Marcus 10:17-22

Biblia Sacra Vulgata

¹⁷ Et cum egressus esset in viam, procurrens quidam genu flexo ante eum, rogabat eum: Magister bone, quid faciam ut vitam aeternam percipiam?

¹⁸ Jesus autem dixit ei: Quid me dicis bonum? nemo bonus, nisi unus Deus.

¹⁹ Praecepta nosti: ne adulteres, ne occidas, ne fureris, ne falsum testimonium dixeris, ne fraudem feceris, honora patrem tuum et matrem.

²⁰ At ille respondens, ait illi: Magister, haec omnia observavi a juventute mea.

²¹ Jesus autem intuitus eum, dilexit eum, et dixit ei: Unum tibi deest: vade, quaecumque habes vende, et da pauperibus, et habebis thesaurum in caelo: et veni, sequere me.

²² Qui contristatus in verbo, abiit moerens: erat enim habens multas possessiones.