ओबद्या

Marathi Bible: Easy-to-Read Version

आम्ही परमेश्वर देवाकडून हकिगत ऐकली.
    राष्ट्रांकडे दूत पाठविला गेला.
तो म्हणाला, “आपण अदोमाविरुध्द लढण्यास जाऊ या.”

⁸ परमेश्वर म्हणतो, “त्याच दिवशी,
    मी अदोममधील सुज्ञांचा नाश करीन.
    एसावच्या पर्वतातून समजूत नष्ट करीन.
⁹ तेमान, तुझे सामर्थ्यशाली पुरुष भयभीत होतील.
    एसावच्या पर्वतावरील प्रत्येकाचा नाश होईल.
पुष्कळ लोक मारलो जातील.
¹⁰ तू अप्रतिष्ठेने माखशील.
    आणि तुझा कायमचा नाश होईल.
    का? कारण तू, तुझा भाऊ याकोब याच्याशी क्रूरपणे वागलास.
¹¹ तू इस्राएलच्या शत्रूंना जाऊन मिळालास;
    परक्यांनी इस्राएलचे धन लुटून नेले
परदेशी इस्राएलच्या गावाच्या वेशीतून आत शिरले;
    त्यांनी यरुशलेमचा कोणता भाग घ्यायचा ह्यासाठी चिठ्या टाकल्या;
    आणि तू अगदी तेथेच तुझ्या वाटणीची वाट बघत उभा होतास.
¹² तुझ्या भावाच्या संकटांना तू हसलास.
    तू असे करायला नको होतेस.
लोकांनी जेव्हा यहूदाचा नाश केला तेव्हा तू आनंद मानलास,
    तू तसे करायला नको होतेस.
त्याच्या संकटसमयी तू प्रौढी मिरविलीस;
    असेही तू करायला नको होतेस.
¹³ माझ्या लोकांच्या वेशीतून तू आत आलास;
    आणि त्यांच्या समस्यांकडे पाहून हसलास;
तू असे करायला नको होतेस त्यांच्या संकटसमयी तू त्यांची संपत्ती घेतलीस,
    तू असे करायला नको होतेस.
¹⁴ जिथे रस्ते एकमेकांना छेदतात तिथे तू उभा राहिलास
    आणि पळून जाण्याचा प्रयत्न करणाऱ्यांचा नाश केलास.
तू असे करायला नको होते.
    जिवंत सुटलेल्यांना तू पकडलेस तू असे करायला नको होते.
¹⁵ परमेश्वराचा दिवस लवकरच
    सर्व राष्ट्रांकडे येत आहे;
तू दुसऱ्या लोकांशी वाईट कृत्ये केलीस
    त्या वाईट गोष्टी तुझ्या बाबतीत घडतील.
तू केलेली दुष्कर्मे तुझ्या
    डोक्यावर येऊन आदळतील.
¹⁶ का? कारण तू माझ्या पवित्र पर्वतावर रक्त सांडलेस
    म्हणून दुसरी राष्ट्रेही तुझे रक्त सांडतील. ^[a]
तू संपशील.
    तू कधी अस्तित्वात नव्हतास, अशीच तुझी दशा होईल.
¹⁷ पण सियोन पर्वतावर काही वाचलेले असतील.
    ते माझे खास लोक असतील.
याकोबाचे राष्ट्र ^[b] त्याच्या मालकीच्या गोष्टी
    परत स्वतःकडे घेईल.
¹⁸ याकोबाचे घराणे आगीप्रमाणे होईल
    योसेफाचे घराणे जाळासारखे असेल पण एसावाचे राष्ट्र ^[c] राखेप्रमाणे होईल
यहुदाचे लोक अदोम जाळतील, ते अदोमचा नाश करतील.
एसाव राष्ट्रात मग कोणी शिल्लक राहणार नाही.”
    का? कारण परमेश्वर देव असे म्हणाला आहे.
¹⁹ नेगेवचे लोक
    एसावाच्या पर्वतावर राहतील
डोंगराच्या पायथ्याशी राहणारे लोक पलिष्ट्यांचा देश
    आपल्या ताब्यात घेतील.
ते एफ्राईमाच्या व शोमरोनच्या भूमीवर राहतील.
    गिलाद बन्यामीनच्या कबजात जाईल.
²⁰ इस्राएलच्या लोकांना त्यांची घरे बळजबरीने सोडावी लागली,
    पण ते सारफथ पर्यंतचा कनानचा प्रदेश घेतील
यहूदाच्या लोकांना बळजबरीने यरुशलेम सोडावे लागले व ते सफारदमध्ये राहतात.
    पण ते नेगेवची गावे घेतील.
²¹ विजेते सियोन पर्वतावर जातील,
    एसाव पर्वतावर राहणाऱ्या लोकांवर ते राज्य करतील.
    आणि राज्य परमेश्वराच्या मालकीचे होईल.