरा जिस प इ लइ जाइ।

¹³ “काँसावाली वेदी स राख क झार द्या अउ ऍकरे ऊपर एक बैगनी रंग क ओढ़ना फइलावा। ¹⁴ तब वेदी प आराधना बरे प्रयोग मँ आवइवाली आगी क गोस्सी, काँटा, बेल्चा अउ खोरा आदी सब चीजन क बटोरा। इ चीजन्क काँसा क वेदी प धरा। तब वेदी क ऊपर नीक चाम क ओढ़ना फइलावा। वेदी मँ लगा कड़न मँ ऍका लइ जाइवाला डंडा डावा।

¹⁵ “जब हारून अउ ओकर पूत पवित्तर ठउर क सबहिं पवित्तर चीजन्क ढकना पूरा करि लेइँ तब कोहात परिवार क मनई अन्दर आइ सकत हीं अउर उ चीजन्क लइ जाब सुरु कइ सकत हीं। इ तरह उ पचे पवित्तर चीजन्क छुइहीं नाहीं। तउ उ पचे मरिहीं नाहीं।

¹⁶ “याजक हारून क पूत एलीआज़ार पवित्तर तम्बू बरे जिम्मेदार होइ। उ पवित्तर ठउर अउ ऍकर हर चीज बरे जिम्मेदार होइ। उ डीबट क तेल, महकउआ सुगन्धिवाली अगरबत्ती अउ हमेसा दीन्ह जाइवाली भेंट।”^[a]

¹⁷ यहोवा मूसा अउ हारून स कहेस, ¹⁸ “होसियार रहा, इ कोहात बंसी मनइयन क लेवी मनसेधुअन क बीच स बरबाद जिन होइ द्या। ¹⁹ तोहका इ एह बरे करइ चाही कि कोहात बंसी महा पवित्तर ठउर ताई जाइँ अउ मरइँ नाहीं। हारून अउ ओकरे पूतन क अन्दर जाइ चाही अउ हरेक कोहात बंसी क बतावइ चाही कि उ का करइ। ओन पचन क हर एक मनई क चीज देइ चाही जउन ओका लइ जाइ क अहइ। ²⁰ जदि तू अइसा नाहीं करत्या तउ कोहात बंसी अन्दर जाइ सकत हीं अउ पवित्तर चीजन क लखि सकत हीं। जदि उ पचे एक छिन बरे भी ओन पवित्तर चीजन कइँती निहारत हीं तउ ओनका मरइ क होइ।”

गेर्सोन परिवार क सेवा

²¹ यहोवा मूसा स कहेस, ²² “गेर्सोन परिवार क सबहिं मनइयन क गना। ओनकइ सूची परिवार अउ परिवार समूह क मुताबिक बनावा। ²³ आपन सेवा क कर्तव्य कइ चुकइवालन तीस बरिस स पचास बरिस तक क मनसेधुअन जउन सबइ सेवा करइ बरे जाइ सकत ह क गना। इ सबइ लोग मिलापवाला तम्बू क देख-भाल करिहीं।

²⁴ “गेर्सोनी परिवार क इहइ करइ चाही अउ इ चीजन क लइ चलइ चाही। ²⁵ ऍनका पवित्तर तम्बू क पर्दा, मिलापवाला तम्बू, एकर ओढ़ावन अउ नीक चाम स बना ओढ़ावन लइ चलइ चाही। ओनका मिलापवाला तम्बू क दुआर क पर्दा भी लइ चलइ चाही। ²⁶ ओनका अंगने क ओन पर्दन क भी जउन पवित्तर तम्बू अउ वेदी क चारिहुँ ओर लगा बाटेन, लइ चलइ चाही। ओनका आंगन क प्रवेस दुआर क पर्दा भी लइ चलइ चाही। ओनका सब लसुरी अउ पर्दा क संग प्रयोग मँ आवइवाली सबहिं चीजन क लइ चलइ चाही। गरसान बंस क मनई उ कउनो भी चीज बरे जिम्मेदार होइहीं जउन इ चीजन स कीन्ह जात हीं। ²⁷ हारून अउ ओकर पूत इ सबहिं कामन क निगरानी करिहीं। गेर्सोनी बंस क मनई जउन कछू लइ जइहीं अउ जउन दूसर काम करिहीं ओकर पइ हारून अउ ओकर पूत नज़र राखिहीं। तोहका ओन लोगन क उ सबइ चीज सोंप देइ चाही जेनका ढोवइ बरे उ पचे जिम्मेदार होइहीं। ²⁸ इहइ काम अहइ जेका गेर्सोन बंस क परिवार समूह क लोगन क मिलापवाला तम्बू बरे करइ क अहइ। हारून क पूत ईतामार याजक ओनके काम बरे जिम्मेदार होइ।”

मरारी परिवार क सेवा

²⁹ “मरारी परिवार समूह क परिवार अउ परिवार समूहन क मनसेधुअन क गना। ³⁰ तीस स पचास बरिस क सबहिं मनसेधुअन क जउन सेवा करइ बरे जाइ सकत ह क गना। उ पचे मनइयन मिलापवाला तम्बू बरे खास काम करिहीं। ³¹ जब तू जात्रा करब्या तब ओनकइ इ काम अहइ कि मिलापवाला तम्बू क फरेम (ढाँचा) लइ चला। ओनका पट्टी, खाभ्भा अउ आधार क लइ चलइ चाही। ओनका ओन तम्बू क खुँटियन क लइ चाही ³² अउर ओका आँगन क चारिहुँ कइँती क खम्भा, ओका खूँटियन क साथ, आधार अउ रस्सी क लइ चाही। सब नाउँ क सूची बनावा अउ हरेक मनई क बतावा कि ओका का का चीज लइ जाइ क अहइ। ³³ इहइ बात अहइँ जेका मरारी बंस क लोग मिलापवाला तम्बू क कामे मँ सेवा बरे करिहीं। हारून क पूत ईतामार याजक ऍनके बरे जिम्मेदार होइ।”

लेवी बंस परिवार

³⁴ मूसा, हारून अउ इस्राएल क मनइयन क अगुआ लोग कोहती-बंस क मनइयन क गनेन। उ पचे ऍनका परिवार अउ परिवार समूहन क मुताबिक गनेन। ³⁵ उ पचे तीस स पचास बरिस क उमर क मनइयन क जउन सेवा करइ बरे जाइ सकत ह गनेन। इ पचन क मिलापवाला तम्बू बरे खास काम करइ बरे दीन्ह गएन।

³⁶ कहात परिवार समूह मँ जउन इ काम करइ क जोग्गता रखत रहेन, 2,750 मनसेधू रहेन। ³⁷ इ तरह कोहात परिवार क इ मनइयन क मिलापवाला तम्बू क खास काम करइ बरे जिम्मेदारी दीन्ह गएन। मूसा अउ हारून ऍका वइसा ही किहेन जइसा यहोवा मूसा स करइ क कहे रहा।

³⁸ गेर्सोनी परिवार समूह क भी ओकर परिवारन अउ ओकर परिवार समूहन क अनुसार गना गवा। ³⁹ तीस स पचास बरिस क उमर क सबहिं मनइयन क जउन सेवा करइ बरे जाइ सकतेन क गना गएन। इ मनइयन क मिलापवाला तम्बू मँ खास काम करइ क सेवा-काम दीन्ह गवा। ⁴⁰ गेर्सोन परिवार समूह क परिवारन मँ जउन जोग्ग रहेन उ पचे 2,630 मनसेधू रहेन। ⁴¹ इ तरह इ मनसेधुअन क जउन गेर्सोन परिवार समूह क रहेन, मिलापवाला तम्बू मँ खास काम करइ क सेवा-काम सौंपा गवा। मूसा अउ हारून ऍका वइसा ही किहेन जइसा यहोवा मूसा क करइ क कहे रहा।

⁴² मरारी परिवार क परिवार अउ परिवार समूहन क भी गना गवा। ⁴³ तीस स पचास बरिस क उमर क सबहिं मनसेधू जउन सेवा करइ बरे जाइ सकतेन क गना गएन। इ मनइयन क मिलापवाला तम्बू बरे खास काम करइ क सेवा-काम दीन्ह गवा। ⁴⁴ मरारी परिवार समूह क परिवारन मँ जउन लोग जोग्ग रहेन, उ पचे 3,200 मनई रहेन। ⁴⁵ इ तरह मरारी परिवार समूह क इ मनइयन क खास काम दीन्ह गवा। मूसा अउ हारून ऍका वइसा ही किहेन जइसा यहोवा मूसा स करइ क कहे रहा।

⁴⁶ मूसा, हारून अउ इस्राएल क मनइयन क नेता लोग लेवी-बंस क सबहिं निअम्बर क गनेन। उ पचे हर एक परिवार अउ हर एक परिवार समूह क गनेन। ⁴⁷ सब मनइयन जउन आपन सेवा कर्तव्य क निभाइ चुका रहेन अउर जउन तीस बरिस स पचास बरिस उमर क रहेन, गना गएन। इ मनइयन क मिलापवाला तम्बू बरे खास काम करइ क सेवा-काम दीन्ह गवा। उ पचे मिलापवाला तम्बू क चलइ क काम तब किहेन जब उ पचे जात्रा किहेन। ⁴⁸ मनसेधुअन क सारी संख्या 8,580 रही। ⁴⁹ यहोवा इ आदेस मूसा क दिहेन। हर एक मनई क आपन काम दीन्ह ग रहा। अउ हरेक मनसेधू स कहा गवा रहा कि ओका का का लइ चलइ चाही। एह बरे यहोवा जउन हुकुम दिहे रहा उ चीजन क पूरा कीन्ह गवा। सबहिं मनइयन क गना गवा।