Lukas 1:1-25

Reimer 2001

1 En daem daut faele ha enn Haunt jenome dee Dinje doltoschriewe waut mank onns paseat sent,

² soo aus onns dee aufjeleewat weare fonn dee, dee daut selfst sage, en Deene weare fa daut Wuat:

³ docht ekj daut fa Goot, sentamol ekj mie daut jeneiw unjasocht ha fonn dee haeakunft, so daut ekj die, mien huach je-achta Teofilus, daut kunn ordentlich schriewe,

⁴ daut du muchst weete daut dise Dinj to jleewe sent, dee die je-leat worde.

⁵ To dee Tiet aus Heroodes Kjeenich wea enn Judaea, wea doa en jewesa Priesta dee heet Sacharias ut Abia sien Deenstgrupp; en siene Fru wea eent fonn Aroon siene Dajchta, dee heet Eliesabet.

⁶ Dee weare beid from fer Gott, en waundelde enn daem Herr siene Jeboote en Leare oone Fael.

⁷ En see haude kjeene Kjinja, wiel Eliesabet kunn nich Kjinje habe; en see weare nu uk aul beid enn huaget Ella.

⁸ Nu pasead daut es hee fer Gott enn sien Priesta-aumt deend,

⁹ soo aus dee Jewanheit wea, jinkj hee enn daem Herr sien Tempel enenn om en seete Ruak to brenne.

¹⁰ En daut gaunse Menj Mensche stunnt buete en baede waearent dee Reakjestunnd.

¹¹ Meteemol kjeem en Enjel fom Herr en stunnt aune rachte sied fom Ruak Aultoa.

¹² Aus Sacharias am sajch, fefead hee sikj en am kjeem ne groote Angst enn.

¹³ Oba dee Enjel saed to am: "Engst die nich, Sacharias, dan dien Jebaed es jeheat, en diene Fru Eliesabet woat die en Saen jaewe, en du saust am daem Nome Jehaun jaewe.

¹⁴ En du woascht die freie en jleklich senne, en faele woare sikj freie to siene Jeburt.

¹⁵ Dan hee woat enn Gott siene Uage groot senne, en hee saul nich Wien oda stoakjet Jedrenkj drinkje, en hee woat sogoa fonn sien Muttalief met daem Heilje Jeist jefelt senne.

¹⁶ En fael fonn dee Iesrael Saens woat hee trig dreie no Gott aea Herr,

¹⁷ en hee woat faearwauts gone enn daem Jeist en Krauft dee Elia haud, omm dee Fodasch aeare Hoate no dee Kjinje to dreie, en dee Onnjehuarsaume no de Jerachte, daem Herr en Folkj reed to moake, dee reed sent fa daem Herr."

¹⁸ En Sacharias saed to daem Enjel: "Wuarenn saul ekj dit weete? dan ekj sie en oola Maun, en miene Fru es uk em huajet ella?"

¹⁹ Dee Enjel auntwuad en saed to am: "Ekj sie Gabriejel, dee enn Gott siene Jaejenwoat sto; en ekj sie jeschekjt met die to raede en die dise Norecht to brinje.

²⁰ Oba kjik! du woascht stomm senne, en nich raede kjenne bott daen Dach wan dit paseare woat, wiels du miene Wead nich jleewsd, dee paseare woare enn aere Tiet."

²¹ En dee Lied buete luade fa Sacharias, en wunndade sikj daut hee so lang em Tempel bleef.

²² Aus hee erut kjeem, kunn hee nich to an raede; en see moakjte daut hee en Jesecht jeseene haud em Tempel; wiel hee muak Teakjens to an, en bleef Stomm.

²³ So boolt aus sien Deenst aewa wea, feleet hee en jinkj no sien eajnet Hus.

²⁴ No dee Doag wort siene Fru Eliesabet met Kjint, en festuak sikj fa fief Moonat, en saed:

²⁵ "So haft de Herr met mie jehaundelt enn dise Doag, en haft mie aunjeseene en mien Aelend fer Mensche wajch jenome."