13 Wan nikitak kisa tik ne weyat wan tejku se tekwani kipiatuya majtakti cachoj wan chikume itzuntekun wan ijpak ne icajcachoj majtakti yawalilpika, wan ijpak ne itzujtzuntekun itujtukay kukujtaketzalis. ² Wan ne tekwani nikitak muita ken se uselut, wan ne ijikshi ken ne osoj, wan ne iten ken ne iten ne leon. Wan ne kuat majwey kimakak ne itajpal wan ne ikuijpal wan ne itatuktilis. ³ Wan se itzuntekun nemituya ken mutzuntektuk wan miktuk, wan ne chiraj ipal ne mikilis pajtituk.

Wan ishpuyawik muchi ne tal ipan ne tekwani. ⁴ Wan mutankwaketzket iishpan ne kuat majwey ika kimakak ne tekwani tatuktilis, wan mutankwaketzket iishpan ne tekwani wan inat: "Ká kenha ken ne tekwani, wan ká weli musuma iwan?"

⁵ Wan kimakaket se iten tanutza wey wan kukujtaketza, wan kimakaket tatuktilis pal kichiwa ijtik unpual-ume metzti, ⁶ wan kitapuj ne iten kukujtaketza ne Teut, pal kukujtaketza ne itukay, wan ne itawipan, ne muchantiat tik ne ilwikak. ⁷ Wan kimakaket ma weli musuma iwan ne tayulmatit wan weli mas que yejemet wan kimakaket tatuktilis ijpak muchi ne trijtribuj wan tajtaketzalis wan tejtechan. ⁸ Wan iishpan mutankwaketzket muchi ne muchantiat pak ne tal ne itukay inte mujkwiluj tik ne iamaw yultuk ne ichkakunetzin kwak mutzintij ne taltikpak.

⁹ Asu aka kipia takakilis, ma takaki:

¹⁰ Asu aka nemi ilpituk,

ma ilpituk;

asu aka nemi pal mumiktia iwan espadaj,

ma mumikti iwan espadaj.

Nikan nemi ne tanejmachselilis wan ne tayulmatilis ipal ne yejyek.

¹¹ Wan nikitak ukse tekwani kisa tik ne tal wan tejku, wan kipiatuya ume cachoj kenha ken se ichkakunetzin, wan tanutza ken se kuat majwey. ¹² Wan kichiwa muchi tay ne itatuktilis ne achtu tekwani tik itachialis. Wan kichiwa ka ne tal wan ne muchantiat ijtik yaja mutankwaketzat iishpan ne achtu tekwani, ne pajtik ne ichiraj imikilis. ¹³ Wan kichiwa sejse wey pal muishmati, pal nusan kichiwa ka tit tik ne ilwikak waltemu talchi tik itachialis ne takamet, ¹⁴ wan kinshijshikua ne chanejket ijpak ne tal iwan sejse pal muishmati, ka kimakaket ma weli kichiwa iishpan ne tekwani, wan kinhilwia ne chanejket ijpak ne tal ma kichiwakan se tachialis ipal ne tekwani ne kipia ne ichiraj ne espadaj wan nemi yultuk.

¹⁵ Wan kimakaket ma weli kimaka iijiu ne tachialis ipal ne tekwani, pal nusan weli tanutza ne tachialis ipal ne tekwani wan weli kichiwa ma muchi tay inte mutankwaketzat iishpan ne tachialis ipal ne tekwani ma mikikan. ¹⁶ Wan kichiwa ka muchi, ne chijchikitik wan ne wejwey, wan ne kipiat wey wan ne munekit, wan ne isel itejtekuyu wan ne tepal tekitinimet, kikwit se kwikwil ijpak ne inmey inyekkan, wan asu inte ijpak ne inkwatapal, ¹⁷ wan ka inte aka weli takua nian tanamaka asu inte kipia wawasujtuk ne itukay ne tekwani o ne tapual ipal ne itukay.

¹⁸ Nikan nemi ne tamatilis: ká ne kipia tamatilis, ma tasenpua ne tapual ipal ne tekwani, ika yaja itapual takat, wan ne itapual yaja chikwasen-tzunti-yeshpual-chikwasen.