Proverbia 1:24-31

Biblia Sacra Vulgata

²⁴ Quia vocavi, et renuistis; extendi manum meam, et non fuit qui aspiceret:

²⁵ despexistis omne consilium meum, et increpationes meas neglexistis.

²⁶ Ego quoque in interitu vestro ridebo, et subsannabo cum vobis id quod timebatis advenerit.

²⁷ Cum irruerit repentina calamitas, et interitus quasi tempestas ingruerit; quando venerit super vos tribulatio et angustia:

²⁸ tunc invocabunt me, et non exaudiam; mane consurgent, et non invenient me:

²⁹ eo quod exosam habuerint disciplinam, et timorem Domini non susceperint,

³⁰ nec acquieverint consilio meo, et detraxerint universae correptioni meae.

³¹ Comedent igitur fructus viae suae, suisque consiliis saturabuntur.