जकर्याह 3
Awadhi Bible: Easy-to-Read Version
महायाजक क बारे मँ दर्सन
3 तब उ मोका महायाजक यहोसू क दिखाया। उ यहोवा क सरगदूत क समन्वा खड़ा भवा रहा। सइतान हुआँ यहोसू क जरिये कीन्ह गए बुरे करमन बरे दोख देइ बरे ओकर दहिना कइँती खड़ा रहा। 2 तब यहोवा क सरगदूत कहेस, “सइतान, यहोवा तोहका फटकारइ। यहोवा जउन यरूसलेम क चुने रहा, तोहका फटकारइ। का इ मनई आगी स निकरा भवा बरत काठे क नाईं नाहीं बाटइ?”[a]
3 यहोसू सरगदूत क समन्वा खड़ा रहा अउर ओकरे ओढ़नन गन्दा रहेन। 4 तब आपन निअरे खड़े भए दूसर सरगदूतन स सरगदूत कहेस, “यहोसू स गन्दा ओढ़नन क उतारि ल्या।” तब सरगदूत यहोसू स बातन किहेस। उ कहेस, “मइँ तोहरे अपराधन क छोरि लिहेउँ ह अउर मइँ तोहका नवा ओढ़ना देइउँ ह।”
5 तब उ कहेस, “ओकरे मूँड़ी पइ एक ठु साफ पगड़ी रखइ द्या।” यह बरे जब यहोवा क सरगदूत हुवाँ खड़ा रहा, उ पचे एक ठु साफ पगड़ी ओकरे मुँड़ी पइ रखेस अउर उ पचे ओका नवा ओढ़ना पहिराएन। 6 तब यहोवा क सरगदूत यहोसू स अधिकार क संग कहेन:
7 इ उहइ अहइ जउन सर्वसक्तीमान यहोवा कहत ह:
“अगर तू मोर आदेसन क पालन करब्या
अउर ओन बातन क करब्या जेका मइँ आदेस दिहेउँ ह,
तउ तू मोर घरे पइ सासन करब्या
अउर तू मोर मन्दिर क आँगन क अधिकारी होब्या।
अउर मइँ तोहका ओन लगोन मँ आवइ-जावइ देब्या
जउन हिआँ खड़ा अहइँ।
8 हे महायाजक यहोसू, सुना!
तू अउर तोहका मीतन जउन तोहार समन्वा बइठा अहइ
इ बात क प्रतीक अहइ कि इ सबइ बात होब्या!
सच ही, मइँ आपन सेवक क लइ आउब जउन ‘साख’ कहा जात ह।
9 उ पाथर हिआँ अहइ जेका मँ यहोसू क समन्वा राखेउँ।
इ पाथर मँ सात आँखन अहइँ।
मइँ एह पइँ एक लेख खोदब।
एक दिना मइँ ओह भूइँया प स पापन क खत्म करब”
सर्वसक्तीमान यहोवा इ सब कहत ह।
10 सर्वसक्तीमान यहोवा कहत ह,
“उ दिना तोहमाँ स
प्रत्येक आपन पड़ोसियन क
आपन दाख-लता
अउर अंजीर क बृच्छ क नीचे आमंत्रित करब्या।”
Footnotes
- 3:2 का … बाटइ यहोसू हिआँ यहूदी जिलावतन क प्रस्तुत करत ह जेका (बारत काठे क नाईं आगी स निकारा गवा रहा) उद्देस क पूरा करइ बरे बचावा गवा रहा परमेस्सर क।
Awadhi Bible: Easy-to-Read Version. Copyright © 2005 Bible League International.