Matthaeus 16:6-12

Biblia Sacra Vulgata

⁶ Qui dixit illis: Intuemini, et cavete a fermento pharisaeorum et sadducaeorum.

⁷ At illi cogitabant intra se dicentes: Quia panes non accepimus.

⁸ Sciens autem Jesus, dixit: Quid cogitatis intra vos modicae fidei, quia panes non habetis?

⁹ Nondum intelligitis, neque recordamini quinque panum in quinque millia hominum, et quot cophinos sumpsistis?

¹⁰ neque septem panum in quatuor millia hominum, et quot sportas sumpsistis?

¹¹ Quare non intelligitis, quia non de pane dixi vobis: Cavete a fermento pharisaeorum et sadducaeorum?

¹² Tunc intellexerunt quia non dixerit cavendum a fermento panum, sed a doctrina pharisaeorum et sadducaeorum.