Oppenboa 16:19-19:2

Reimer 2001

¹⁹ En dee groote Staut deeld sikj en dree Deel, en dee Natsjoone aeare Staede folle. En dee groote Staut Babieloon wort fer Gott em Jedajchtnes behoole, aea daut Kuffel foll Wien fonn sien Oaja to jaewe.

²⁰ En aule Insel feschwunge, en dee Boaj weare nich to finje.

²¹ En groote Hoagelsteena, bie hunndat Punnt groot, folle utem Himel opp Mensche; en de Mensche lastada Gott waeajen dee Hoagelploag, dan dee Ploag wea seeha groot.

17 Donn kjeem eena fonn dee Enjel dee de saewen Komme haud, en raed met mie en saed: "Komm, ekj woa die daut Jerecht wiese aewa dee groote Hua dee opp fael Wotasch set,

² met waem dee Kjeenije oppe Ead Huararie jedraewe ha, en sent met aea Huarawien bedrunke jeworde."

³ En hee druach mie wajch em Jeist no ne Wiltnes. En ekj sach ne Fru opp en schoarlock roodet Tia sette, daut foll Lasta Nomes wea, en saewen Kjap en tean Heana haud.

⁴ En dee Fru wea enn purpur en schoarlock aunjekjleet, en utjeputtst met Golt en deare Steena en Parle, en haud en goldnet Kuffel enn aeare Haunt daut foll Aeakeljet, en Onnreinet, en Huararie wea,

⁵ en opp aea Stearn wea en Nome jeschraewe, en Jeheemnes: BABIELOON DEE GROOTE, DEE MUTTA AEWA AULE HUARE, EN AUL DAUT AEAKELJET OPPE EAD.

⁶ En ekj sach daut dee Fru bedrunke wea met dee Heilje aea Bloot, en daut Bloot fonn Jesus siene Zeij. En ekj wunndad mie seeha aus ekj aea sach.

⁷ En dee Enjel saed to mie: "Wuaromm wunndascht du die? Ekj woa die daut Jeheemnes fonn dee Fru saje, en daut Tia daut aea drajcht daut saewen Kjap en tean Heane haft.

⁸ Daut Tia daut du sachst wea, en es nich, en es bott doa daut hee fonn dee Aufgrunnt kjemt, en woat enne Fedaumnes enenn gone; en aul dee, dee oppe Ead wone woare sikj fewunndre, daen aeare Nomes nich enn daut Laewesbuak jeschraewe sent fonn aunfank de Welt, wan see daut Tia seene daut wea, en nich es, en nu oba es.

⁹ Hia es dee Senn dee Weisheit haft. Dee saewen Kjap sent saewen Boaj, opp dee de Fru set, en doa sent saewen Kjeenije;

¹⁰ Fief sent jefolle, eena es, dee aundra es noch nich jekome, en wan hee kjemt, mott he en kortet Stoot bliewe.

¹¹ En daut Tia daut wea, en nich es, dee jrod es dee achta, oba es fonn dee saewen, en jeit enn Fedaumnes enenn.

¹² En dee tean Heana dee du sachst, sent tean Kjeenije dee noch nich en Kjeenichrikj jekjraeaje ha, oba kjriehe Follmacht aus Kjeenije met daut Tia fa eene Stunnd.

¹³ Dise ha een Senn, en jaewe daut Tia aeare Krauft en Follmacht.

¹⁴ Dise woare met daut Laum Kjrich moake, en daut Laum woat jewenne, wiel hee Herr es aewe aule Herre, en Kjeenich aewa aule Kjeenije es, en dee, dee met am sent, sent beroope en jewaelt en Tru."

¹⁵ En hee saed to mie: "Dee Wotasch dee du sachst, wua dee Hua set, sent Mensche, en Menje fonn Mensche, en Natsjoone, en Sproake.

¹⁶ En dee tean Heane dee du sachst, en daut Tia, woare dee Hua hause, en woare aea to Grunnt brinje, en noaktich moake, en woare aea Fleesch aete, en woare aea met Fia febrenne.

¹⁷ Dan Gott haft an daut enn aeare Hoate jejaeft sien Wele to doone, en met een Senn aea Kjeenichrikj daut Tia to jaewe, bott Gott siene Wead sulle foadich jebrocht woare.

¹⁸ En dee Fru dee du sachst es dee groote Staut dee en Kjeenichrikj haft aewa aule Kjeenije oppe Ead.

18 No dit sach ekj noch een Enjel fomm Himel rauf kome, en dee haud groote Follmacht; en dee Ead wort derch siene Harlichkjeit oppjedacht.

² Hee schreach met ne stoakje Stem en saed: "Jefolle, jefolle es dee groote Staut Babieloon! dee ne behusunk wea fa beese Jeista, en en Jefenknes fa aule onnreine Jeista, en Jefenknes fa aule onnreine en jehauste Faeajel,

³ dan aule Natsjoone ha fonn daen Oajawien fonn aeare Huararie jedrunke, en dee Kjeenije oppe Ead ha Huararie met aea jedraewe, en dee Haundelslied oppe Ead sent rikj jeworde derch dee Krauft fonn aeare grote Jemietlichkjeit."

⁴ En ekj head noch eene Stem utem Himel dee sad: "Komt rut fonn aea, mien Follkj, daut jie nich aundeel ha aun aeare Sind, en daut jie nich uk aeare Ploag kjriehe;

⁵ dan aeare Sind es bottem Himel jekome, en Gott haft aeare Onnjerajchtichkjeit nich fejaete.

⁶ Tol aea trig soo aus see trig jetolt haft, en tol aea dubbelt trig no aeare Woakje; enn daut Kuffel daut see bruckt tom enreare, rea aea daut dubbelt enn;

⁷ doano aus see sikj selfst feharlicht haft en enn Jemietlichkjeit laewd, jef aea Kwol en trua. Dan see haft enn aea Hoat jesajcht: 'Ekj set soo aus ne Kjeenijin, en sie nich ne Waetfru, en see kjeen Trua.'"

⁸ Doaromm woare aeare Ploag enn een Dach kome, daen Doot, en Trua, en Hungaschnoot; en met Fia woat see ommjebrocht woare; dan de Herr Gott dee aea rechte deit, es stoakj."

⁹ En dee Kjeenije oppe Ead dee met aea Huararie jedraewe ha, en huachaea jelaeft ha, woare aewa aea hiele en jaumareare, wan see daut Ruak fonn aea brenne seene.

¹⁰ See woare enn angst wiet auf stone waeajen aeare Kwol, en woare saje: "Wee! Wee! dee groote Staut! dee stoakje Staut Babieloon, dan enn eene Stunnd es dien Jerecht jekome."

¹¹ En dee Haundelslied oppe Ead hiele en truare aewe aea, dan kjeena kjaft meeha aeare Woa,

¹² soo aus Gollt, en Selwa, deare Steena, en Perle, en feina Leiwent, en Purpur, en Sied, en Schoarlock, en aulet Tsetroonehollt, en Jefaese fonn Aulfensteen, en Jefaese fonn dearet Hollt, en Mesinj, en Iesa, en Marmelsteen,

¹³ en Kerneel, en Kjriedarie, en Ruakstoff, en Saulw, en Weiruak, en Eelj, en fienet Mael, en Weit, en Fee, en Schop, en Pead, en Woages, en Kjarpa, en Menscheseele.

¹⁴ En dee Frucht no woont diene Seel leste deed, es fonn die feschunge, en aul dee Pracht en Glauns es fenicht, en kjeena woat dee opp irjent en Wajch finje.

¹⁵ Dee Haundelslied dee dise Dinje haude en doaderch weare rikj jeworde, woare fonn wiet auf stone en groote Angst ha aewa aeare Kwol, en woare hiele en truare,

¹⁶ en saje: "Wee! Wee! dee groote Staut dee met feine Leiwent en Purpur en Schoarlock jekjeelt wea, en met Gollt en deare Steene en Parla;

¹⁷ dan enn eene stunnd es soon grootet Rikjdom to nusscht jeworde." Aule Schepmeista, en aule dee opp Schaeb reisde, en Seemana, en soone dee oppem Maea oabeide, stunnde fonn wiet auf,

¹⁸ en schreaje aus see daut Ruak fonn aea Brenne sage, en saede: "Met waem es dise groote Staut to fejlikje?"

¹⁹ En see schmeete Stoff opp aeare Kjap en schreaje, en hielde en truade, enn sade: "Wee! Wee! dee groote Staut, derch aea sent aul dee, dee Schaeb ha, rikj jeworde wiel aeare Woa soo fael weat wea, dan enn eene Stunnd es see to Grunnt jebrocht."

²⁰ Freit junt aewa aea, Himel en Heilje en Apostel en Profeete, dan Gott haft aea jerecht omm junet haulwe.

²¹ En stoakja Enjel neem en groota Steen, soo aus en groota Maelsteen, en schmeet daut em Maea enenn, en saed: "Met soone Jewault woat dee groote Staut Babieloon aewaschmaete woare, en woat opp kjeen wajch meeha to finje senne.

²² En dee Stem fonn soone dee de Hoap spaele, en Muesikj, en Fleetespaele, en Trommpeete spaela, woare opp kjeen wajch meeha enn die to heare senne, en kjeen Hauntwoakj woat enn die to finje senne, en daut Jelud fonn Maelsteene woat niemols meeha enn die to heare senne.

²³ En Laumpelicht woat opp kjeen wajch enn die senne, en opp kjeen wajch woat enn die de Stem fonn daen Briegaum oda de Brut to heare senne; dan dee Haundelslied weare dee Groote oppe Ead, dan derch diene Tsauberie worde aule Natsjoone fefeat"

²⁴ En enn aea wea daut Bloot fonn Profeete en Heilje jefunje, uk aul daen aeat dee oppe Ead doot jemoakt worde.

19 No dit head ekj en grootet Jelud fonn fael Mensche em Himel, dee saede: "Haleluja! Dee Radunk en dee Harlichkjeit en dee Krauft jeheat onns Gott!

² dan Tru en Jeracht es sien Jerecht: dan hee haft dee groote Hua jerecht, dee de gaunse Welt fedorf met aeare Huararie, en hee haft daut Bloot fonn siene Deena fonn aeare Haunt jefoddat."