ئەیوب 14  Kurdi Sorani Standard

14 «مرۆڤی لەدایکبوو لە ژن
    ڕۆژگاری کەمە و چەرمەسەری زۆرە.
² وەک گوڵ دەپشکوێت و پاشان سیس دەبێت،
    وەک سێبەر دەڕوات و ناوەستێت.
³ جا لەسەر شتێکی وەک ئەمە چاوت زەق کردەوە و
    ئێستاش ئەوانت هێناوەتە بەردەم خۆت بۆ دادگایی؟
⁴ کێ دەتوانێت پاکێک لە گڵاوێک دەربهێنێت؟
    بێگومان کەس!
⁵ جا ئەگەر ڕۆژانی هەرکەسێک دیاریکراو بێت و
    ژمارەی مانگەکانی لای تۆ بێت و
    کاتێکت بۆ دیاریکردبێت کە لێی تێنەپەڕێت،
⁶ ئیتر لێیگەڕێ با پشوو بدات،
    هەتا وەک ڕەنجدەرێک دڵخۆش بێت بە تەواوبوونی ڕۆژەکەی.

⁷ «چونکە دار داخوازییەکی هەیە،
    ئەگەر بڕایەوە چەکەرە بکات و دووبارە شین بێتەوە و
    لقوپۆپی تازە دەربکات.
⁸ ئەگەر ڕەگەکەی لەناو زەویدا کۆنیش بێت و
    بنەدارەکەی لەناو خۆڵدا بمرێت،
⁹ هەر کاتێک بۆنی ئاو بکات چەکەرە دەکات و
    وەک ڕووەکێکی نوێ لق دەردەکات.
¹⁰ بەڵام پیاو دەمرێت و لەناودەچێت؛
    مرۆڤ ڕۆح بەدەستەوە دەدات و بوونی نابێت.
¹¹ هەروەک ئاوەکان لەناو دەریاچە نامێنن و
    ڕووبار ئاوی تێدا نامێنێت و وشک دەبێت،
¹² هەروەها مرۆڤیش ڕادەکشێت و هەڵناستێتەوە،
    لە خەوەکەی خەبەری نابێتەوە و بەئاگا نایەت
    هەتا ئاسمان نامێنێت.

¹³ «خۆزگە لەناو جیهانی مردووان لەچاو ونت دەکردم و
    دەتشاردمەوە هەتا تووڕەییەکەت دادەمرکایەوە!
خۆزگە کاتێکت بۆ دیاری دەکردم و
    بەبیرت دەهاتمەوە!
¹⁴ ئەگەر پیاوێک بمرێت، ئایا زیندوو دەبێتەوە؟
    هەموو ڕۆژانم تێکۆشانە،
    ئارام دەگرم هەتا دەرووم لێ دەکرێتەوە.
¹⁵ بانگم دەکەیت من وەڵامت دەدەمەوە،
    تامەزرۆ دەبیت بۆ ئەو بوونەوەرەی کە دروستت کرد.
¹⁶ بێگومان ئەو کاتە چاودێری هەنگاوەکانم دەکەیت،
    بەڵام تێبینی گوناهەکەم ناکەیت.
¹⁷ یاخیبوونەکەم گرێی لێدراوە لەناو بوخچەیەک،
    تاوانەکەم دەشاریتەوە.

¹⁸ «هەروەک چۆن کە چیا بکەوێت پارچەپارچە دەبێت و
    تاشەبەرد لە جێی خۆی دەلەقێت،
¹⁹ ئاو بەرد دەسووێنێت و
    لافاو خۆڵی زەوی ڕادەماڵێت،
    بەو جۆرە تۆش هیوای مرۆڤ لەناودەبەیت.
²⁰ بۆ هەتاهەتایە بەسەریدا زاڵ دەبیت و کۆتایی پێ دێت،
    ڕووی دەگۆڕیت و دەریدەکەیت.
²¹ ئەگەر کوڕەکانی ڕێزیان لێ بگیرێت، پێی نازانێت،
    ئەگەر لە پلەوپایەشیان نزم بکرێتەوە، ئاگای لێ نییە.
²² تەنها هەست بە ئازاری خۆی دەکات و
    داخ بۆ حاڵی خۆی دەخوات.»