Taneshtilis 5
Ne Bibliaj Tik Nawat
5 Wan nikitak ka iyekkan ne muetztuk ijpak ne kuijpal se amat kululujtuk tajkwilujtuk taijtik, wan ka ipan piktuk iwan chikume sajti, 2 wan nikitak se tanawatiani hombron tanajnawatia wan tzajtzi:
"Ká yek pal weli kitapua ne amat wan kitujtuma ne isajsaj?" 3 Wan te aka tik ne ilwikak nian ijpak ne tal nian itan ne tal welituya kitapua ne amat wan tachia, 4 wan nichukak wey ika inte aka muajsik yek pal kitapua ne amat kululujtuk nian pal kita. 5 Wan se pal ne noymet nechilwia: "Maka shichuka: ne leon, ne kistuk itech ne itribuj Yuda, ne inelwayu Dawid, welik kitapua ne amat wan ne chikume isaj."
6 Wan nikitak, tatajku ne kuijpal wan ne nawi tay yujyultuk wan tatajku ne noymet, se ichkakunetzin ejkatuk ken miktijtuk; wan kipiatuya chikume cachoj wan chikume ijish, yejemet ne chikume nawal ipal ne Teut; 7 wan ajsik wan kikwij itech ne imayekkan ne muetztuk ijpak ne kuijpal.
8 Wan kwak kikwijtuya ne amat, ne nawi tay yujyultuk wan ne senpual-nawi noymet mutamutaket talchi tik itachialis ne ichkakunetzin. Muchi kipiatuyat sejse iguitarraj wan wajwajkal tejtentuk iwan teukwit wan tapupuch, yejemet ne inteujteutajtanilis ne tayulmatit, 9 wan takwikaket se yankwik takwikalis, ina:
"Taja tiyek pal tikwi ne amat
wan pal tiktapua n' isajsaj,
ika metzmiktijtiwit
wan tikuilij ne Teut iwan ne muesyu sejse
ipal muchi ne trijtribuj, tajtaketzalis wan tejtechan,
10 wan tikinchijki se tatekimakalis
wan palejmet ipal tuTeut
wan san tatekimakasket ijpak ne tal."
11 Wan nikitak wan nikakik taketzat miak tanawatiani ne kiyawaluat ne kuijpal wan ne tay yujyultuk wan ne noymet, wan tepewit ne tajtanawatianimet hasta kan te welituskiat mupuat, sujsul sujsul mijmiak. 12 Wan tzajtzit:
"Ne ichkakunetzin miktijtuk yek pal kikwi ne itajpal wan tumin wan tamatilis wan honor wan tzitzinakalis wey wan bendicion."
13 Wan muchi tay muchijki ne nemi tik ne ejekat wan ijpak tal wan itan tal wan ijpak at wan muchi tay nemi nujme nikinkakik inat:
"Ma kipia ne muetztuk ijpak ne kuijpal
ne bendicion
wan ne honor
wan ne weytzizinakalis
wan ne itajpal
pal senpa wan senpa."
14 Wan ne nawi tay yujyultuk inaket:
"Amen."
Wan ne noymet mutamutaket talchi wan mutankwaketzket.
Ne Bibliaj Tik Nawat · © 2008, 2012 Jan Morrow