Marcus 8:22-26

Biblia Sacra Vulgata

²² Et veniunt Bethsaidam, et adducunt ei caecum, et rogabant eum ut illum tangeret.

²³ Et apprehensa manu caeci, eduxit eum extra vicum: et exspuens in oculos ejus impositis manibus suis, interrogavit eum si quid videret.

²⁴ Et aspiciens, ait: Video homines velut arbores ambulantes.

²⁵ Deinde iterum imposuit manus super oculos ejus: et coepit videre: et restitutus est ita ut clare videret omnia.

²⁶ Et misit illum in domum suam, dicens: Vade in domum tuam: et si in vicum introieris, nemini dixeris.