25 Ang Panginoon ay nagsalita kay Moises, na sinasabi,

² “Sabihin mo sa mga anak ni Israel na sila'y magdala sa akin ng isang handog; tanggapin ninyo ang handog para sa akin mula sa bawat tao na ang puso ay nagkukusang-loob.

³ At ito ang handog na inyong kukunin sa kanila: ginto, pilak, tanso,

⁴ lanang asul, kulay-ube, pula, at lino at pinong hinabing balahibo ng kambing,

⁵ mga balat ng lalaking tupa na kinulayan ng pula, at mga balat ng kambing, at kahoy na akasya,

⁶ langis sa ilawan, mga pampabango sa langis na pampahid, at sa mabangong insenso;

⁷ mga batong onix, at mga bato sa efod, at sa pektoral.

⁸ Igawa nila ako ng isang santuwaryo upang ako'y makapanirahan sa gitna nila.

⁹ Ayon sa lahat ng aking ipinakita sa iyo, sa anyong huwaran ng tabernakulo at sa anyong huwaran ng lahat ng kasangkapan niyon ay gayon ninyo gagawin.

Ang Kaban ng Tipan^(A)

¹⁰ “Sila'y gagawa ng isang kabang yari sa kahoy na akasya na may dalawang siko at kalahati ang haba, isang siko't kalahati ang luwang, isang siko't kalahati ang taas.

¹¹ Iyong babalutin ng lantay na ginto; sa loob at sa labas ay iyong babalutin, at igagawa mo ng isang moldeng ginto sa palibot.

¹² Bubuo ka ng apat na argolyang ginto para ilagay mo sa apat na paa niyon, dalawang argolya sa isang tagiliran niyon, at dalawang argolya sa kabilang tagiliran niyon.

¹³ Gagawa ka ng mga pasanang yari sa kahoy na akasya at iyong babalutin ng ginto.

¹⁴ Iyong isusuot ang mga pasanan sa mga argolya na nasa mga tagiliran ng kaban, upang mabuhat ang kaban sa pamamagitan ng mga ito.

¹⁵ Ang mga pasanan ay mananatili sa loob ng mga argolya ng kaban; hindi aalisin doon ang mga ito.

¹⁶ Iyong ilalagay sa loob ng kaban ang mga patotoo na aking ibibigay sa iyo.

¹⁷ Pagkatapos,^(B) gagawa ka ng isang luklukan ng awa na lantay na ginto na may dalawang siko at kalahati ang haba niyon, at isang siko at kalahati ang luwang niyon.

¹⁸ At gagawa ka ng dalawang kerubin na ginto; gagawin mo ang mga iyon sa pamamagitan ng pagpitpit, sa dalawang dulo ng luklukan ng awa.

¹⁹ Gumawa ka ng isang kerubin sa isang dulo, at ng isang kerubin sa kabilang dulo; sa kaputol ng luklukan ng awa, gagawin mo ang mga kerubin sa dalawang dulo niyon.

²⁰ Ibubuka ng mga kerubin nang paitaas ang kanilang pakpak, na nilililiman ang luklukan ng awa ng kanilang mga pakpak. Sila'y nakaharap sa isa't isa; ang mukha ng kerubin ay nakaharap sa luklukan ng awa.

²¹ Iyong ilalagay ang luklukan ng awa sa ibabaw ng kaban; at sa loob ng kaban ay iyong ilalagay ang tipan^[a] na aking ibibigay sa iyo.

²² Doon ako makikipagtagpo sa iyo, at mula sa ibabaw ng luklukan ng awa, sa gitna ng dalawang kerubin na nasa ibabaw ng kaban ng tipan ay ibibigay ko sa iyo ang lahat ng mga utos ko para sa mga anak ni Israel.

Ang Hapag para sa Tinapay na Handog^(C)

²³ ‘Gagawa ka ng isang hapag na yari sa kahoy na akasya; dalawang siko ang haba, isang siko ang luwang at isang siko at kalahati ang taas.

²⁴ Iyong babalutin ito ng lantay na ginto, at igagawa mo ng isang moldeng ginto sa palibot.

²⁵ Igagawa mo ito ng isang gilid sa palibot na may isang dangkal ang luwang, at igagawa mo ng isang moldeng ginto ang palibot ng gilid niyon.

²⁶ At igagawa mo ng apat na argolyang ginto, at ilalagay mo ang mga argolya sa apat na sulok na nasa apat na paa niyon.

²⁷ Malalapit sa gilid ang mga argolya, sa daraanan ng mga pasanan, upang madala ang hapag.

²⁸ At gagawin mo ang mga pasanan mula sa kahoy na akasya, at iyong babalutin ng ginto, at ang hapag ay dadalhin sa pamamagitan ng mga iyon.

²⁹ Gagawa ka ng mga pinggan niyon para sa insenso, at ng mga banga at mga mangkok na pagbubuhusan; na iyong gagawing lantay na ginto.

³⁰ At^(D) ilalagay mo sa hapag ang tinapay na handog sa harap ko palagi.

Ang Ilawan^(E)

³¹ “Gagawa ka ng isang ilawan na lantay na ginto. Ang paa at tangkay ng ilawan ay yari sa pinitpit na ginto; ang mga sanga, ang mga kopa niyon, at ang mga bulaklak niyon ay isang piraso.

³² At magkakaroon ng anim na sangang lumalabas sa mga tagiliran niyon na kasama nito, tatlong sanga ng ilawan sa isang tagiliran niyon, at tatlong sanga ng ilawan ay sa kabilang tagiliran niyon,

³³ tatlong kopa na ginawang tulad ng almendro, bawat isa ay may usbong at isang bulaklak; at tatlong kopang anyong bulaklak ng almendro sa kabilang sanga, isang usbong at isang bulaklak; at gayon sa anim na sangang lumalabas mula sa ilawan.

³⁴ Sa ilawan mismo ay magkakaroon ng apat na kopang anyong bulaklak ng almendro, kasama ng mga usbong at ng mga bulaklak niyon,

³⁵ at magkakaroon ng isang usbong sa ilalim ng bawat pares ng anim na lumalabas sa ilawan.

³⁶ Ang magiging mga usbong at mga sanga niyon ay iisa, ang kabuuan niyon ay isa lamang putol na yari sa pinitpit na lantay na ginto.

³⁷ Igagawa mo ito ng pitong ilaw, at ang mga ilaw ay sisindihan upang magbigay liwanag sa dakong katapat nito.

³⁸ Ang mga pangsipit at ang patungan ay magiging lantay na ginto.

³⁹ Ito ay gagawin sa isang talentong lantay na ginto pati ng lahat ng kasangkapang ito.

⁴⁰ At^(F) tiyakin mong gawin ang mga iyon ayon sa anyong huwaran ng mga iyon na ipinakita sa iyo sa bundok.