Испраќање на апостолите

(Матеј 10:5-15; Марко 6:7-13) 9 Еден ден, Исус ги повика Своите дванаесет ученици и им даде моќ, овластувајќи ги да истеруваат демонски духови и да исцелуваат болести. ² Потоа ги испрати да проповедаат за Божјото царство и да исцелуваат болни, ³ давајќи им ги следниве упатства: „Ништо не понесувајте на пат: ни стап, ни торба, ни леб, ни пари, ниту облека за пресоблекување! ⁴ Кога ќе дојдете во некоја куќа каде што ќе ви укажат гостоприемство, останете таму сe додека не си заминете од тој крај. ⁵ Онаму каде што нема да ве примат, напуштете го тој град и истресете го правот од своите нозе, како сведоштво против нив.“

⁶ Учениците заминаа и обиколувајќи ги селата ја проповедаа Радосната вест и исцелуваа болни насекаде.

Ирод е збунет и исплашен

(Матеј 14:1-12; Марко 6:14-29) ⁷ Кога слушна за сето ова Ирод^[a], гувернерот на областа Галилеја, се вознемири, зашто едни тврдеа дека Јован Крстител воскреснал од мртвите, ⁸ други, пак, дека се појавил пророкот Илија, а трети дека воскреснал некој од старите пророци. ⁹ Ирод говореше: „На Јован Крстител јас му ја отсеков главата; кој ли е човекот за кого слушам вакви необични работи!?“ И настојуваше да се види со Исуса.

Враќањето на апостолите

¹⁰ По извесно време, апостолите се вратија кај Исус и Му раскажаа за она што го беа направиле. Тогаш Тој ги поведе насамо, на едно тивко место, во околината на градот Бетцаида. ¹¹ Но кога луѓето разбраа каде е, се упатија кон Него. Тој ги прими и им говореше за Божјото царство и ги исцелуваше сите оние на кои им требаше оздравување.

Исус нахранува над пет илјади души

(Матеј 14:13-21; Марко 6:30-44; Јован 6:1-14) ¹² При квечерината, кај Исус дојдоа Неговите дванаесетмина ученици и Му рекоа: „Пушти ги луѓето да отидат до околните села и куќи и да си најдат преноќевалиште и храна, зашто местово е пусто.“ ¹³ Но Исус им рече: „Дајте им вие нешто да јадат.“ Тие Му одговорија: „Имаме само пет леба и две риби; освен ако сакаш да појдеме и да купиме храна за сите овие луѓе.“ ¹⁴ А имаше околу пет илјади мажи. Исус им рече на учениците: „Нека поседнат луѓето во групи од по педесет души.“ ¹⁵ Така и направија, ги испоседнаа сите луѓе. ¹⁶ Исус ги зеде петте леба и двете риби, и со поглед кон небото ги благослови и ги раскрши. Потоа им подаде на учениците да им ги разделат на луѓето. ¹⁷ Сите јадеа и се наситија, а собраа и дванаесет кошници остатоци.

Петар Го препознава Исуса како Месија

(Матеј 16:13-19; Марко 8:27-29) ¹⁸ Еднаш, кога Исус се молеше на тивко место, со Него беа само Неговите ученици. Тогаш Тој ги праша: „За Кого Ме сметаат луѓето?“ ¹⁹ Тие Му одговорија: „Едни велат дека си Јован Крстител, други дека си пророкот Илија, а трети дека си еден од старите пророци кој воскреснал од мртвите.“ ²⁰ „А за Кого Ме сметате вие?“ Петар одговори: „Ти Си Месијата^[b] испратен од Бог!“

Исус првпат ја најавува Својата смрт

(Матеј 16:20-28; Марко 8:30-9:1) ²¹ Тогаш Исус строго им заповеда да не го кажуваат ова никому. ²² Им го рече уште и тоа, дека Тој, Синот Човечки^[c], мора многу да страда, отфрлен од старешините, од високото свештенство и од вероучителите; дека ќе биде убиен и дека ќе воскресне на третиот ден.

Да се биде христијанин има своја цена

²³ Потоа Исус им се обрати на сите: „Тој што сака да биде Мој следбеник, треба да се откаже од своите себични амбиции, секојдневно да го носи својот крст и да тргне по Моите стапки. ²⁴ Секој што сака да си го чува животот само за себе - ќе го загуби; а тој што ќе го загуби животот заради Мене - ќе го спаси.

²⁵ Дали е добивка за човекот ако го добие и целиот свет, а себеси се изгуби и упропасти? ²⁶ Ако некој се срами од Мене и Моето учење, и Јас, Синот Човечки, ќе се срамам од него кога ќе дојдам во Својата слава и во славата на небесниот Татко и на светите ангели. ²⁷ Ве уверувам дека меѓу вас што стоите овде, има некои што нема да умрат додека не Го видат Божјото царство.“

Исусовото физичко преобразување на планината

(Матеј 17:1-8; Марко 9:2-8) ²⁸ По околу една седмица откако ги изговори овие зборови, Исус ги зеде со Себе Петар, Јаков и Јован и се искачи на планината, за да се моли. ²⁹ Додека се молеше, лицето Му се преобрази и облеката Му стана блескаво бела. ³⁰ Наеднаш, во Негова придружба се најдоа двајца мажи кои разговараа со Него. Тоа беа Мојсеј и пророкот Илија. ³¹ Нивниот изглед беше величествен и тие разговараа со Исус за смртта што Го очекуваше во Ерусалим. ³² Петар и неговите другари ги беше совладал сон, но кога се разбудија Го видоа Исуса во величествен изглед, како и двајцата што стоеја со Него. ³³ Додека Мојсеј и Илија се разделуваа од Исус, Петар проговори, во отсуство на присебност: „Господару! Колку ни е убаво овде! Ајде да направиме три колиби: една за Тебе, една за Мојсеј и една за Илија!“ ³⁴ Додека го изговараше ова, надојде облак и ги покри. Кога се најдоа во облакот, учениците многу се исплашија, ³⁵ а од облакот се чу глас, кој рече: „Ова е Мојот Син, Избраникот Мој; Него слушајте Го!“ ³⁶ Кога се чу гласот, Исус веќе беше останал Сам. Учениците молчеа за ова и во тоа време никому не му кажуваа за тоа што го беа виделе.

Исцелување на едно момче болно од епилепсија

(Матеј 17:14-18; Марко 9:14-27) ³⁷ Утредента додека Исус и тројцата Негови ученици слегуваа од планината ги пресретна многуброен народ. ³⁸ Еден човек извика од толпата: „Учителе! Те молам, погледни го мојот син, тој ми е единец! ³⁹ Го напаѓа зол дух, го тера да вреска, го фрла наваму-натаму и пена му избива на устата. Многу го измачува и долго не го пушта. ⁴⁰ Ги молев Твоите ученици да го истераат тој дух, но тие не можеа!“

⁴¹ Исус одговори: „Ах, колку неверно и грешно поколение сте вие! До кога ќе морам да останам со вас и да ве поднесувам!?“ Потоа му рече на човекот: „Донеси го синот овде!“ ⁴² Додека момчето приоѓаше, демонскиот дух го кутна наземи и почна да го измачува. Исус со наредба го изгони демонскиот дух и го исцели момчето, па му го врати на таткото.

Исус вторпат зборува за Својата смрт

(Матеј 17:22-23; Марко 9:30-32) ⁴³ Сите останаа вчудовидени пред Божјата моќна сила. И додека народот сe уште се восхитуваше од она што го правеше Исус, Тој им се обрати на Своите ученици и им рече: ⁴⁴ „Запомнете ги добро овие зборови: Синот Човечки^[d] ќе биде предаден во рацете на луѓето.“ ⁴⁵ Но учениците не ги разбраа овие зборови. За нив ова остана таинствено, а не се осмелуваа да Го прашаат Исуса што значат тие зборови.

Кој е најголем во Божјите очи?

(Матеј 18:1-5; Марко 9:33-37) ⁴⁶ Меѓу учениците на Исус се разви расправија за тоа, кој од нив е најголем? ⁴⁷ Исус, познавајќи ги нивните мисли, повика едно дете, го стави крај Себе, ⁴⁸ и им рече: „Тој што го прима ова дете во Мое име - Мене Ме прима; а кој Ме прима Мене, Го прима Оној^[e] што Ме испрати. Најголем меѓу сите вас е оној што е најпонизен!“

Кој не е против вас, тој е со вас

(Марко 9:38-40) ⁴⁹ Тогаш Јован Му рече на Исус: „Господару! Видовме еден човек, кој во Твое име изгонува демонски духови и му наредивме да престане, зашто тој не оди со нас.“ ⁵⁰ Но Исус му одговори: „Немојте да му забранувате! Кој не е против вас, тој е со вас!“

ИСУС ТРГНУВА КОН ЕРУСАЛИМ

Негостољубивите Самарјанци

⁵¹ Кога наближи времето да биде вознесен на небото, Исус решително тргна кон Ерусалим. ⁵² Испрати гласници пред Себе, кои отидоа во едно самариско село, за да Му приготват преноќевалиште, ⁵³ но тие не сакаа да Го примат, зашто Тој одеше за Ерусалим^[f]. ⁵⁴ Кога го слушнаа тоа учениците Јаков и Јован, рекоа: „Господе, сакаш ли да заповедаме да слезе оган од небото, па да ги уништи, како што направи Илија^[g]?“ ⁵⁵ Но Исус се сврте кон нив и ги прекори. ⁵⁶ Потоа Исус и Неговите ученици отидоа во друго село.

Колебливи следбеници

(Матеј 8:19-22) ⁵⁷ Додека патуваа, еден човек Му пристапи и рече: „Готов сум да Те следам насекаде!“ ⁵⁸ А Исус му одговори: „Лисиците си имаат дувла, птиците гнезда, но Јас, Синот Човечки, немам Свое место за почивање.“

⁵⁹ А на еден друг човек, Исус му рече: „Дојди и биди Мој следбеник!“ Но човекот рече: „Господе, дозволи ми најпрво да одам да го погребам татко ми.“ ⁶⁰ Исус му одговори: „Остави ги духовно мртвите да ги погребуваат своите мртовци. Ти тргни да проповедаш за Божјото царство!“

⁶¹ И трет човек Му се обрати на Исус: „Ќе тргнам со Тебе, Господе, но дозволи ми најпрво да отидам и да се збогувам со моето семејство!“ ⁶² Исус му рече: „Божјото царство нема полза од човек кој ја става раката на ралото, а гледа назад!“