Lukas 2:22-40

Reimer 2001

²² En aus dee Doag fa aeare bereinjunj no Mooses sien Jesats febie weare, naume see am no Jerusalem, om am Gott hantojaewe;

²³ [so auset em Jesats fom Herr jeschraewe steit: "Jieda easchta Jung dee ne Fru to Welt bringt saul hielich jenant woare tom Herr".]

²⁴ uk en Opfa to jaewe no daem dautet Jesats fom Herr sajcht: "En Poa Turtelduwe, oda twee junje Duwe".

²⁵ En kjikj, doa wea enn Jerusalem en Maun dee heet Siemeon, en dis Maun wea From en Jeracht, en luud no Iesrael aea Treesta: en dee Heilje Jeist wea opp am;

²⁶ en dee Jeist haud am weete lote daut hee nich stoawe wudd eeha hee daem Herr sien Christus jeseene haud.

²⁷ En dee Jeist leid am nom Tempel; en aus dee Elre daut Kjint Jesus enenn brochte fa am daut to doone waut Mood wea nom Jesats,

²⁸ naum hee daut Kjint enn siene Oarms en lowd Gott en saed:

²⁹ "Herr, nu latst du dien Sklow enn Fraed stoawe no dien Fespraeakje;

³⁰ dan miene Uage ha dien Heil jeseene,

³¹ daen du haeajestalt hast fa aulem to seene;

³² en Licht fa aule Felkje to seene, en ne Harlichkjeit fa dien Folkj Iesrael."

³³ En Joosaf en daut Kjint siene Mutta wunndade sikj aewa daut waut fonn daut Kjint jesajcht wort.

³⁴ En Siemeon saejend an en saed to Marie: "Dit Kjint es jestalt doatoo daut derch am fael enn Iesrael faule woare en wada oppjerecht woare; en hee woat en Teakjen senne jaejen woont fael raede woare;

³⁵ [en Schweat woat uk derch diene Seel jestoake woare,] daut fael aeare Jedanke em Hoat woare jeoppenboat woare.

³⁶ En doa wea ne Fru, dee heet Anna, ne Profeetin, Fanuel siene Dochte, fonn daem Aser Staum: de wea seeha Oolt, en haud met aea Maun saewen Yoa jelaeft fonn donn es see befriet wea,

³⁷ en wea nu aul fa Achtefeatich Yoa ne Waetfru en bleef em Tempel, en deend Gott met Jebaed en Fauste Dach en Nacht.

³⁸ En see kjeem donn jrod enenn en dankt Gott en raed to aula dee no daut Heil luude en Jerusalem.

³⁹ Aus see donn aules jedone haude no daem Herr sien Jesats, jinje see trig no Galilaea no aeare Staut Natsaret.

⁴⁰ Daut Kjint woss en wort stoak, en wea met Weisheit jefelt, en Gott siene Jnod wea opp am.