Dee 44 Psalm

To dän Haupt Musikaunt fa dee Korah Säns. En Nodenkje.

¹ Wie ha jeheat met onnse Uare, O Gott, onnse Fodasch ha onns fetalt fonn daut Woakj daut du enn äare Doag deetst, enn dee Freajoasche Tiede.

² Du deetst Natsjoone rut driewe met diene Haunt, un deetst dee plaunte. Du deetst dee Mensche betriebe un deetst dän rut driewe.

³ Dan dee deede daut Launt nijch oawe derjch äa eajnet Schweat, un äa eajne Oarm deed an nijch rade; oba daut wea diene rajchte Haunt un dien Oarm un daut Lijcht fonn dien Jesejcht – dan du hautst en Jefaule enn an.

⁴ Du best dee, mien Kjeenijch, O Gott; doo Radunk aunkommendeare fa Joakopp.

⁵ Derjch die woa wie onnse Fiend dol schuwe, derjch dien Nome woa wie dän dol traumple dee jäajen onns oppstone.

⁶ Dan ekj woa nijch enn mien Boage fetruehe, un mien Schweat woat mie nijch rade.

⁷ Oba du hast onns fonn onnse Fiend jerat, un hast dän to schaunde jemoakt dee onns hausste.

⁸ Wie doone Gott daen Dachäwa lowe, un doone dien Nome fa emma preise. Selah

⁹ Oba du hast onns wajch jeschmäte un onns to schaunde jemoakt; un du jeist nijch rut met diene Armeeha.

¹⁰ Du hast onns jemoakt fonn dän Fient wajch rane; un see, dee onns hausse doone onns plindre fa sikj selfst.

¹¹ Du hast onns henjejäft soo aus Schop fa Äte, un hast onns festreit mank dee Natsjoone.

¹² Du hast dien Folkj fekoft fa nuscht. Un du hast äa Pries nijch hejcha jestalt.

¹³ Du hast onns en Fluch jemoakt to onnse Nobasch, en Fe-achte un en Spott to dän dee runnt omm onns sent.

¹⁴ Du moakst onns soo aus en Sprejchwuat mank dee Natsjoone, en Koppscheddre mank dee Felkja.

¹⁵ Miene Schaund es fer mie dän Dach äwa, jo, dee Schaund fonn mien Jesejcht bedakjt mie;

¹⁶ wäajen däm siene Stem die mie schlajchtet noräde deit, un dee Spatta fer dän Fient un däm dee Rach eewe deit.

¹⁷ Dit es aules opp onns jekome, oba wie ha die nijch fejäte, un ha uk nijch faulsch jehaundelt met dien Bunnt.

¹⁸ Wie sent nijch trigjaun jegone met onnse Hoate, un wie sent uk nijch tosied jedreit fonn dien Wajch,

¹⁹ Wan du onns uk fekjneddat hast enn dee wile Tiare äare Städ, un hast onns bedakjt met dän Doodes Schaute.

²⁰ Wan wie dän Nome fonn onns Gott fejäte ha, un ha onnse Henj utjestrakjt no en framda Gott,

²¹ sull Gott daut nijch utseakje? Dan hee weet daut Jeheemet fonn daut Hoat.

²² Jo, omm dienet haulwe sent wie dän dachäwa to dän Doot äwejäft; wie sent soo aunjseene aus Schop tom schlachte.

²³ Wakj opp! Wuaromm deist du schlope, O Herr? Sto opp! doo onns nijch fa emma auntsied schmiete.

²⁴ Wuaromm deist du dien Jesejcht festäakje, un deist onns Älend un Noot fejäte?

²⁵ Dan onnse Seel es raufjebrocht bott daut Stoff. Onns Buk blift faust oppe Ead.

²⁶ Sto opp fa onnse Help un doo onns rade, omm diene Leeftolijchkjeit haulwe.