Iudicum 12:7-15

Biblia Sacra Vulgata

⁷ Judicavit itaque Jephte Galaadites Israel sex annis: et mortuus est, ac sepultus in civitate sua Galaad.

⁸ Post hunc judicavit Israel Abesan de Bethlehem:

⁹ qui habuit triginta filios, et totidem filias, quas emittens foras, maritis dedit, et ejusdem numeri filiis suis accepit uxores, introducens in domum suam. Qui septem annis judicavit Israel:

¹⁰ mortuusque est, ac sepultus in Bethlehem.

¹¹ Cui successit Ahialon Zabulonites: et judicavit Israel decem annis:

¹² mortuusque est, ac sepultus in Zabulon.

¹³ Post hunc judicavit Israel Abdon filius Illel Pharathonites:

¹⁴ qui habuit quadraginta filios, et triginta ex eis nepotes, ascendentes super septuaginta pullos asinarum. Et judicavit Israel octo annis:

¹⁵ mortuusque est, ac sepultus in Pharathon terrae Ephraim, in monte Amalec.