Salmo 82

Ang Pulong Sa Dios

82 Gipangulohan sa Dios ang panagtigom sa mga pangulo;^[a]
ug gihukman niya sila.
² Miingon siya, “Hangtod kanus-a kamo mohukom nga dili matarong?
Hangtod kanus-a kamo modapig sa mga daotan?
³ Hatagi ninyo ug hustisya ang mga timawa ug mga ilo.
Labani ninyo ang katungod sa mga kabos ug mga dinaog-daog.
⁴ Luwasa ang mga kabos ug timawa gikan sa gahom sa mga tawong daotan.
⁵ Wala silay nahibaloan.
Dili sila makasabot.
Daw nagakinabuhi sila sa kangitngit, ug walay kalig-onan ang ilang kinabuhi.^[b]
6 Nakaingon na ako kaninyo, ‘Mga dios kamo;
tanan kamo mga anak sa Labing Halangdong Dios.
⁷ Apan mamatay gihapon kamo isip nga tawo.
Matapos ang inyong kinabuhi sama sa tanang mga pangulo.’ ”