Salmo 128

Ang Pulong Sa Dios

128 Bulahan kamong tanan nga nagatahod sa Ginoo, ug nagakinabuhi subay sa iyang mga pamaagi.
² Mapahimuslan ninyo ang inyong hinagoan;
magmalipayon kamo ug magmauswagon.
³ Ang inyong asawa mahisama sa usa ka mabungahong ubas diha sa inyong panimalay,
ug ang inyong mga anak magtigom libot sa inyong mga lamisa nga daw mga saha sa kahoyng olibo.
⁴ Ingon niini ang panalangin nga madawat sa mga tawo nga nagatahod sa Ginoo.
⁵ Hinaut pa nga panalanginan kamo sa Ginoo gikan sa iyang templo sa Jerusalem.^[a]
Hinaut pa nga makita ninyo ang pag-uswag sa Jerusalem sa tibuok ninyong kinabuhi,
⁶ ug hinaut nga makita pa ninyo ang inyong mga apo.