Salmo 91

Ang Pulong Sa Dios

³ Luwason ka gayod niya gikan sa mga lit-ag ug sa makapatay nga mga balatian.
⁴ Panalipdan ka niya sama sa usa ka langgam nga nagapanalipod sa iyang mga piso ilalom sa iyang mga pako.
Sa iyang pagkamatinumanon, panalipdan ka niya ug labanan.
^5-6 Dili ka angayng mahadlok sa mga makalilisang nga mga panghitabo, sa mga motakboy nga mga balatian, ug sa mga katalagman nga moabot—sa gabii man o sa adlaw.
⁷ Bisan linibo pa ka mga tawo ang mangamatay sa imong palibot, ikaw dili maunsa.
⁸ Makita mo na lang kon unsaon pagsilot ang daotang mga tawo.

⁹ Tungod kay gihimo mo mang dalangpanan ang Ginoo, ang Labing Halangdong Dios nga akong tigpanalipod,
¹⁰ walay kalamidad o katalagman nga moabot kanimo o sa imong panimalay.
¹¹ Kay sugoon sa Dios ang iyang mga anghel sa pagbantay kanimo bisan asa ka moadto.
¹² Sakwaton ka nila aron dili masamad ang imong tiil sa mga bato.^[b]
13 Tumban mo ang mga liyon ug ang malala nga mga bitin.

¹⁴ Miingon ang Dios, “Luwason ko ug panalipdan ang nagahigugma ug nagaila kanako.
¹⁵ Kon motawag siya kanako, tubagon ko siya;
kon anaa siya sa kalisod, ubanan ko siya;
luwason ko siya ug pasidunggan.
¹⁶ Hatagan ko siyag taas nga kinabuhi,
ug ipakita ko kaniya kon unsaon ko siya pagluwas.”