उत्पत्ति 26

Awadhi Bible: Easy-to-Read Version

इसहाक अबीमेलेक स झूठ बोलत ह

26 एक दाँई अकाल पड़ा। इ अकाल वइसा ही रहा जइसा इब्राहीम क टेम मँ पड़ा। ऍह बरे इसहाक गरार सहर मँ पलिस्तियन क राजा अबीमेलेक क लगे गवा। ² यहोवा इसहाक स बात किहस। यहोवा इसहाक स इ कहेस, “मिस्र क जिन जा। उहइ देस मँ रहा जेहमाँ रहइ क हुकुम मइँ तोहका दिहेउँ ह। ³ उहइ देस मँ रहा अउर मइँ तोहरे संग रहब। मइँ तोहका आसीर्बाद देब। मइँ तोहका अउ तोहरे परिवार क उ सब पहटा देब। मइँ उहइ करब जउन मइँ तोहरे बाप इब्राहीम क बचन दिहेउँ ह। ⁴ मइँ तोहरे परिवार क आकास क तारा समूह क तरह बहोत स बनाउब अउर मइँ सारा पहटा तोहरे परिवारे क देब। धरती क सब रास्ट्र तोहरे सन्तानन क कारण मोर आसीर्बाद पाइ जइही। ⁵ मइँ इ ऍह बरे करब कि तोहार बाप मोर हुकुम क मानेस अउ मइँ जउन कछू कहेउँ, उ किहस। इब्राहीम मोरे हुकुमन, मोर कानूनन अउ मोरे नेमन क पालन किहस।”

⁶ इसहाक रुका अउ गरार मँ रहा। ⁷ इसहाक क मेहरारु रिबका बहोत सुन्नर रही। उ जगह क मनइयन इसहाक स रिबका क बारे मँ पूछेन। इसहाक कहेस, “इ मोर बहिन अहइ।” इसहाक इ कहइ स डेरान कि रिबका मोर मेहरारु अहइ। इसहाक डेरात रहा कि मनई ओकर मेहरारु क पावइ क ओका मारि डइही।

⁸ जब इसहाक हुआँ बहोत टेम तलक रहि चुका, तउ एक दिन अबीमेलेक आपन खिड़की स बाहेर झाँकेस अउ लखेस कि इसहाक, रिबका क संग हँसी अउर खेल करत अहइ। ⁹ अबीमेलेक इसहाक क बोलाएस अउ कहेस, “इ मेहरारु तोहार पत्नी अहइ। तू हम पचन स इ काहे कहया कि इ मोर बहिन अहइ।”

इसहाक ओसे कहेस, “मइँ डेरात रहेउँ कि तू ओका पावइ बरे मोका मारि डउब्या।”

¹⁰ अबीमेलेक कहेस, “तू हम पचन क बुरा किह्या ह। हम पचन क कउनो भी मनई तोहरे पत्नी क संग सोइ सकत रहा। तब उ बड़के पाप क दोखी होत।”

¹¹ ऍह बरे अबीमेलेक सबहि मनइयन क चिताउनी दिहस। उ कहेस, “इ मनसेधू अउ इ मेहरारु क कउनो चोट नाही पहोंचाई। अगर कउनो ऍनका चोटपहोंचाइ तउ उ मनई जान स मारि दीन्ह जाइ।”

इसहाक धनी बना

¹² इसहाक उ भुइँया प खेती किहस अउ उ बरिस ओकरे बहोतइ फसिल भइ। यहोवा ओह प बहोतइ कृपा किहेस। ¹³ इसहाक धनी होइ गवा। उ जियादा स जियादा धन तब तलक बटोरत रहा जब तलक बहोत धनी नाही होइ गवा। ¹⁴ ओकरे लगे बहोत स झुण्ड अउ गोरुअन क झुण्ड रहेन। ओकरे लगे ढेर दास भी रहेन। सबहि पलिस्ती ओसे डाह राखत रहेन। ¹⁵ ऍह बरे पलिस्तियन ओन सबहि नारन क बर्बाद कइ दिहन जेनका इसहाक क बाप इब्राहीम अउ ओकर साथी लोगन कइउ साल पहिले खने रहेन। पलिस्तियन ओनका माटी स पाट दिहन ¹⁶ अउर अबीमेलेक इसहाक स कहेस, “हमार देस तजि द्या। तू हम पचन स बहोत जियादा सकतीवाला होइ गवा अहा।”

¹⁷ ऍह बरे इसहाक उ जगह तजि दिहस अउ गरार क छोटी नदी क लगे पड़ाव डालेस। इसहाक हुवइ ठहरा अउ हुवँइ रहा। ¹⁸ एकरे बहोत पहिले इब्राहीम कइउ नारा खने रहा। जब इब्राहीम मरा तउ पलिस्तियन माटी से इनारा पाटि दिहन। ऍह बरे हुवइ इसहाक लौटा अउ ओन इनारान क फुन खनेस। उ नारा क उहइ नाउँ दिहेस जउन नाउँ ओकर पिता दिहे रहा। ¹⁹ इसहाक क नउकरन छोटी नदी क लगे एक नारा खनेन। उ कुआँ स पानी क एक सोता फूट पड़ा। ²⁰ तब गरार क गड़रिया लोग उ नारा क कारण इसहाक क नउकरन स झगड़इ लागेन। उ पचे कहेन, “इ पानी हमार अहइ।” ऍह बरे इसहाक ओकर नाउँ एसेक राखेस। उ इ नाउँ ऍह बरे दिहस कि उहइ जगह प उ मनइयन ओसे झगड़ा किहे रहेन।

²¹ तब इसहाक क नउकरन दूसर नारा खनेन। हुआँ क मनइयन उ नारा बरे भी झगड़ेन। ऍह बरे इसहाक उ नारा क नाउँ सित्ना राखेस।

²² इसहाक हुआँ स हटा अउ दूसर नारा खनेस। उ इनारा बरे झगड़ा करइ कउनो नाही आवा। ऍह बरे इसहाक उ इनारा क नाउँ रहोबोत राखेस। इसहाक कहेस, “यहोवा हिआँ हमरे बरे जगह दियाएस ह। हम पचे प्रगति करब अउर बढ़ब अउ इहइ भुइँया पइ पूरी तरह सफल होइ जाब।”

²³ उ जगह स इसहाक बेर्सेबा क गवा। ²⁴ यहोवा उ रात इसहाक स बोला, “मइँ तोहरे पिता इब्राहीम क परमेस्सर अहउँ। जिन डेराअ। मइँ तोहरे संग अहउँ अउ मइँ तोहका आसीर्बाद देब। मइँ तोहरे परिवार क महान बनाउब। मइँ आपन सेवक इब्राहीम क कारण इ करब।” ²⁵ ऍह बरे इसहाक उ जगह यहोवा क आराधना बरे एक वेदी बनाएस। इसहाक हुआँ पड़ाव डालेस अउ ओकर नउकर लोग एक इनारा खनेन।

²⁶ अबीमेलेक गरार स इसहाक क लखइ आवा। अबीमेलेक आपन संग सलाहकार अहुज्जत अउ सेनापति पीकोल क लइ आवा।

²⁷ इसहाक पूछेस, “तू मोका लखइ काहे आया ह? तू एकरे पहिले मोरे संग दोस्ती नाहीं राखत रह्या। तू मोका आपन देस तजि देइ क बेबस किहा।”

²⁸ उ पचे जवाब दिहन, “अब हम पचे जानित ह कि यहोवा तोहार संग अहइ। इ बरे हम चाहित ह कि हम पचे तोहरे संग एक समझौता करी। हम चाहित ह कि तू हमका एक बचन द्या। ²⁹ हम पचे तोहका चोट नाहीं पहोंचावा, अब तू पचन क इ बचन देइ चाही कि तू हम लोगन क चोट नाही पहोंचउब्या। हम पचे तोहका पठवा ह। मुला हम पचे तोहका सान्ति स पठवा ह। अब इ बात साफ अहइ कि यहोवा तोहका आसीर्बाद दिहेस ह।”

³⁰ ऍह बरे इसहाक ओनका दावत दिहस। सबहि खाएन अउ पिएन। ³¹ दूसर दिन भिन्सारे हर एक मनई बचन दिहस अउ किरिया खाएस। तब इसहाक ओनका सान्ति स बिदा किहस अउ उ पचे कुसल स ओकरे निचके स चला आएन।

³² उ दिना इसहाक क नउकर आएन अउ उ पचे आपन खना इनारा क बारे मँ बताएन। नउकरन कहेन, “हम पचे उ इनारा स पानी पिआ ह।” ³³ ऍह बरे इसहाक ओकर नाउँ सिबा रखेस अउ उ सहर अबहि भी बेर्सेबा कहवावत ह।

एसाव क मेहररुअन

³⁴ जब एसाव चालीस बरिस क भवा उ हित्ती मेहररुअन स बियाह किहस। एक बेरी क बिटिया यहूदीत रही। दूसर एलोन क बिटिया बासमत रही। ³⁵ इ सबइ बियाहे स इसहाक अउ रिबका क मन दुःखी भवा।