Ang Ipinamana kay Juda

15 Ang naging lupain ng lipi ng mga anak ni Juda ayon sa kanilang mga angkan ay hanggang sa hangganan ng Edom; hanggang sa ilang ng Zin sa kadulu-duluhang bahagi ng timog.

² Ang kanilang hangganan sa timog ay mula sa kadulu-duluhang bahagi ng Dagat na Alat, mula sa look na nakaharap sa timog.

³ Ito'y papalabas sa dakong timog paakyat sa Acrabim, at patuloy sa Zin at paakyat sa timog ng Kadesh-barnea, at patuloy sa Hesron, at paakyat sa Adar, at paliko sa Carca;

⁴ at patuloy sa Azmon, at papalabas sa batis ng Ehipto, at ang mga labasan ng hangganan ay sa dagat: ito ang inyong magiging hangganan sa timog.

⁵ Ang hangganan sa silangan ay ang Dagat na Alat, hanggang sa bunganga ng Jordan. At ang hangganan sa hilaga ay mula sa look ng dagat na nasa bunganga ng Jordan:

⁶ at paakyat hanggang sa Bet-hogla, at patuloy sa hilaga ng Bet-araba; at ang hangganan ay paakyat sa bato ni Bohan na anak ni Ruben.

⁷ Ang hangganan ay paakyat sa Debir mula sa libis ng Acor, hanggang sa hilagang paharap sa dakong Gilgal, na nasa tapat ng paakyat sa Adumim, na nasa timog ng ilog: at ang hangganan ay patuloy sa tubig ng En-shemes, at ang mga labasan niyon ay sa En-rogel.

⁸ Ang hangganan ay paakyat sa libis ng anak ni Hinom hanggang sa Jebuseo sa timog (na siya ring Jerusalem): at ang hangganan ay paakyat sa taluktok ng bundok na naroroon sa harapan ng libis ng Hinom sa kanluran na nasa kadulu-duluhang bahagi ng libis ng Refaim sa hilaga.

⁹ Ang hangganan ay umaabot mula sa taluktok ng bundok hanggang sa bukal ng tubig ng Neftoa, at papalabas sa mga lunsod ng bundok ng Efron, at ang hangganan ay umaabot sa Baala (na siya ring Kiryat-jearim).

¹⁰ Ang hangganan ay paikot mula sa Baala sa kanluran hanggang sa bundok ng Seir, at patuloy sa tabi ng bundok Jearim sa hilaga (na siya ring Chesalon), at pababa sa Bet-shemes at patuloy sa Timna.

¹¹ Ang hangganan ay papalabas sa tagiliran ng Ekron sa hilaga; at ang hangganan ay umaabot sa Siceron, at patuloy sa bundok ng Baala, at papalabas sa Jabneel; at ang mga labasan ng hangganan ay sa dagat.

¹² Ang hangganan sa kanluran ay ang Malaking Dagat, at ang baybayin nito. Ito ang hangganan ng mga anak ni Juda sa palibot, ayon sa kanilang mga angkan.

Sinakop ni Caleb ang Hebron at Debir^(A)

¹³ Ayon^(B) sa kautusan ng Panginoon kay Josue, ay nagbigay siya kay Caleb na anak ni Jefone ng isang bahagi sa gitna ng mga anak ni Juda, samakatuwid ay ang Kiryat-arba, na siya ring Hebron, (si Arba ay naging ama ni Anak).

¹⁴ Pinalayas ni Caleb mula roon ang tatlong mga anak na lalaki ni Anak: sina Sesai, Ahiman, at Talmai, na mga anak ni Anak.

¹⁵ Siya'y umakyat mula roon laban sa mga taga-Debir: ang pangalan ng Debir nang una ay Kiryat-sefer.

¹⁶ At sinabi ni Caleb, “Ang sinumang makatalo sa Kiryat-sefer at sakupin ito, sa kanya ay ibibigay ko bilang asawa si Acsa na aking anak na babae.”

¹⁷ Sinakop ito ni Otniel na anak ni Kenaz, na kapatid ni Caleb; at ibinigay niya sa kanya bilang asawa si Acsa na kanyang anak na babae.

¹⁸ Nang si Acsa ay dumating sa kanya, kanyang hinimok siya na humingi sa kanyang ama ng isang parang; at siya'y bumaba sa kanyang asno at sinabi ni Caleb sa kanya, “Anong ibig mo?”

¹⁹ At kanyang sinabi, “Bigyan mo ako ng handog; yamang inilagay mo ako sa lupain ng Negeb ay bigyan mo rin ako ng mga bukal ng tubig.” At ibinigay ni Caleb sa kanya ang mga bukal sa itaas at ang mga bukal sa ibaba.

Ang mga Bayan ng Juda

²⁰ Ito ang naging pamana sa lipi ng mga anak ni Juda ayon sa kanilang mga angkan.

²¹ Ang mga kadulu-duluhang lunsod ng lipi ng mga anak ni Juda sa timog sa hangganan ng Edom ay ang Kabzeel, Eder, Jagur,

²² Cina, Dimona, Adada,

²³ Kedes, Hazor, Itnan,

²⁴ Zif, Telem, Bealot,

²⁵ Hazor-hadata, Kiryot-hesron (na siya ring Hazor),

²⁶ Amam, Shema, Molada,

²⁷ Hazar-gada, Hesmon, Bet-pelet,

²⁸ Hazar-shual, Beer-seba, Bizotia,

²⁹ Baala, Iim, Ezem,

³⁰ Eltolad, Cesil, Horma,

³¹ Siclag, Madmana, Sansana,

³² Lebaot, Silim, Ain, at Rimon: lahat ng mga lunsod ay dalawampu't siyam, pati ang mga nayon ng mga iyon.

³³ Sa mababang lupain: Estaol, Sora, Asena,

³⁴ Zanoa, En-ganim, Tapua, Enam,

³⁵ Jarmut, Adullam, Socoh, Azeka,

³⁶ Saaraim, Aditaim, Gedera, Gederotaim; labing-apat na lunsod pati ang kanilang mga nayon.

³⁷ Senan, Hadasha, Migdal-gad;

³⁸ Dilan, Mizpe, Jokteel,

³⁹ Lakish, Boscat, Eglon,

⁴⁰ Cabon, Lamas, Citlis;

⁴¹ Gederot, Bet-dagon, Naama at Makeda: labing-anim na bayan at ang kanilang mga nayon.

⁴² Libna, Eter, Asan,

⁴³ Jifta, Asna, Nesib,

⁴⁴ Keila, Aczib, at Maresha; siyam na lunsod at ang kanilang mga nayon.

⁴⁵ Ekron at ang kanyang mga bayan at mga nayon,

⁴⁶ mula sa Ekron hanggang sa dagat, lahat na nasa gilid ng Asdod at ang kanilang mga nayon.

⁴⁷ Asdod, at ang kanyang mga bayan at mga nayon. Gaza, at ang kanyang mga bayan at mga nayon, hanggang sa batis ng Ehipto, at ang Malaking Dagat at ang kanyang baybayin.

⁴⁸ Sa lupaing maburol, Samir, Jatir, Socoh,

⁴⁹ Dana, Kiryat-sana (na siyang Debir),

⁵⁰ Anab, Estemoa, Anim;

⁵¹ Goshen, Holon, at Gilo: labing-isang lunsod at ang kanilang mga nayon,

⁵² Arab, Duma, Eshan,

⁵³ Janum, Bet-tapua, Afeca;

⁵⁴ Humta, Kiryat-arba (na siyang Hebron), at Sior; siyam na lunsod at ang kanilang mga nayon.

⁵⁵ Maon, Carmel, Zif, Juta,

⁵⁶ Jezreel, Jocdeam, Zanoa,

⁵⁷ Cain, Gibeah, at Timna: sampung lunsod at ang kanilang mga nayon.

⁵⁸ Halhul, Bet-zur at Gedor,

⁵⁹ Maarath, Bet-anot, at Eltecon; anim na lunsod at ang kanilang mga nayon.

⁶⁰ Kiryat-baal (na siyang Kiryat-jearim), at Rabba: dalawang lunsod at ang kanilang mga nayon.

⁶¹ Sa ilang; Bet-araba, Midin, Secaca;

⁶² Nibsan, at ang Bayan ng Asin, at En-gedi: anim na lunsod at ang kanilang mga nayon.

⁶³ Ngunit^(C) ang mga Jebuseo na naninirahan sa Jerusalem ay hindi napalayas ng mga anak ni Juda; kaya't ang mga Jebuseo ay nanirahang kasama ng mga anak ni Juda sa Jerusalem hanggang sa araw na ito.