ئیشایا 60  Kurdi Sorani Standard

⁴ «چاو هەڵبڕە بۆ دەوروبەری خۆت و تەماشا بکە!
    هەموو کۆبوونەوە و بۆ لای تۆ هاتن،
کوڕەکانت لە دوورەوە دێن و
    کچەکانیشت لە ئامێز دەگرن.
⁵ ئینجا تەماشا دەکەیت و ڕووناکییت لێ دەبارێت،
    لە خۆشیدا دڵت دادەخورپێت،
چونکە سامانی دەریا بۆ تۆ دەگوازرێتەوە،
    دەوڵەمەندی نەتەوەکان بۆ لای تۆ دێت.
⁶ ڕەوە وشتر زەویت دادەپۆشێت،
    وشترەکانی میدیان و عێفا.
هەموو لە شەباوە دێن،
    زێڕ و بخووریان بارکردووە،
    ستایشی یەزدان ڕادەگەیەنن.
⁷ هەموو مەڕی قێدار بۆ تۆ کۆدەکرێتەوە،
    بەرانەکانی نەبایۆت لەژێر دەستتدان،
بە پەسەندییەوە سەردەخرێنە سەر قوربانگاکەم و
    پەرستگای شکۆمەندیم شکۆمەند دەکەم.

⁸ «ئەوانە کێن وەک هەور دەفڕن و
    وەک کۆتر بەرەو ماڵەکانیان؟
⁹ بێگومان دوورگەکان چاوەڕوانی منن،
    هەروەها کەشتییەکانی تەرشیش لەپێشەوەن
بۆ هێنانی کوڕەکانت لە دوورەوە،
    زێڕ و زیوەکانیشیان لەگەڵیاندایە
بۆ ناوی یەزدانی پەروەردگارت،
    خودا پیرۆزەکەی ئیسرائیل
    کە شکۆداری کردیت.

¹⁰ «نەوەی بێگانە شووراکانت بنیاد دەنێنەوە،
    پاشاکانیان خزمەتت دەکەن.
هەرچەندە لە کاتی تووڕەییمدا لێم دایت،
    بەڵام لە کاتی ڕەزامەندیمدا بەزەییم پێتدا هاتەوە.
¹¹ دەروازەکانت هەمیشە واڵا دەبن،
    شەو و ڕۆژ داناخرێن
بۆ هێنانی سامانی نەتەوەکان بۆت و
    پاشاکانیشیان بە پێش دەدرێن.
¹² چونکە ئەو نەتەوە و شانشینەی خزمەتت نەکات لەناودەچێت و
بە تەواوی وێران دەبێت.

¹³ «شانازی لوبنان بۆ تۆ دێت،
    داری سنەوبەر، کاژ و سەروو پێکەوە،
بۆ ڕازاندنەوەی جێی پیرۆزگاکەم و
    شوێنی پێیەکانم شکۆدار دەکەم.
¹⁴ کوڕی ئەوانەی تۆیان زەلیل کرد بە کڕنۆشەوە دێن بۆ لات،
    هەموو ئەوانەی سووکایەتییان پێ دەکردیت کڕنۆش بۆ بنی پێت دەبەن و
پێت دەڵێن: شاری یەزدان،
    سییۆنی خودا پیرۆزەکەی ئیسرائیل.

¹⁵ «لە جێی ئەوەی بەجێماو و ڕق لێبوو و
    بێ ڕێبوار بیت،
دەتکەمە شانازی هەتاهەتایی،
    شادی نەوە دوای نەوە.
¹⁶ گەنجینەی نەتەوەکان دەبەن و
    سامانی شاهانە دەگرن.
جا دەزانیت کە منی یەزدان، ڕزگارکەری تۆم،
    ئەوەی تۆ دەکڕێتەوە توانادارەکەی یاقوبە.
¹⁷ لە جیاتی بڕۆنز زێڕ و
    لە جیاتی ئاسنیش زیو دەهێنم،
لە جیاتی داریش بڕۆنز و
    لە جیاتی بەردیش ئاسن دەهێنم.
سەلامەتی دەکەمە سەرپەرشتیارت و
    ڕاستودروستی دەکەمە سەرکارت.
¹⁸ ئیتر نە ستەم لە خاکەکەتدا دەبیسترێت
    نە وێرانی و شکانیش لە سنوورەکانت،
بەڵکو شووراکانت ناو لێ دەنێیت: ”ڕزگاری“ و
    دەروازەکانیشت ”ستایش“.
¹⁹ ئیتر خۆر بۆت نابێتە ڕووناکی ڕۆژ،
    درەوشانەوەی مانگیش نابێتە سەرچاوەی ڕووناکی تۆ،
بەڵکو یەزدان بۆت دەبێت بە ڕووناکی هەتاهەتایی،
    خوداشت بۆ شکۆمەندیت.
²⁰ لەمەودوا خۆری تۆ ئاوا نابێت،
    مانگی تۆ کەم ناکات،
چونکە یەزدان بۆت دەبێت بە ڕووناکی هەتاهەتایی،
    ڕۆژانی ماتەمینیت تەواو دەبێت.
²¹ لەو کاتەدا گەلەکەت هەمووی ڕاستودروست دەبن،
    زەویش بۆ هەتاهەتایە موڵکی خۆیان دەبێت.
ئەوەی من ناشتوومن نەمامن،
    دەستکردی منن بۆ شکۆمەندبوونم.
²² بچووک دەبێت بە هەزار و
    بچووکترین بە نەتەوەیەکی مەزن.
من یەزدانم،
    لە کاتی خۆیدا پەلەی پێ دەکەم.»