³ Sinubok mo ang aking puso, dinalaw mo ako sa gabi,
    nilitis mo ako at wala kang natagpuan,
    ako'y nagpasiya na ang aking bibig ay hindi susuway.
⁴ Tungkol sa mga gawa ng mga tao, sa pamamagitan ng salita ng mga labi mo,
    ang mga daan ng karahasan ay naiwasan ko.
⁵ Ang aking mga hakbang ay nanatili sa iyong mga landas,
    ang aking mga paa ay hindi nadulas.

⁶ Ako'y tumatawag sa iyo, O Diyos, sapagkat ikaw ay sasagot sa akin,
    ang iyong pandinig ay ikiling sa akin, ang aking mga salita ay pakinggan mo rin.
⁷ Ipakita mong kagila-gilalas ang tapat mong pagmamahal,
    O tagapagligtas ng mga naghahanap ng kanlungan
    mula sa kanilang mga kaaway sa iyong kanang kamay.

⁸ Gaya ng itim ng mata, ako ay ingatan mo,
    sa lilim ng iyong mga pakpak, ako ay ikubli mo,
⁹ mula sa masama na nananamsam sa akin,
    sa nakakamatay kong mga kaaway na pumapalibot sa akin.
¹⁰ Isinara nila ang kanilang mga puso sa kahabagan,
    sa kanilang bibig ay nagsalita sila na may kapalaluan.
¹¹ Kinubkob nga nila kami sa aming mga hakbang;
    itinititig nila ang kanilang mga mata upang sa lupa kami ay ibuwal.
¹² Sila'y parang leong sabik na manluray,
    parang batang leon na sa mga tagong dako ay nag-aabang.

¹³ O Panginoon, bumangon ka, harapin mo sila, ibagsak mo sila!
    Iligtas mo sa masama ang buhay ko sa pamamagitan ng tabak mo,
¹⁴ mula sa mga tao, sa pamamagitan ng iyong kamay, O Panginoon ko,
    mula sa mga tao na ang bahagi sa buhay ay sa sanlibutang ito.
At ang tiyan nila'y pinupuno mo ng iyong kayamanan,
    sila'y nasisiyahan na kasama ng mga anak,
    at iniiwan nila ang kanilang kayamanan sa kanilang mga sanggol.

¹⁵ Tungkol sa akin, aking mamasdan ang iyong mukha sa katuwiran;
    kapag ako'y gumising, aking mamamasdan ang iyong anyo at masisiyahan.