Lukas 19:12-27

Reimer 2001

¹² Doaromm saed hee: "En Odelmaun reisd no en launt wiet auf, omm en Kjeenichrikj fa sikj selfst to kjriehe en dan trigtokome.

¹³ Aus hee eascht siene tean Sklowe no sikj jeroopt haud, jeef hee an tean Selwastakje en saed: 'Haundelt doamet bott ekj trig kom.'

¹⁴ Oba siene Birja hausste am en schekjte am Faeatraede hinjaraun en leete am weete: 'Wie wele nich daut dis Maun aewa onns harsche saul.'

¹⁵ Aus hee sien Rikj jekjraeaje haud en trig kjeem, felangd hee dee Sklowe no am to kome daen hee daut Jelt jejaeft haud, daut hee weete kunn waut en jiedre jemoakt haud derch haundle.

¹⁶ Dee easchta kjeem en saed: 'Herr, dien Jelt haft tean meeha fedeent.'

¹⁷ En de Herr saed to am: "Goot, gooda Sklow, wiel du met daut jeringste best tru jewast, jaew ekj die Follmacht aewa tean Staede.'

¹⁸ Dee tweeda kjeem en saed: 'Herr, dien Jelt haft fief meeha fedeent.'

¹⁹ Hee saed uk to am: 'En sie du aewa fief Staede.'

²⁰ Dee aundra kjeem en saed: 'Herr, kjikj - hia es dien Jelt daut ekj enn en Schnuppelduak wajch jelacht haud;

²¹ dan ekj engst mie fa die, wiel du en hoada Maun best; du nemst opp waut du nich hanjelajcht hast, en deist arnte wua du nich jeseit hast.'

²² Hee saed to am: 'Ut dien eajnet Mul woa ekj die rechte, du beesa Sklow. Du wist daut ekj oppnaem wau ekj nich hanjelajcht hab, en doo arnte wua ekj nich jeseit ha?

²³ Wuaromm laedst du dan nich mien Jelt enne Bank enenn? Wan ekj dan trig kjeem wudd ekj daut trig kjriehe met Entrast.'

²⁴ Hee saed donn to daen, dee doa romm stunde: 'Naemt daut Jelt fonn am en jaeft daem daut dee tean Biete haft.'

²⁵ [Dee saede to am: 'Herr, hee haft aul tean."]

²⁶ Ekj saj ju daut waeaemma haft, daem woat jejaeft woare, en fonn daem dee nich haft woat sogoa daut wajchjenome woare waut hee haft.

²⁷ Oba dee, miene Fiend, dee nich wulle ha daut ekj aewa an harsche sull, brinjt daen haea en moakt daen doot fer mie."