ईयोब 41

Marathi Bible: Easy-to-Read Version

41 “ईयोबा, तुला लिव्याथानाला गळ टाकून पकडता येईल का?
    तुला त्याची जीभ दोरीने बांधता येईल का?
² ईयोबा, तुला लिव्याथानाच्या नाकातून दोरी घालून त्याला वेसण घालता येईल का?
    किंवा त्याच्या जबड्यात गळ घालता येईल का?
³ ईयोबा, लिव्याथान तुझ्याकडे सोडून देण्यासाठी याचना करील का?
    तो तुझ्याशी मृदू शब्दात बोलेल का?
⁴ ईयोबा, लिव्याथान तुझ्याशी करार करुन
    जन्मभर तुझा दास होऊन राहील का?
⁵ ईयोब, तू पक्ष्याशी जसा खेळशील तसा लिव्याथानाशी खेळशील का?
    तू त्याला दोरीने बांधशील का?
    म्हणजे तुझ्या सेवक मुली त्याच्याशी खेळू शकतील?
⁶ ईयोबा मच्छीमार तुझ्याकडून लिव्याथानाला विकत घेण्याचा प्रयत्न करतील का?
    ते त्याचे तुकडे करुन ते व्यापाऱ्यांना विकण्याचा प्रयत्न करतील का?
⁷ ईयोबा, तू लिव्याथानाच्या कातडीत किंवा डोक्यात भाला फेकशील का?

⁸ “ईयोबा, तू एकदा का लिव्याथानावर हात टाकलास तर पुन्हा तसे कधी करु शकणार नाहीस.
    ती कशा प्रकारची लढाई असेल याचा एकदा विचार कर.
⁹ तू लिव्याथानाचा पराभव करु शकशील असे तुला वाटत असेल तर ते विसरुन जा.
    तशा आशेला जागाच नाही.
    त्याच्याकडे नजर टाकताच तुझी भीतीने गाळण उडेल.
¹⁰ एकही माणूस त्याला जागे करुन
    त्याचा राग ओढवून घेण्याइतका शूर नाही.

“माझ्याविरुध्द उभा राहाणाराही कुणी नाही. ^[a]
11 मी (देव) कुणाचाही देणेकरी नाही.
    या नभोमंडळाखाली जे जे आहे ते सर्व माझे आहे. ^[b]

¹² “ईयोबा, मी तुला लिव्याथानाच्या पायांविषयी, त्याच्या शक्तीविषयी
    आणि त्याच्या ऐटदार बांध्याविषयी सांगेन.
¹³ कुणीही त्याची कातडी छेदू शकत नाही.
    त्याची कातडी चिलखतासारखी ^[c] आहे.
¹⁴ लिव्याथानाला त्याचा जबडा उघडायला कुणीही भाग पाडू शकत नाही.
    त्याच्या तोंडातल्या दातांची लोकांना भीती वाटते.
¹⁵ लिव्याथानाच्या पाठीवर ढालीसारख्या खवल्यांच्या
    रांगा एकमेकांना चिकटून आहेत.
¹⁶ ते खवले एकमेकांना इतके चिकटले आहेत
    की त्यातून हवासुध्दा जाऊ शकत नाही.
¹⁷ त्याचे खवले एकमेकांशी घटृ बांधलेले आहेत.
    ते एकमेकांशी इतके घटृ बांधलेले आहेत की कुणी ते ओढून वेगळे करु शकत नाही.
¹⁸ लिव्याथान जेव्हा शिंकतो तेव्हा वीज चमकल्यासारखी वाटते.
    त्याचे डोळे पहाटेच्या प्रकाशासारखे चमकतात.
¹⁹ त्याच्या तोंडातून आगीचे लोळ बाहेर पडतात.
    आगीच्या ठिणग्या निघतात.
²⁰ उकळत्या भांड्याखाली ठेवलेल्या जळत्या गवतातून
    निघतो तसा धूर त्याच्या नाकातून येतो.
²¹ लिव्याथानाच्या श्र्वासानी कोळसे पेटतात
    आणि त्याच्या तोंडातून ज्वाला बाहेर पडतात.
²² लिव्याथानाची मान मजबूत आहे.
    लोक त्याला घाबरतात आणि त्याच्यापासून दूर पळत सुटतात.
²³ त्याच्या कातडीवर एकही मऊ भाग नाही.
    ती लोखंडासाखी कठीण आहे.
²⁴ लिव्याथानाचे हृदय पाषाणासारखे आहे.
    त्याला भीती वाटत नाही.
ते पाट्यासारखे आहे.
    जात्याच्या खालच्या तळीसारखे ते आहे.
²⁵ लिव्याथान उठून उभा राहिला की शूर वीरही घाबरतात.
    लिव्याथानाने त्यांची शेपटी हलवली की ते पळून जातात.
²⁶ तलवारी, भाले आणि तीर त्याच्यावर फेकले तरी ते त्याला न लागता परत येतात.
    त्या शस्त्रांनी त्याला काहीही इजा होत नाही.
²⁷ तो लोखांडाची कांब गवताच्या काडीसारखी मोडू शकतो.
    कुजलेले लाकूड जसे पटकन मोडते तसे तो पितळ मोडतो.
²⁸ तो बाणांना घाबरुन पळून जात नाही.
    वाळलेल्या गवताप्रमाणे दगड त्याच्यावर आपटून परत येतात.
²⁹ जेव्हा लाकडी गदा त्याच्यावर आपटली जाते तेव्हा त्याला ते गवत आपटल्याप्रमाणे वाटते.
    लोक त्याच्यावर भाले फेकतात तेव्हा तो हसतो.
³⁰ लिव्याथानाच्या शरीरावरची कातडी तीक्ष्ण, टणक खापरासाखी आहे.
    तो चिखलात कुळक फिरवल्याप्रमाणे तास पाडतो.
³¹ लिव्याथान पाण्याला उकळी आल्याप्रमाणे हलवतो.
    तो त्याला उकळत्या तेलाच्या भांड्याप्रमाणे तो त्यावर बुडबुडे आणतो.
³² लिव्याथान पोहतो तेव्हा तो आपल्यामागे मार्ग तयार करतो.
    तो पाणी ढवळून टाकतो आणि आपल्यामागे पांढरा फेस ठेवतो.
³³ पृथ्वीवरचा एकही पशू लिव्याथानासारखा नाही.
    तो एक भीतिविरहित प्राणी आहे.
³⁴ लिव्याथान गर्विष्ठ प्राण्याला कमी (तुच्छ) लेखतो.
    तो सगळ्या रानटी श्वापदांचा राजा आहे.
    आणि मी, परमेश्वराने त्याला निर्माण केले आहे.”